Esima 11 - Tege Kiwoyeti (teg) NT Portions

Pyere alyele ma ayiri ka Zerizaleme

¹ Antuma bila adumu baakiigi ka, ka Zude ayugi ndi baari baali ka aZife ŋi bo se ami yalaga mbari a Njyami.

² Ka eyivuruga e Pyere Zerizaleme, ayaligi baali aZife ba katiga nde,

³ ndi: «We mi je mpila baari baali ka aZife ŋi ŋa we mi ja bila bo!»

⁴ Ŋaa Pyere ka ka alyele bo lemigi leyiri maami ma.

⁵ Ndi: «Mi kiigi nca kangundu ka baacwolo ma Zafa ŋa mi kabwono, ŋaa mi bagi lworo. Ŋa mi moni kalogo kamon kayi mpila mi mva kalembe keenini ama akwara ancuo ana kafi yulu ŋa ko kayi mpaana mi.

⁶ Mi kesi pii, mi moni anyama ba elami ena, anyama ankeri ŋa ba bayira ma ncie bila anyoyi.

⁷ Ŋaa mi yugi jui lelyele mi ndi: “Pyere temeŋe, ŋa buma anyama baa, we ja!”

⁸ Ŋaa mi kaali ndi: “Kali Mfumu, kalogo ka ngiri sikali keebi ka kini nyunuŋa nca onyua mi ŋi.”

⁹ Jui le efi yulu lia, levuri wobi ndi: “Ndaga kacwolo kalogo ka adugi Njyami ndi ko keeve ma kalogo keebi.”

¹⁰ Ŋaa lo le wobi bwa nja tari, amana eso evurugi yulu.

¹¹ Ma ntini yoankulu yia, abalaga atari ayi njo ye ba ka bizi. Bo baawa Sezare ama atuma bo mpaana mi.

¹² Oduduma Santi dugi mi ndaga bwogo kabaga, je bila bo. Adumu a mi ba asiami ba emono be baa ayiri mi Sezare ŋa bizi aso le yunuŋi nca njo balaga le ba acwolo Koreneye.

¹³ Wua se naaŋi bizi lemigi le moni nde ntuma-yulu wo cwugi mpila nde ma kalyele ndi: “Tuma abalaga ka Zafa ma kaje yaga Simon wo nkuumu Pyere.

¹⁴ Nde kalyele we mbari eli ye je kavuzuga we bila njo we eso.”

¹⁵ Ntini eli mi kiigi kini ebaana lyele, Oduduma Santi yi nyunuŋa nca bo mva kanyunuŋi nde nca bizi keebani.

¹⁶ Ŋaa mi barigi mbari a Mfumu ye kiigi lyele ndi: “Zan ampa ateemi ma anja ŋaa be le yaga ateemi ma Oduduma Santi.”

¹⁷ Ŋaa Njyami mpi bo Oduduma Santi mva nde kaasi bizi a be ba leyaligi Mfumu Zezi Kristi, mi kiigi na, ma kabiza jaa le Njyami?»

¹⁸ Bo amana yuga bwa, bo akipi, ŋa bo ampi Njyami leve ndi: «Ee jaajaa, Njyami ampa se baali ka aZife ŋi lengulu lekaala bila kabaga omuon o jaajaa.»

Okuga ka Antiyoce

¹⁹ Ampasi ma ayi ma ntini ye abumi Etyene asi kacamaŋa ayaligi. Ake nca bo ayeni tii Fenisi, ŋa Cypre bila Antiyoce, bo kiigi kampa mbari a Njyami ŋa aZife atu.

²⁰ Okorogo nca bo ake ba baaka asi Cypre ŋa Sirene ayeni Antiyoce, ŋa bo asunuŋi se ŋa baari ba baalyele Greke, bo ampi bo Ncya Yeemve e Mfumu Zezi.

²¹ Mpari a Mfumu ekiigi bila bo, ŋa kuna le baari leenini lemon leyaligi, ŋa anyunuŋi nca njila Mfumu.

²² Baari ba Okuga ba Zerizaleme ayugi ncia yia, ŋa bo atumi Barenabase Antiyoce.

²³ Ntini ye etoyi nde ŋa nde kamono lemigi le Njyami kiigi ampa ayaligi puga, nde moni kase ma bwa ŋa nde ŋi bo kawasi ma kaka pa ma Njyami.

²⁴ Okorogo Barenabase kiigi balaga leeve, nde kiigi maalwula ma Oduduma Santi bila lila. Bege le baari baabagi ma Mfumu.

²⁵ Amana bwa, Barenabase yeni Tarese ma kaje yaga Soole.

²⁶ Nde kamana bazaga nde, biri nde Antiyoce. Bo abwele aki kasibi kamon ka eciina nca Okuga wua, ŋa bo ba kayiziga kuna le baari nca lila. Kiigi ka Antiyoce, ma jaa le ncomi, alwoni acwoli ma akiricye.

²⁷ Ma ntini yia, antuma Njyami aciegi Zerizaleme ma kaje Antiyoce.

²⁸ Bo omon kiigi nkuumu Angabise, temiŋi ŋa wobi ma Oduduma Santi, nde kiigi dugi bo ndi njala yeenini yeeva kayila okiri oso. Yo eyi, okorogo ma antini ma kiigi Klode mfumu-kasi ka Arome.

²⁹ Ŋaa alwoni akani ndi, mbuuru ŋa mbuuru abuna mpa kabaga ka nde, ŋa ma katuma adumu ba kiigi ka Zide.

³⁰ Bo se asi bwa, ŋa atumi biibi ŋa ankwuru a Zide ma njiala e Barenabase bila Soole.