Esima 12 - Tege Kiwoyeti (teg) NT Portions

Zake ami buma, ŋa Pyere ami kwara

¹ Ma ntini yoankulu yia, mfumu Erode Angripa o ncomi legi kwogo yila baari ake ba Okuga ma kampa bo mpasi.

² Nde si kabuma Zake ndumu a Zan ma opara wo aworo.

³ Ŋaa nde moni ndi aZife a kiigi mono ove ma maasi nde, nde si se ka kuara Pyere, ma cugu le cinda le anganga ma maalwula ampeembe.

⁴ Amana kuara nde ŋa akangi ma ongeneŋe, Erode tumi ŋa eju ba aworo ena ŋa aworo ana ma kakyele nde. Nde asaga pama Pyere ka miizi a baari amana cinda le Pake.

⁵ Ŋaa Pyere kiigi yiga ama akyele nca ongeneŋe, ŋaa baari ba Okuga ba kaselege bwono Njyami ma nde.

Ntuma-yulu omon vuzugi Pyere

⁶ Nca lempiibi, Erode asaga sa kampama Pyere ka miizi a baari, Pyere kiigi ma aca tolo ka kabakari ba aworo bwele. Amaakura bila esia ba ankozo mwele. Kiigi se ŋa aworo kavuzu ba kadubugu ka ongeneŋe bo yiga ba akyele nde.

⁷ Parabu ŋaa, ntuma-Mfumu omon yi ncwuga nca biri eli Pyere nca kari ongeneŋe, kafii kamon kacwugi nca biri yia. Ntuma-yulu nyusu Pyere ŋa tiili nde ma le baayi. Nde dugi nde ndi: «Temeŋe ŋa asisari!» Esya ba ankozo ecyegi ma njiala e nde.

⁸ Ŋa ntuma-yulu dugi nde: «Lege nkaba le we, nkura akorogo a we.» Pyere si mva ntuma-yulu ka kadugi nde. Ntuma-yulu se dugi ndi: «Lege mfa yeela e we lwono mi.»

⁹ Pyere lwono nde, cwugi ma ongeneŋe tii nji. Ŋaa nde ki ya ndi se kalogo ka esa ntuma-yulu ki syele ŋi, nde kamono ndi lworo.

¹⁰ Bo ayiri ma oju wo ncomi wo aworo, amana wo yuele. Ŋa bo atoyi kadubugu ka ankozo ka ongeneŋe ka keecwuga nca kangundu. Kadubugu ka enyani komoankulu ma bo. Ŋa bo acwugi ma ongeneŋe, bo ayeni nca owonbo wo aje kacu ka kangundu. Kancinci ŋaa, ntuma-yulu nyini Pyere.

¹¹ Ŋaa Pyere yi vuruga nca ecimiŋi e nde: «Yiga mi yayi ni jaajaa Mfumu ma atuma ntuma-yulu, ma kavuzuga mi ma njiala ba Erode ŋa maami maabi ma si saga baari ba aZife ma mi kasa.»

¹² Ŋa nde kamana yuga maami maasi ma, nde yeni njo Mariya, ngwugu a Zan wo ba acwolo ma Mareke. Kaŋaa, bege le ayaligi ama akuga ma kabwono.

¹³ Pyere beeri ka kadubugu ka baanyunuŋa, ŋa onjanji omon wo okaazi, wo nkuumu Rode yi ciina ma kayuga.

¹⁴ Ŋaa Rode yugi ndi jui lia le Pyere, Nde moni kase keenini, nde ki ma cimiŋa ma kanyana kadubugu ŋi. Ŋaa nde biri nciini ma kacu ka abuga ma kaje lyele ndi: «Pyere e yu ka onyua kadubugu!»

¹⁵ Abuga akaali ŋa nde ndi: «We ŋa lari!» Ŋaa nde seligi dugi ndi: «Nde e yu, ŋaa syele!» Bo adugi ndi: «Ŋaa ntuma nde.»

¹⁶ Okorogo Pyere aselege kabere. Bo anaana kadubugu, ka emoni e bo nde, bo aselegi bagi akimi.

¹⁷ Nde si bo kaliimi ma kwogo ni bo aka pi, ŋa nde samigi bo lemigi le cuzugi Mfumu nde ma ongeneŋe. Nde dugi bo: «Lelyele ma aso ŋa Zake ŋa adumu baamon.» Amana nde cwugi, nde yeni biri lekima.

¹⁸ Ŋaa vuzu oca, aworo nca ongeneŋe kiigi ŋa ngimiŋa. Bo akiigi piza Pyere ŋa kunu kaka.

¹⁹ Erode tumi ma kasaga nde ebiri eso, ŋaa bo akimono nde ŋi. Ŋaa nde pizi ma aworo ba akiigi kyele Pyere, ŋa nde tumi ma kabuma bo. Amana, Erode cyegi kasi ka Zude nde yeni kangundu ka Sezare, ŋa yiga kaka kua ma ntini mon.

Leku le mfumu Erode Angripa o ncomi

²⁰ Erode kiigi ma abira nkeri ma baari a Tire ŋa ba Sidone. Ŋaa bo akuri ojugu omon ma kaya bazaga nde. Bo akiigi lyele bila Balasetise ma kayamba bo, nde wo kiigi kyele biibi e mfumu. Bo apizi Erode aka bo baabuna sa kadusu, okorogo, biila ba Tire ŋa Sidon kaya ma kasi ka Erode.

²¹ Cugu leto, Erode legi mfa nde ye omfumu, kiigi yiga manci kayila mbara nde, ŋa yagi mbari wobi ka miizi a baari aso.

²² Baari atii jui: «Nde ŋa njyami omon alyele ŋa ki mbuuru ŋi!»

²³ Ŋaa ma ntini yoankulu yia, ntuma-Mfumu omon beeri Erode, ma buni nde ki mpa lekuma ma Njyami ŋi. Ŋa nde kpi ma ebiga ba eji nde.

²⁴ Ŋaa mbari a Njyami ye selege lusa.

²⁵ Barenabase bila Soole amana janja le bo ka Zerizaleme, avurugi ŋa abiri bila bo Zan wo baacwolo ma Mareke.