Esima 20 - Tege Kiwoyeti (teg) NT Portions

Opinga o Poole ka Masedoyine ŋa ka Grese

¹ Ŋaa ngimiŋa ewaa, Poole kuzigi alwoni ŋa mpi bo kawasi. Amana, nde mpi bo olasi ndi yiga kalakala, ŋa yeni Masedoyine.

² Nde kayira nca bungu lia, kaŋaa, nde kawasa ayaligi ma kalyele kuna bila bo. Amana nde toyi Grese

³ osi angondo atari. Ma ntini ye ba ayaga vaari ma kaje Syri, nde yugi ndi aZife ba akura ncwumu ma kasa nde jaa leebi. Ŋaa nde kuru ma ya kavuruga Masedoyine.

⁴ Sopatere, mwana Pyribuse wo balaga, ka kangundu ka Bere, baakiigi yila nde, bila Arisetareke ŋa Sekunduse ba Tesalonike, Ngayiyuse wo Derebe, Timote, Ticike ŋa Terofime ba bungu le Azi.

⁵ Bo ayeni levuzu le bizi, ma kaje njila bizi ka Teroyase.

⁶ Ŋaa ma bizi, bizi lekumi nca vaari ka Filipe amana cugu le ampeebe mama abiza lwula, ŋa ecugu etaani eyira, bizi le toyi ŋa levuniŋi bila abuga a bizi ba opinga ka Teroyase. Bizi le ki ŋa oluna omon.

Poole ka Teroyase

⁷ Ma cugu le ncomi le oluna, bizi lekugi ma ka kaba lempeembe. Poole yagi mbari ka levuzu le adumu ba akiricye, ŋa nde kiigi aje enyuzuga, nde seligi wobi mbari a nde tii cugu oyili.

⁸ Kiigi ŋa bege le amunda nca katini kayulu kanca njo ka kiigi kuga bizi.

⁹ Ŋaa onkere balaga omon nkuumu Etyce kiigi manci kapaana kaliniŋi. Nde ci tolo leenini ma ntini ye kiigi lyele Poole kuna kuna, tolo lebiri nde vi ma ncie kaka kafi yila etasi ba etari e njo. Ŋaa ka le manyusa nde, nde kiigi ma kpa.

¹⁰ Ŋaa Poole surugi, kumuŋi yila nde, yagi nde nca njyala e nde, ŋa dugi ndi: «Lebiza kabaraga, nde kini mwon!»

¹¹ Amana Poole kumi, nde kabi lempeembe ŋa aji. Ŋa nde vuri wobi kuna tii eciri, ŋa nde yeni.

¹² Amana bwa, ayivuruga bila onkere balaga mwon yemiŋi, ŋa aso abagi kawasi.

Opinga o Teroyase ka Milete

¹³ Bizi leyeni levuzu ma ka kuma yila vaari ma kaje Asose ŋa kaŋaa, bizi leyagi Poole bila bizi. Okorogo, nde kiigi ma kura ncwumu ma kaje ma njila.

¹⁴ Poole yi bazaga bizi ka Asose, bizi leyagi nde yila vaari ŋa bizi leyeni Mitilene.

¹⁵ Kaŋaa, bizi levurugi ma vaari ŋa enyuzuga letoyi ka levuzu le kajeneŋe le okeri ka Ciyo. Cugu le elwoni, bizi letoyi Samose ŋa cugu amana ka Milete.

¹⁶ Okorogo, Poole kiigi ma akura ma ka yira ka levuzu le Efeze eli nde aka buna kasuga ma kavura ka eli tari leyira nca bungu le Azi ŋi. Nde seligi yiri waawaa ma kaka ka Zerizaleme ma cugu le Patekote, aka abuna.

Poole alyele ŋa ankwuru ba Efeze

¹⁷ Poole tumi osizigi omon ka Milete ŋa Efeze ma kasa kaya ankwuru ba Okuga.

¹⁸ Ŋaa bo aya katuga nde, nde ŋa bo ndi: «Be leyayi lemigi le kiigi mi bila be, ma antini aso kaasa baana mi cugu le ncomi le toyi mi nca bungu le Azi.

¹⁹ Mi janji ma Mfumu bila onyimi oso, nca ancia, ŋa nca mpasi, okorogo, aZife ake asagi mpa mi mpasi.

²⁰ Be leyayi ni mi kiigi empa be mbari a Njyami eli ki swogo be jaa se lemon ŋi, ma kayiziga be amaami aso mama yamba be, se ka levuzu le baari aso, se nca anjo a be.

²¹ Mi cwoli aZife ŋa anGereke ma kakala etuma ma Njyami ŋa ma kayalaga Mfumu a bizi a be Zezi.

²² Ŋa yiga mi eje Zerizaleme, mva Oduduma Santi dugi ni ave mi sa, ŋa mi ki ya ma ebaga mi kakwa ŋi.

²³ Mi yayi ni, nca kangundu ŋa kangundu, Oduduma Santi ma ayieze mi ndi esia ba ankozo bila ampasi ma ajila mi.

²⁴ Ŋaa omuon wo mi ki kalogo ka miizi a mi ŋi, ka eji mi, ma kaduma nciini tii kato mi ncuo, bila ma kamana janja le Mfumu Zezi le kalegi nca njiala e mi: kampa ncia yeemve ye puga le Njyami.

²⁵ «Mi yiri kanca paniŋi a be aso ma kampa omfumu o Njyami, ŋaa yiga mi yayi, se mbuuru omon aka ma mono mi ŋi.

²⁶ Ŋaa meema, mi elyele be lubu: mi cece ma togi le be aso.

²⁷ Okorogo mi dugi be aso a Njyami kiigi ma ka kuru, Mi ki swogo be kalogo ŋi.

²⁸ Lesa oyeri yemiŋi ma be-ankulu ŋa ma endombo eso eli Oduduma Santi ma ampa be ma kakyele. Mva okyele endombo, leselege Okuga a Njyami wo kabagi ma togi le mwana nde-ankulu.

²⁹ Mi yayi ni ka emana je mi, abalaga baali mva anyama ankeri ba anyunuŋa kanca paniŋi a be, ŋa bo ba ka baga nya ma endombo ŋi.

³⁰ Ŋa kanca paniŋi be-ankulu, baari ba asaraga ŋa ba alyele amaami ma alaa ma kajiima alwoni ngula bo.

³¹ Lesa oyeri ŋa be lebarigi ni ntini ye esibi etari, cugu bila lempiibi, mi kiigi mpa be adwo antini aso mbuuru omon ŋa omon nca be, se bila ancia.

³² «Ŋa yiga mi enyina be ŋa Njyami ŋa ma mbari e puga le nde. Nde ŋa mpari ma kasa be kayele nca lila ŋa ma kampa be kabaga eli nde ma akyele ma aso baali ba nde.

³³ Mi eka njya si ampara, si nore, si amfa a mbuuru ŋi.

³⁴ Be leyayi ma be ankulu ni mi janji ma njyala e mi ankulu ma kabaga omwon o mi ŋa omwon ba akiigi yira bila mi.

³⁵ Mi e mvyere be ma eso ave le janji bwa ma kaya yamba afuga, ŋa ma kabaraga ambari eli Mfumu Zezi nde-ankulu alyele: “Ŋaa kase kavuli kampa ka kayaga ŋi.”»

³⁶ Ma ntini ye Poole kamani ka lyele, nde vi maabwu ŋa nde bwoni bila bo aso.

³⁷ Ŋaa aso akiigi lila, ŋa ayi va kayila kii ye Poole ŋa apori nde.

³⁸ Bo kiigi avuli moni obi meema Poole kiigi lyele ndi bo baaka ma vura mono nde ŋi. Amana bo ayi yila nde tii vaari.