Esima 14 - Tege Kiwoyeti (teg) NT Portions

Poole ŋa Baranabase ka Ikoniyume

¹ Ka Ikoniyume, Poole ŋa Barenabase anyunuŋi nca njo aZife ye baabwono se, ŋa ba kalyele mbari a Njyami. Lembuuru leenini le aZife ŋa anGereke akirigi ayaligi.

² Ŋaa aZife ake abizi kayalaga. Mva bwa, bo acyezi baali ka aZife ŋi ma ka cimiŋa maami maabi ma adumu.

³ Okorogo Poole bila Barenabase aki ecugu ekukuna ka Ikoniyume. Bo ba alyele bila ŋa lila ma Mfumu. Mfumu mpi bo otori ma kasa ajiimi bila ampiri alwari ma kamvyere ndi mbari nde ye kalyele yila puga jaajaa.

⁴ Nca kangundu, kuna le baari le ka ya: ake kiigi bila aZife baamon bila antuma.

⁵ AZife bila baali ka aZife ŋi, ŋa amfumu a bo, akuru ncwumu ma kampa bo mpasi ŋa ma kacuna le bo akele.

⁶ Ŋaa bo ba abwele ayuga bwa, ayeni engundu ekima ba baacwolo ma Likayoni, Lisetere, bila Derebe ŋa nca atiniŋa angulu.

⁷ Kaŋaa se, bo awobi Ncya Yeemve.

Poole ŋa Baranabase ka Lisetere

⁸ Ka Lisetere kiigi ŋa balaga lemon kaleme kaasa kula, nde kiigi ki temeŋe ŋi.

⁹ Nde se ka kayuga Poole ka kalyele. Ŋaa Poole ka kese nde, moni ndi nde ŋa lila ma kawuuma.

¹⁰ Ŋaa wobi bila nde ma akikala ndi: «Temeŋe, ka ma otele!» Balaga lia se temiŋi ŋa asisari ŋa yiga aje.

¹¹ Ŋaa lembuuru lemono esi baasi Poole, bo ati nya ma jui le Likayoni ndi: «Anjyami ama awuana baari, ŋa bo ami suruga mpila bizi a be!»

¹² Bo acwoli Barenabase ma «Zeyuse», ŋa Poole «Eremese», ma buni nde kiigi owobi mbari.

¹³ Ka enyunuŋi ba kangundu, kiigi ŋa njo ye njyami Zeyuse. Ompi ambwoŋi wo njo yia, yi ŋa anzayi bila ecazi ba eba kavuzu ba edubugu ba kangundu. Nde se jii mini lembuuru lempa Barenabase ŋa ma Poole ambwoŋi.

¹⁴ Ŋaa antuma aso abwele ayuga bwa apazi amfa a bo, ŋaa bo asaniŋi je nca lembuuru ma kata nya ndi:

¹⁵ «Abuga mi, be meema lesa bwa? Bizi se ni baari mva be, ŋaa bizi lempa be Ncya Yeemve, ma buni be le nyina eduduma ba oca, ŋaa be le kalaga mpila Njyami omwon wo wanga yulu bila ncie, lemere ŋa biibi eso beeli.

¹⁶ Antini ma yiri, nde nyini esi eso enami anjila a bo mankulu.

¹⁷ Ŋaa kabila nde kiigi mvyere jia le nde. Okorogo nde tumi be amvula afi yulu ŋa biila beemve ma ntini ajo. Nde mpi be eja ŋaa nde lusi etuma e be ma kase.»

¹⁸ Se bo ba alyele bwa, Poole ŋa Barenabase amoni mpasi ma kaliga lembuuru ma kampa ambwoŋi.

¹⁹ Azife ato Antiyoce a Pisidi ŋa Ikoniyume bo abagi etuma ba lembuuru. Ŋaa bo acuni akele ma Poole ŋa ma kajiima nde kangula kangundu, ŋa bo acimiŋi ndi nde ma akpaa.

²⁰ Ŋaa ntini ye alwoni ajeneŋe nde, nde temiŋi nyunuŋi nca kangundu. Anyuzuga nde yeni bila Barenabase ka Derebe.

Eyivuruga Antiyoce ma Syri

²¹ Amana mpa ncia yeemve nca kangundu ka Derebe, baari akukuna akirigi alwoni. Poole bila Barenabase avurugi Lisetre ka Ikoniyume ŋa Antiyoce ma Pisidi.

²² Bo ba kampa alwoni mpari bila ŋa kawasi ma kakiele lila, ŋa ma kalyele ndi: «Ave bizi a be lemoni mpasi yeenini ma kanyunuŋa nca omfumu Njyami.»

²³ Poole bila Barenabase ba kaswolo ankwuru nca Okuga ŋa Okuga. Amana ka njala bila kabwono, bo ampi bo ma Mfumu wo bo wo ayaligi.

²⁴ Bo ayiri bungu le Pisidi ŋa ayi bungu le Pamfili.

²⁵ Amana mpa mbari a Njyami ka Pereje, asurugi Atari.

²⁶ Kaŋaa, bo anyunuŋi nca vaari ma kaje Antiyoce ma Syri, kangundu keeli kiigi ampi bo puga le Njyami ma janja, yiga le emani bo.

²⁷ Bo ato Antiyoce, bo akuzugi Okuga ma kalyele bo amaami aso ma si Njyami ma bo, ŋa ma kalyele bo lemigi le naani nde baali ka aZife ŋi kadubugu ka lila.

²⁸ Poole bila Barenabase aselegi bigi bila alwoni ba Antiyoce.