Biblia Todo Logo
Bìoball air-loidhne

- Sanasan -

Esima 21 - Tege Kiwoyeti (teg) NT Portions


Poole aje Zerizaleme

1 Bizi lemana calaga bila bo, bizi leyeni ma vaari ma kaje tele ka Kose, anyuzuga bizi letoyi Rode, ŋa kaŋa bizi leyeni Patara.

2 Bizi lebagi vaari omon wo aje Fenisi, ŋa bizi leyagi nde ŋa leyeni.

3 Bizi letoyi tuga Cypre, eli lebuna mono ma vaari. Bizi leyiri ma kwogo ka okari ka kajeneŋe kia ma kaje kacu ka Syri. Bizi lesuniŋi kangundu ka Tire, ŋa kaŋa ni vaari kiigi acyeze biibi ba abiri.

4 Bizi letazigi alwoni ŋa bizi leki kaŋa oluna omon bila bo. Oduduma Santi yiezi, bo adugi ŋa Poole ma kabiza kaje Zerizaleme.

5 Ŋaa oluna kamana wa, bizi levi ma njila. Bo aso ayi yira bizi, bila akaazi a bo ŋa baana a bo, tii ngula kangundu. Bizi levi maabwu ma osieze lemere ŋa bizi lebwoni.

6 Ŋa lemana bizi le mpi abuga olasi ndi yiga kalakala, bizi lekumi nca vaari, ŋa ayaligi avurugi mpila bo.

7 Bizi lemani opinga wo bizi yila lemere ma kawa Tire ka Petolemayise. Bizi lemana ka biga adumu a bizi nca kangundu kia, bizi leki cugu lemon bila bo.

8 Anyuzuga, bizi levurugi ŋa bizi leto Sezare. Kaŋaa, bizi lenyuniŋi nca njo Filipe, mbuuru wo ampa mbari a Njyami ŋa bizi leki mpila nde. Nde kiigi buga lemon le nca abalaga ncaami ba aswoli ka Zerizaleme.

9 Nde kiigi ŋa baana ba akaazi ana ecuuma, bo akiigi mpa esizigi ba abagi ma Njyami.

10 Bizi kiigi kaŋa yiga ecugu ekukuna, ntini yo ankulu yia ntuma Njyami omon nkuumu Angabise kiigi waa Zide.

11 Nde yi bazaga bizi, nde yagi nkamba le Poole ŋa nde kuru ma miili bila njyala e nde-ankulu, ŋa nde dugi ndi: «Lemono ma alyele Oduduma Santi: balaga eli nkamba li le nde, lemono lemigi, ka Zerizaleme, aZife ba akura nde ŋa ba atege nde ŋa baari baali ka aZife ŋi.»

12 Ŋaa bizi leyuga bwa, bizi ankulu bila adumu baali ka Sezare lempi Poole akolokolo ma kabiza ka kuma Zerizaleme.

13 Ŋaa nde kaali ndi: «Meema be lelila ŋa be lesaga cala otuma mi? Mi, ma nkuumu a Mfumu Zezi, mi li tuga ma kanyina akura mi ŋa mi kpa ka Zerizaleme.»

14 Ŋaa mva bizi a be le ki buna kaliga nde ŋi, bizi a be le kivura sa mpiini ŋi, ŋa bizi a be le dugi ndi: «Ni Mfumu Zezi kasa mva e kuru nde!»

15 Ecugu eke emana yira ka biri yia, bizi Lekozi ŋa bizi le kumi Zerizaleme.

16 Alwoni ake a Sezare akiigi yila bizi; bo abiri bizi mpila mbuuru omon nkuumu Menazo, wo Cipre, nde kiigi olwoni emabiga.


Poole aje mono Zake

17 Ŋaa eto e bizi Zerizaleme, adumu ayagi bizi bila kase.

18 Anyuzuga, Poole yeni bila bizi mpila Zake eli ankwuru aso ba Okuga avunuŋi.

19 Poole bigi bo ŋa nde naani bo lemon ŋa lemon aso a Njyami makasi mpila baali ka aZife ŋi ma janja le nde.

20 Amana yuzuga nde, bo akiigi mpa Njyami lekuma. Amana bo ŋa Poole ndi: «We amono, dumu, kpe enkuumu ba amili e baari ba aZife ba amikiriga ayaligi. Ŋa aso ba alwono ngiri tele.

21 Ŋaa mono ma dugi bo yila we: we ayiziga aZife aso ba baaka ka akabikari a baari baali ka aZife ŋi ma kanyina ngiri a Moyize. We alyele bo ma kabiza sa baana cazi, ŋa ma kabiza lwono angiri ma aZife.

22 Lesa bunu? Bo ŋa ba aya ndi we mi ya.

23 Ee yemiŋi, sa ma alyele bizi we. Bizi kunu ŋa abalaga ana baama kana jaa kasa.

24 Yaga abalaga baa, je sa cinda le cece bila bo, mpa se ampara mini bo awuna mfu. Ŋaa baari aso aya amaami ma kiigi lyele bo yila we kiigi ka jaajaa ŋi. Bo aya se ni weankulu anyima ngiri a Moyize ye kalyele ndi lesa.

25 Ŋaa ma baali ka aZife ŋi amikiriga ayaligi, bizi le lyele bila bo ma okanda ma ancwumu ma akuru bizi: Bo abizi kaja anyama baabi ba baampa ambwoŋi ma eduduma. Abizi kaja nyama wooli ŋa togi, ŋa ma kabiza ja akabi ba anyama ba baapia akii, ma kabiza sa maami maabi ma baala.»

26 Ŋaa Poole yi ŋa abalaga baa ana ŋa enyuzuga nde baani bila bo kiza le cece. Ŋa nde yeni Njo Njyami ma kamvyere ma ntini maa ecugu ba cece kiigi ba ewa, ma kalyele ni ma ntini maa lebuna mpa ambwonŋi mbuuru ŋa mbuuru.


Poole akuari ka Njo Njyami

27 Ecugu e ncaami kiigi yiga beewa, ntini ye moni aZife ba bungu le Azi Poole nca lebugu le Njo Njyami. Bo asati lembuuru leso ŋa bo akuari Poole.

28 Bo ba kata nya ndi: «Baari a Ezerayele le yamba! Lemono balaga le lempa ebiri eso ŋa ma baari aso eyizigi beebi ma baari a Ezerayele, ŋa ma Ngiri ye Moyize ŋa ma Njo Njyami yi. Ŋa yiga, nde mi lege baali ka aZife ŋi nca biri le cece ŋa nde mi kaala yo ma biri le amaami maabi!»

29 Okorogo, aZife amoni Terofime wo Efeze bila Poole nca kangundu ŋa bo kiigi ba acimiŋa ndi Poole kiigi ma abira nde nca lebugu le Njo Njyami.

30 Ngimiŋa enyuniŋi nca kangundu kaso ŋa baari a Zerizaleme afi ma ebiri eso. Baari akwari Poole acuzigi nde nca lebugu le Njo Njyami kancinci ŋa bo abiidi edubugu.

31 Bo yiga ba asaga buma Poole, ntini ye ayi lyele komanda wo oju wo Arome ndi Zerizaleme eso ŋa ngimiŋa.

32 Kancinci ŋa, nde kuzugi amfumu bila aworo ŋa biri nciini maka je baraga lembuuru. Ŋaa baari amono komanda bila aworo, bo aki ma bere Poole ŋi.

33 Ŋaa komanda yi ciina mpaana nde, si nde ka kuara ŋa nde mpi ma kakura nde esia ba ankozo jwele. Ŋa nde pizi ndi: «Li balaga na? Nde ema kasa?»

34 Ŋaa nca lembuuru, ake baata nya ma jaa lemon, baamon baata ma lekima. Komanda kiigi buna yuga jaa le tele nca lesugu ŋi; nde tumi ndi alege Poole nca njo aworo.

35 Ŋaa Poole kato ka biri ye ba akuma yila etazi, aworo abiri nde ma nkeri ye lembuuru,

36 kabila aso ba ka lwono nde ma kata nya ndi: «Le buma!»


Poole acwula njuru a nde

37 Ma ntini eli baasa kanyunuŋa Poole nca njo aworo, nde dugi ŋa komanda ndi: « Mi ebuna kalyele we jaa lemon?» Komanda pizi nde ndi: «We yayi le Greke?

38 We ka balaga le Ezipite le lecyniŋa baari ma kajuana antini ma ayiri maa ŋi? Ŋa yeni nca ncege bila enkuumu ba amili e baari ena (4.000) ba ebeŋe?»

39 Poole kaali ndi: «Mi Zife, akuli ka Tarese nca bungu le Silisi, mi mbuuru wo kangundu kamon keenini. Nyina mi, Kolokolo we, mi lyele bila baari.»

40 Komanda tumi nde ma kalyele. Poole, ma otele yila biri ye ba akuma etazi, nde si njiimi ma kwogo. Ŋaa bo aso aki pi, ŋa nde dugi bo nca jui le Eberayike. Nde dugi bo ndi:

©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES

The Seed Company
Lean sinn:



Sanasan