Esima 15 - Tege Kiwoyeti (teg) NT Portions

Okuga ka Zerizaleme

¹ Abalaga ake asurugi ka Zide ma Antiyoce, akiigi yiziga adumu ndi: «Be le bira sa cazi mva kaalyele aNgiri a Moyize, be le ka buna vuuga ŋi.»

² Poole ŋa Barenabase aki yalaga eyizigi bia ŋi. Ŋa bo abagi lebila leenini bila abalaga baa. Ŋaa akuri ncwumu ma kaswolo Poole bila Barenabase ŋa abuga ba ayaligi ba Antiyoce ma kaje Zerizaleme ma kalyele ma jaa lia bila antuma ŋa ankwuru.

³ Ŋaa baari ba Okuga ka Antiyoce ampi bo biibi ma ojya o bo. Mva bo ba ayiri ma bungu le Fenisi ŋa Samari, bo ba ka alyele lemigi le baali ka aZife ŋi ka ayaligi njila Kirisite. Ncia yia empi kase keenini ma adumu aso.

⁴ Ŋaa bo ato Zerizaleme, ayaligi, ŋa antuma bila ankwuru ŋa baari aso ba Okuga ayaligi bo mpila bo. Ŋaa bo adugi bo amaami aso ma si Njyami ma bo.

⁵ Ŋaa aZife ake ba oju wo aFarizi ba ama ayalaga Zezi atemiŋi, bo ba alyele ndi: «Ayaligi baali ka aZife ŋi ave asi cazi, ŋa bo anyimi Ngiri a Moyize.»

⁶ Antuma bila ankwuru avunuŋi kapaana ojugu wua.

⁷ Bo amana lebila leenini, Pyere yagi mbari ndi: «Ee, adumu a mi, mva be ka le yayi ni Njyami swoli mi nca mpanaŋa be kiigi ema abiga, ma kampa mbari a nde ma baali ka aZife ŋi, ma buni bo ayuga ŋa bo yiga aka ayaligi.

⁸ Ŋa Njyami wo yayi etuma e baari, nde amvyere ndi nde ayalaga ma kampa bo Oduduma Santi mva bizi a be.

⁹ Njyami ki lyele ndi mi bizi a bo sikali bizi a be ŋi, kabila ma lila nde cuki etuma e bo.

¹⁰ Ŋaa be mi ema lencoŋo Njyami? Be lesaga lege kayila esamaŋa ba alwoni olemi ba ankaaga a bizi a be ba a bizi kabira, se bizi le kibuna ŋi!

¹¹ Okorogo ma puga le Mfumu Zezi, bizi a be le yaligi kavuzuga, ma lemigi loankulu lia mva bo.»

¹² Ŋaa lembuuru leso le kipi, ŋa leyugi Barenabase ŋa Poole baalyele ma anjiimi bila ampiri maasi Njyami ma bo mpila baali ka aZife ŋi.

¹³ Ŋaa bo amana kalyele, Zake yagi mbari wobi ndi: «Adumu a mi, leyuga mi!

¹⁴ Simon alyele lemigi, ka ebaani, Njyami kuri ma kaswolo nca esi baari ba ba abira nkuumu a nde.

¹⁵ Ŋa mbari antuma Njyami ba akuri ami sa yo, mva nde ka ateendi ndi:

¹⁶ “Amana ŋaa, mi eya vuruga, Mfumu dugi, ma kavura ncua njo ye Davide ye caligi, mi evuruga kozo njo nde ye encaligi, ŋa mi yiga elege yo eka ma otele.

¹⁷ Ŋaa baari amuon aso yiga asaga Mfumu, Ee, esi eso ba ecwoli mi eka e mi. Bia elyeli e Mfumu,

¹⁸ ŋa nde si kaya maami ma, antini kiigi ami biga.”»

¹⁹ Zake ovuru dugi ndi: «Ma bwa mi ecimiŋa ni, lebizi ka ma bwo amaami ampasi ma baali ka aZife ŋi ba ami kalaga mpila Njyami.

²⁰ Ŋaa le teende ma bo, bo abiza kaja anyama baabi ba baampa ambwoŋi ma eduduma, ma kabiza sa maami maabi ma baala, ŋa ma kabiza ja akabi ba anyama ba baapia akii, ŋi togi.

²¹ Kabila ma antini akala, baari ba kalyele ma Ngiri a Moyize nca kangundu ŋa kangundu, ŋa ba alira yo nca anjo ba aZife ma ntini le cugu ŋa cugu le ba awuuma.»

Kasangumu ka atumi ma ayaligi baali ka aZife ŋi

²² Ŋaa antuma ŋa ankwuru, bila Okuga oso akuri ma kaswolo baamon kanca bo ŋa ma katuma Antiyoce bila Poole ŋa Barenabase. Bo aswoli Zide wo ba acwolo ma Baresabase ŋa Silase, abalaga bwele ba baanyima kanca adumu.

²³ Bo ampi bo kasangumu kia: «Adumu a be, antuma ŋa ankwuru, atumi ŋa adumu baali ka aZife ŋi ba baaka ka Antiyoce, ka Syri ŋa ka Silisi, be lema anyuzuga!

²⁴ Bizi leyugi ndi baari ake ba afi mpila bizi a be, bo ami kaala etuma e be ŋa ecimiŋi ma ewobi e bo. Ŋaa bizi a be leki lyele bo ma kasa ŋi.

²⁵ Ma bwa bizi lekuru ojugu omon ma kaswolo abalaga ŋa ma katuma bo mpila be. Bo ayila andigi a bizi ajia, Barenabase ŋa Poole,

²⁶ bo baama mpa omuon o bo ma janja le Mfumu Zezi Kirisite.

²⁷ Ŋaa bizi le tuma be Zide ŋa Silase ma kaya lyele be jaa le bizi ankulu le eteendi kunu.

²⁸ Okorogo, Oduduma Santi ŋa bizi ankulu lekuru ojugu ma kabiza mpa be olemi okima, kangula angiri maa eli leki buna lyele ni leki ya ŋi:

²⁹ Be lebizi kaja anyama baabi ba baampa ambwoŋi ma eduduma. Lebizi kanyua togi, ŋa ma kabiza ja akabi ba anyama ba baapia akii, ma kabiza sa maami maabi ma baala. Ŋaa be le nyima maami ma aso ŋaa be lesi yemiŋi. Bizi lempa be obigi wo abaana ba angwugu.»

³⁰ Bo aciegi ŋaa asurigi Antiyoce. Bo asi kavunuŋa ayaligi ŋa ma kampa bo kasangumu.

³¹ Bo aliri kasangumu, ŋa bo abagi kase kayila kasangumu kabila mbari yia empi bo kawasi.

³² Zide ŋa Silase, bo-ankulu kiigi antuma Njyami, ba kalyele kuna ŋa bo ampi adumu kawasi ŋa mpari nca lila.

³³ Ma ntini mon adumu asi bo kavuruga bila kadusu mpila ba atumi bo. [

³⁴ Ŋaa Silase siili ka Antiyoce, ŋaa Zide nyunuŋi Zerizaleme nde otu.]

³⁵ Ŋaa Poole ŋa Barenabase bo aki ka Antiyoce. Bila abuga kuna, bo ba ayiziga ŋa ma kampa mbari a Mfumu.

Poole ŋa Barenabase abayi anjila

³⁶ Ecugu eke ba eyiri Poole dugi ma Barenabase ndi: «Le vuruga kakye adumu kanca engundu eso ba lempi mbari a Mfumu, ma kamono mva keeli bo.»

³⁷ Barenabase kiigi kuri ojugu ma kabira bila nde Zan wo ba acwolo ma Mareke,

³⁸ ŋaa Poole kimono ove ma kaya bila bo mbuuru wooli ma amana ciege ka kiigi bo ka Pamfili eli nde kiyila bo nca janja ŋi.

³⁹ Bo abagi otogi kanca panaŋi a bo, ŋaa bo abaayi anjila. Barenabase yagi Mareke bila nde akumi nca vaari ma Cypre.

⁴⁰ Poole, ma kacu ka nde, swoli Silase ŋa yeni. Adumu atumi bo bila puga le Mfumu.

⁴¹ Bo ayiri ma bungu le Syri ŋa Silisi ma kampa Ekuga mpari.