Esima 19 - Tege Kiwoyeti (teg) NT Portions

Poole ka Efeze

¹ Ntini ye kiigi Apolose ka Korete, Poole taaŋi angaala ma bungu le Azi, ŋa kato Efeze. Kaŋaa, nde taniŋi alwoni ake.

² Ŋa pizi bo ndi: «Be le ma abaga Oduduma Santi ntini ye be ka leyaligi?» Bo akaali ŋa nde ndi: «Ŋaa lekini yuga ba alyele ma Oduduma Santi ŋi.»

³ Poole pizi ŋa bo ndi: «Ŋaa ateemi ma ayaga be mani?» Bo akaali ŋa nde ndi: «Ateemi a Zan.»

⁴ Poole ŋa bo ndi: «Zan ampa ateemi ma baari ba ayaligi ni bo ba kaala eku, ŋa nde kalyele ŋa baari a Ezerayele ni ayalaga maami ma wo aje kayaa amana nde, ma kalyele ni Zezi.»

⁵ Bo amana yuga mbari yia, bo ayagi ateemi ma nkuumu a Mfumu Zezi.

⁶ Poole legi njiala yila bo, ŋa Oduduma Santi yi yila bo. Bo yiga ba alyele ajui akima, ŋa ampi amaami ma bagi bo ma Njyami.

⁷ Baari baa otali otoyi kwumu ŋa bwele.

⁸ Poole amono akama kaje njo ye aZife ye baabwono, ŋa tii angondo atari, nde yagi mbari bila tari. Nde amono alyele ma omfumu o Njyami bila nde kasa mpana ma buni ba bayuzuga nde ayalaga.

⁹ Ŋaa kuna ba kasa ocu onono, njala kayalaga kali, ŋa bo ba kasebe Njila Mfumu ka miizi a baari ba maakuga. Ŋaa Poole cyegi kaŋaa, kato ma kaje biri alwoni, ŋa cugu ŋa cugu nde kalyele bila bo kanca lekooli le mbuuru wo acwoli ma Tyranise.

¹⁰ Yo ebigi esibi jwele, eli yiga ba akiigi kanca bungu le Azi, aZife bila anGereke yiga ayugi mbari a Mfumu.

Baana ba abalaga a Seva

¹¹ Njyami kasa ampiri alwari kangula Poole.

¹² Ŋaa bwa se kaayi bila abyeri amfa ŋa eswari beekiigi ciila njuru a nde, bo aso angaayi afi ŋa epundu beebi ba kacyege ma bo.

¹³ AZife ake ba akiigi taaŋa angaala ma kacuta epundi beebi, ayaligi se ma kayaga nkuumu a Zezi yila ba akiigi ŋa epundu beebi. Bo adugi ndi: «Mi elyele be ma kacuga ma nkuumu e Zezi wu ni Poole ampa mbari!»

¹⁴ Yia lemigi leekiigi sa baana ba abalaga ancaami ba ompi ambwoŋi woonini Zife, nkuumu Seva.

¹⁵ Ŋaa cugu lemon kapundu keebi ka kaali ŋa bo ndi: «Mi njaayi Zezi, ŋa Poole, ŋaa be, be bana?»

¹⁶ Ŋaa balaga le ngaa kapundu keebi leyiva yila bo, ŋa vuli bo aso mpari, nde bumi bo lwuba levuli bwa. Kaba amaduma njo nde yiga otaba ŋaa njuru eso yiga ampura atu.

¹⁷ Baari ba Efeze, aZife bila anGereke, ayugi jaa yia, aso abagi bwogo ŋa bo yiga ba anyima nkuumu a Mfumu Zezi.

¹⁸ Bege le baari eli yiga ayaligi ba ka ya siiŋa ankinkeri maami maabi ma si bo.

¹⁹ Kuna le baari ba apazi oti ba mazi ayi bila abuku, ŋa bo acugi mon ka miizi a baari aso. Bo alegi otali ma abuku ŋa abagi enkuumu ba amile ataani (50.000) ma ampara.

²⁰ Bwa ma mbari a Mfumu, ye kaselege kayele nca mpari nde.

Ngimiŋa ka Efeze

²¹ Amana maami maa, Poole kani kabwula Masedoyine bila Akayi ma kaje le Zerizaleme. Nde kalyele ndi: «Mi emana kwa, ave mi se mi moni Arome.»

²² Ŋaa nde tumi abuga a nde ba sala bwele ka Masedoyine, Timote bila Erasete, ŋaa nde-ankulu baani siili ntini mon nca bungu le Azi.

²³ Ma ntini yia nguza yeenini evi ka Efeze ma Njila Njyami.

²⁴ Okorogo kiigi ŋa balaga lemon nkuumu Demeteriyuse nde asa elogo ma ampara. Nde kiigi bwo se anjo ma akyeŋe maali mva njo ye baabwono okaazi wooli ŋa ove mva ngondo wo ba acwolo ma Aretemise. Ŋa ma janja lia nde kampa abwoyi ba wura leeve.

²⁵ Nde kuzugi ajanji baa, ŋa baakiigi ŋa janja mva le bo lia, ŋa nde ŋa bo ndi: «Ba da, be leyaayi ni bizi a be mpari ŋa ma janja li.

²⁶ Ŋaa be ŋa lemono sikali leyuga ka alyele jaa le leyira li, Poole wu alyele ndi, anjyami baasi abalaga ka anjyami ŋi, ŋa nde maasa kuna le baari kayalaga ka baali ka Efeze otu ŋi, ŋaa nca katini ka bungu leso le Azi.

²⁷ Jaa lia lebuna biiza nkuumu a janja le bizi a be. Ŋaa lo se lebuna biiza njo ye lebwono okaazi woonini wooli ŋa owali mva ngondo Aretemise; ŋaa ba apiina onkani ba okaazi wooli ŋa ove eli lebwono ebiri eso nca bungu le Azi ŋa nca okiri!»

²⁸ Ŋaa bo baakiigi yuzuga bwa, bo abiri nkeri yeenini, ŋa yiga baata nya ndi: «Onini kamaka Aretemise wo Efezi!»

²⁹ Ngimiŋa yia eyeni nca kangundu kaso. Baari baakiigi bira bila bo Ngayuse ŋa Arisetareke, aMasedoyine bwele baakiigi abuga ba opinga a Poole, ŋa ba kaje ma njiimi ma kasa esima ma nciini.

³⁰ Poole sagi kacwuga ka miizi ma lembuuru, ŋaa alwoni aligi nde ma kasa.

³¹ Ake baakiigi ajanji baanini ka bungu le Azi, baakiigi andigi a nde, atumi nde esizigi ma kampa nde akolokolo ni kabiza kaje biri ye baasa esima.

³² Ŋaa ma ntini yia baari ba maakuga aso kiigi yiga nca kaduma, ake bakata nya ma jaa lemon, baamon bakata nya ma lekima, ŋa kuna kanca bo akiyaa se jaa levunuŋa bo ŋi.

³³ Baari ake nca lembuuru ba kanaana jaa lia ŋa balaga lemon le nkuumu Alesandre eli aZife akiigi ciniŋa ka levuzu. Ŋa Alesandre si njiimi ma kwogo: nde ŋani yaga mbari ma kalyele lemigi le jaa ka miizi ma lembuuru.

³⁴ Ŋaa baari amayaa ndi nde Zife, bo aso ati nya ndi ma oju wo ambila amon, ŋa bwa ntini esi atari mwele: «Onini kamaka Aretemise wo Efezi!»

³⁵ Okorogo ojanji mfumu wo kangundu buni kasa lembuuru kawuuma ŋa nde dugi ndi: «Asi Efeze, baari aso ayaayi ni kangundu ka Efeze ŋa akyele njo ye baabwono Aretemise woonini bila kaduduma ka nde ka keewa yulu.

³⁶ Mbwuru wo atuna nde kali, ŋa ave be leswuzi etuma ŋa lebiza maami ma esisi kasa.

³⁷ Be le maaya bila abalaga baa ka kunu, eli bo aka asa jaa leebi ma njo ye baabwono ŋi, ŋa bo aki tuga okaazi a bizi a be wo ove mva ngondo ŋi.

³⁸ Aka Demeteriyuse bila abuga a nde asala ŋa jaa le ka kata bo mbuuru, ŋaa ebiri baba apama bila ankani. Mono kacu ka aje sa bo ososo!

³⁹ Aka be ŋa jaa lekima le kalyele, le selege lo nca okuga ma kalwono ngiri a bizi a be.

⁴⁰ Okorogo aya akati bizi a be ma angaa eco onono ma jaa le leyiri lubu. Jaa lekima le lempa bizi a be mpieme ni levunuŋa kali.» Amana mbari yia, nde cali ba amaakuga.