Esima 17 - Tege Kiwoyeti (teg) NT Portions

Poole ŋa Silase ka Tesalonike

¹ Bo ayiri ma le Afipolise bila Apoloni ŋa atoyi Tesalonike eli aZife kiigi ŋa njo ye baabwono.

² Mva ka ebaana sa nde, Poole yeni ecugu ba baawuuma etari, bo asi lebila ma eteendi bila baari baakiigi kaŋaa.

³ Nde dugi bo lo ŋa mvyeri ndi, ma eteendi bwa, Masiya kiigi amono mpasi ŋa akpa, ŋa nde anyuzuga nca baari baakpakpa. Nde alyele bo ndi: «Zezi wu ni mi elyele be, ŋa nde Masiya.»

⁴ Ake nca aZife ayaligi ŋa bazagi Poole bila Silase, bege le anGereke baakiigi bwono Njyami, asi bwa bila bege le akaazi akaazi.

⁵ Ŋaa aZife baamon asi mfunuŋa mwon yomini. Bo akuzigi ye bi baari ba oca ba amoni nca ewombo, alegi nguza ka mpaniŋi a lembuuru bila nca kangundu. Bo ayi nyunuŋa nca njo Zaso ma kaya kasaga Poole bila Silase ma kaswuza bo ka miizi a baari.

⁶ Bo amabiza bo kamono, bo ajiimi Zaso bila ye bibuga ake ba adumu akima ka miizi ma ankani ba kangundu, ŋa bo yiga baata esarigi ndi: «Abalaga ba alegi ngimiŋa ma okiri oso, ŋa bo yiga ami ya kunu!

⁷ Ŋaa Zaso mbuuru wo yamba bo ka njo nde. Baari ba aso kasa maami ma eli mfumu kasi aRome woonini, Sezar ma aliga mon. Ayuga bo ba adugi ŋa mfumu kasi aRome okima, Zezi.»

⁸ Ambari maa aciili lembuuru bila ankani.

⁹ Ma kacuzuga, Zaso bila abuga ave bo kiigi abaani wuri ovuna mpila ankani.

Poole ŋa Silase ka Bere

¹⁰ Eto lempiibi adumu asi kaje Poole bila Silase ka Bere. Bo ato, bo ayeni njo aZife ye baabwono.

¹¹ A Bere ba se kiigi avuli kayamba abuga ma aZife ba Tesalonike. Bo ayaligi mbari a Njyami bila njya leenini. Cugu ŋa cugu, bo ba kaselege kese mbari a Njyami ma kamono aka maami ma alyele Poole tele.

¹² Kuna le baari nca bo ayaligi, ŋa nca anGereke ŋa akaazi ba etomi bila abalaga ba akukuna ayaligi se.

¹³ Ŋaa aZife a Tesalonike ama yuga bwa ndi Poole ampa mbari a Njyami ka Bere se, bo ayi kwa se ŋa asi ngimiŋa, ŋa alegi lembuuru oncinciezi.

¹⁴ Adumu ba se amono bwa kancinci ŋaa atumi Poole ma kaje kacu ka lemere, ŋaa Silase bila Timote asiili ka Bere.

¹⁵ Ba abiri Poole ayeni bila nde tii Atene. Ŋaa bo avurigi Bere bila maami ma Poole ma kadugi bo ma Silase bila Timote. Nde ŋa bo ndi, leje baga bo ŋa asisari.

Poole ka Atene

¹⁶ Ntini ye kiigi njila Poole, Silase ŋa Timote ka Atene, otuma nde kiigi ma abya, ma nde wo moni kangundu kiigi ka maalwula ma eduduma.

¹⁷ Ŋaa nde kalyele nca njo aZife ye baabwono bila aZife ŋa baali ka Zife ŋi eli baabwono Njyami, ŋa yila biri ye akuga baari, cugu ŋa cugu, bila baari eli nde abuna kavunuŋa.

¹⁸ Ŋaa angaa oyeri ake ba akiigi Epikuri ŋa aSetoyisi amono ba alyele bila nde. Ake apizi ndi: «Ngaa lesugu wu ema kalyele?» Baamon adugi ndi: «Nde mva mbuuru wo alyele ma anjyami ba anjya». Okorogo, Poole ampa ncia yeemve ye Zezi. Nde se alyele ndi baari baakpakpa baanyuzuga.

¹⁹ Ŋaa bo ayagi nde, ŋaa bo ayeni bila nde ka miizi ma ankani ba Areyopaje adugi ndi: «We abuna kalyele bizi maami ma anyarigi ma ayiziga we ma?

²⁰ Kabila maami ma alyele we bizi le kayuga mon ma ancu a bizi ŋi. Ŋa bizi le saga ya mon ema ma alyele.»

²¹ Okorogo, baari ba Atene aso bila anjya ba kangundu kia kiigi e bo eyiila kaka ma kalyele bila ma kayuga amaami ma anyarigi.

²² Poole temiŋi ma otele ka levuzu ma Areyopaje, ŋa dugi ndi: «Ateni, mi emono ni be baari ba lesaga kaya amaami ma anjyami.

²³ Ntini ye elwoni mi kangundu ka be, ŋa mi kesi biibi ba ncui be ma kabwono anjyami a be. Mi moni se ncaga bila eteendi bi: “Ŋa njyami eli ki ya ŋi.” Wo abwono be eli be le ki ya nde ŋi, ŋaa mi aya lyele be.

²⁴ Njyami wo owangi okiri oso bila beeli yila nde, kamaka Mfumu wo yulu bila ncie, nde akaka nca anjo ma ancua baari ŋi.

²⁵ Nde kaama ni baari ayamaŋa nde kali, kabila nde kalogo kaka kami kali. Nde mbuuru wo ampa baari omuon, owuru ŋa biibi eso beemon.

²⁶ Ma mbuuru omuon omon nde yiri ma kawanga ajui a baari aso ayila ncie eso. Ka ebaana kawanga nde tali antini a bo, ŋa nde yezigi endili ma ebiri beeka bo.

²⁷ Nde si bwa ndi, baari asaga nde, ŋa bo yiga asemi bo alaba njyala bo abazigi nde. Okorogo, nde ki laa ŋa mbuuru ŋa mbuuru ŋi.

²⁸ Kabila: “Ma nde bizi a be leli mwon, lenyiga ŋa leeli.” Mva ka elyeli ba ba ayuma ake adugi lo ndi: “Bizi a be se baana.”»

²⁹ Ŋaa bizi a be ampabigi a nde, bizi a be ki buna cimiŋa ni Njyami ma awuana kaduduma ka nore, ka ampara sikali kele, le baari kiigi le amabwo, ma si bo ma ecimiŋi bo.

³⁰ Ŋaa Njyami akama tala antini sikali abalaga ba abizi kaya nde. Ŋaa yiga, nde alyele ŋa baari oso baali ma ebiri eso ma ka kaala eku.

³¹ Nde ma aswolo cugu lemon ma kampama okiri oso bila opami. Nde ma aswolo balaga lemon ma bwa. Ŋa nde ma amvyere yemiŋi ma baari aso ni jaa li jaajaa ma nde wo ma anyusa balaga li ma leku.

³² Ŋaa bo ama ayuga kalyele Poole ma enyuzugi e baari baakpakpa, ake asebi nde, ŋa baamon adugi ndi: «Bizi le yuga mbari we yia cugu lekima.»

³³ Ma bwa Poole ciegi nca bo.

³⁴ Ŋaa baari ake abazigi nde ŋa bo ayaligi. Kanca paniŋi a bo, ŋa Denise, wo oju wo Areyopaje, ŋa okaazi omon nkuumu Damarise, ŋa akima bila bo.