Esima 22 - Tege Kiwoyeti (teg) NT Portions

¹ «Adumu a mi ŋa ataara a mi, leyuga ma alyele mi be ma kacwula njuru a mi.»

² Ŋaa bo ayuga kalyele nde ma jui le bo le eberayike, bo aselegi ki pi. Ŋaa Poole dugi ndi:

³ «Mi Zife, akuli ka Tarese wo Silisi. Ŋaa mi yeli ka Zerizaleme kunu, ŋa mi bagi mva oyizigi Ngamaliyele. Nde yizigi mi ma kaya angiri ajaajaa ma annkaaga a bizi a be. Mi kiigi ma anjya Njyami bila yala, mva be aso lubu.

⁴ Mi mpi ba baalwono Njila Mfumu mpasi tii leku. Mi si ka kuara ŋa cuni ma ongeneŋe abalaga bila akaazi.

⁵ Ompi ambwoŋi woonini ŋa oju we akuuru ba abuna lyele ni mi elyele ŋa syele. Bo ampi mi esangumu eli ma ebuna kuara adumu ba aZife ka Damase, ŋa mi yeni nca kangundu kia: mi sagi kuara ayaligi ba akiigi kwa, ma kaya bila bo Zerizaleme ni abuma bo lwuba.»

Poole alyele e cwoli e Mfumu

⁶ «Mi kiigi ma njila ŋa mi kiigi tuga Damase, kancinci ŋaa, tari lemi kalaga ngulu ocu, kafii keenini kamon kafi yulu ka kyemi ŋa kajeniŋi mi.

⁷ Mi vi ma ncie ŋa mi yugi jui lelyele mi ndi: “Soole, Soole, we meema ampa mi mpasi?”

⁸ Mi pizi ni: “We na Mfumu?” Jui le kaali ma mi ndi: “Mi Zezi wo Nazarete, wo ampa we mpasi.”

⁹ Baakiigi bila mi amoni kafii, ŋaa bo aki yuga jui le wo ki lyele bila mi ŋi.

¹⁰ Ŋaa mi pizi ndi: “Ŋaa mi buni esa Mfumu?” Ŋa Mfumu dugi mi ndi: “Temeŋe, je Damase, ŋa kaŋa ba alyele we lemigi leso lesa we.”

¹¹ Mva kafii ka ekyeme kiigi ka ma bula mi miizi, ba akiigi yila mi ayagi mi ma kwogo ŋa abiri mi Damase.

¹² Kaŋaa, kiigi ŋa balaga lemon nkuumu Ananyase. Nde kiigi nyima Njyami ma katura ngiri a Moyize. AZife aso baakiigi ka Damase ba kalyele maave ma nde.

¹³ Nde yi bazaga mi nde ki mpaana mi ŋa nde dugi mi ndi: “Soole, dumu a mi, ni miizi a we avura mono!” Kancinci ŋaa mi miizi a naaŋi ŋa mi moni nde.

¹⁴ Nde lusi ndi: “Njyami ankaaga a bizi a be ma aswolo we ka levuzu ma kasa ma jii nde. Nde swoli we mini we mono Zezi, wo Tele, ŋa ndi we yuga jui le nde.

¹⁵ Okorogo we aka temi le nde ma ka lyele ka miizi a baari ma moni we bila ma yugi we.

¹⁶ Ŋa yiga ema levura njila? Temeŋe ŋa yaga ateemi ŋa ka cuka amaami maabi a we ŋa ma ecwoli e nkuumu a nde.”»

Poole alyele lemigi le atumi nde mpila baali ka aZife ŋi

¹⁷ «Mi vurugi Zerizaleme ŋa, ŋaa mi ebwono nca Njo Njyami, mi bagi lworo lemon.

¹⁸ Mi moni Mfumu ŋa nde dugi mi ndi: “We sanaŋa cwuga Zerizaleme! Okorogo baari ba kangundu ki ba kayalaga otemi o we ma mi ŋi.”

¹⁹ Mi kaali ndi: “Mfumu, bo ayayi yemiŋi ndi, mi kiigi je nca anjo ma ba baabwono ma kalege le ongeneŋe bila ma kabere ba ayalaga we.

²⁰ Ŋa ntini ye abumi Etyene, temi a we, mi se, kiigi kaŋaa. Mi yaligi ba kiigi buma nde ŋa mi kyeli amfa a bo.”

²¹ Mfumu dugi ŋa mi ndi: “Je, kabila mi etuma we laa, mpila baali ka aZife ŋi.”»

Poole bila komanda aRome

²² Lembuuru kiigi leyuga Poole tii ntini ye mani nde mbari ye mbiza, ŋaa aso yiga baata anya ndi: «Lebuma balaga li! Ka kpa! Nde ki buna kaka muon yila ncie yi ŋi!»

²³ Bo aselegi ti osarigi, acyezi angoyi a bo ŋa ma kacuna ewuru kayulu.

²⁴ Ŋaa komanda wo aworo arome dugi ndi: «Lesa kanyunuŋa Poole nca njo aworo ŋa le bere nde mini nde kalyele! Mi e sanaŋa ya meema lembuuru leta nde nya ma wua osubu.»

²⁵ Ŋaa ma ntini ye bo akuri nde esia ma kabere nde ekasi, Poole dugi ŋa mfumu aworo wo kiigi kaŋaa ndi: «Be le saga bere mbuuru oRome omon ekasi eli be lekini mpama ŋi?»

²⁶ Ntini ye yugi mfumu aworo bwa, nde yi yieze komanda ndi: «We ema asaga kasa? Balaga li mbuuru oRome!»

²⁷ Ŋaa komanda yi bazaga Poole ŋa nde pizi nde ndi: «Duga mi, si syele we mbuuru oRome?» Poole yaligi: «Ee».

²⁸ Komanda dugi nde ndi: «Mi ncini ampara akukuna ma ka kiriga mbuuru oRome.» Poole kaali ndi: «Ŋa mi, mi osi kwa kaasa kula mi!»

²⁹ Kancinci ŋaa ba asagi bere nde ma kasa ni nde kalyele anyini nde. Ŋaa komanda kayaa ndi nde ma akura mbuuru aRome esia, Nde bagi obwogo.

Poole ka miizi ma Oju wo amfumu ba ankani baanini

³⁰ Komanda asaga kayaa lemigi le tiitii le akolo aZife Poole. Ŋaa enyuzuga, nde cyezi nde ma esia ŋa cwoli ampi ambwoŋi baanini ŋa Oju wo amfumu ba ankani baanini. Ŋa nde yi bila Poole ŋa legi ka miizi a bo.