Esima 10 - Tege Kiwoyeti (teg) NT Portions

Lworo le Koreneye

¹ Kiigi ŋa balaga lemon ka Sezare nkuumu Koreneye, kiigi mfumu aworo aRome ba baacwolo ma «njiimi le Itali.»

² Balaga lia kiigi tele ŋa, bila njo nde eso, nde kaje Njyami. Nde amono ayamaŋa afuga a baari ba Ezerayele, ŋa nde kabwono Njyami cuga ŋa cuga.

³ Tari le kalaga, ma kacu ka tari le otari, nde moni lworo, nde moni ntuma-yulu taataa nyuniŋi nca njo nde ŋa nde ndi: «Koreneye!»

⁴ Nde kesi ntuma-yulu nde aterege ŋa nde ŋa nde ndi: «Ee Mfumu jo ema?» Ntuma-yulu kaali nde ndi: «Njyami ma ayalaga ebwoni e we bila lemigi le ayamaŋa we afuga, ŋa nde akalimiŋa we ŋi.

⁵ Ŋaa yiga tuma abalaga Zafa ma kaje yaga mbuuru omon wo ba acwolo ma Simon, nkuumu Pyere.

⁶ Nde kaka ka njo ojanji wo asa ebaana ba anyama nkuumu Simon se, nde njo mpaana lemere.»

⁷ Ntuma-yulu wo yi lyele nde kamana vuruga, Koreneye cwoli asali a nde abwele bila oworo nde wo tii tii wo ajanja bila nde, mbuuru woove wo tele.

⁸ Nde naani maami aso maakiigi yira ŋa nde tumi bo Zafa.

Lworo le Pyere

⁹ Anyuzuga, bo ali ma njila ŋa bo yiga ba aciina Zafa, Pyere kumi yila njo yiga ka leka le njo kayulu kua, tutuga ŋa tari ka leka yila ocu ma kabwono.

¹⁰ Nde njala esi ŋa nde kiigi yiga ŋa njala kaja. Ma ntini yeeli yiga baasa nde biila, nde moni lworo.

¹¹ Nde moni yulu onaaŋi ŋa kalogo ka keewa kua. Kiila kia kawuani kalembe keenini, amaasuga ko ma esugu ba ena ka keeya suruga ma ncie.

¹² Ŋaa nca kari kiigi ŋa anyama aso baali ŋa elami ena bila anyama aso ba baanaara, ŋa akaga ma anyoyi aso.

¹³ Jui lemon ŋa nde ndi: «Pyere saraga ma otele, buma ŋa ja!»

¹⁴ Ŋaa Pyere kaali ndi: «Kali! Mfumu, kabila mi nkini kawuuza ngiri ye ampi mi ŋi se kalogo keebi ŋi.»

¹⁵ Jui lya le vuri dugi ndi: «Ndaga kacwolo kalogo ka adugi Njyami ndi ko keeve ma kalogo keebi.»

¹⁶ Ko ka yi nja tari, kancinci ŋa amana, kalembe kavurigi yulu.

¹⁷ Pyere yiga apiza ndi lia sila lworo ŋaa ma kalyele ndi bunu. Ŋi ma ntini yia baari ba Koreneye ba katumi baa yiga ali ma kapiza biri yeeli njo Simon ŋa bo yiga ali ka levuzu le kadubugu.

¹⁸ Bo acwoli ŋa bo apizi ndi: «Simon nde nkuumu ye ekiege Pyere kaŋaa ka anca?»

¹⁹ Pyere kiigi kini acimiŋa lworo lemono nde ntini ye Oduduma ye kadugi nde ndi: «Yuga, abalaga atari eba ka kunu baasaga we.

²⁰ Saraga, suruga ŋa je bila bo we bizi se atira kasa, kabila mi mbuuru wo otumi bo.»

²¹ Pyere surugi yi baga bo ŋa nde ŋa bo ndi: «Mi mbuuru yo be ye lesaga. Be meema leya?»

²² Bo akaali ndi: «Koreneye mfumu aworo tuma bizi. Balaga le tele, nde anyima Njyami ŋa baari ba aZife aso ŋa njala nde. Ntuma-yulu omon ya lyele nde ndi, nde katuma kacwolo we mpila nde, ma kayuga jaa yeeli we lyele nde.»

²³ Pyere si bo kanyunuŋa nca njo, ŋa bo asi kalari kamon. Anyuzuga, Pyere vi ma njila bila bo. Ŋa adumu ake ba Zafa ayi yila nde.

Pyere aje mpila Koreneye

²⁴ Cugu le elwoni, nde kirigi Sezare. Koreneye kiigi anjila nde, ŋa nde kiigi ma acwolo ankwono bila andigi a nde apaga.

²⁵ Ma ntini ye Pyere kiigi yiga anyunuŋa, Koreneye yeni ma ka bazaga le nde, ŋa vi ka abuu a nde ma kabiga bila otori oso.

²⁶ Ŋaa Pyere osati nde ndi: «Saraga, mi se mbuuru omuon mva we.»

²⁷ Ŋaa nde seligi wobi bila Koreneye, ma ntini ye nyuniŋi nde nca njo. Nde moni bege le baari le maakuga.

²⁸ Nde ŋa bo ndi: «Be leyayi ni amaaliga aZife ma kaje mono anjya, sikali ma kanyunuŋa nca njo nde. Ŋaa Njyami mi mvyere ndi mi bizi kalyele ni mbuuru se omon ŋa amaami maabi, eli mi duma nde.

²⁹ Ma bwa mi kimono obi ŋi ma mi wooyi mpila be, kacwolo be mi. Ŋaa yiga mi ebuna yaa jaa le be le cwolo mi.»

³⁰ Koreneye kaali ndi: «Ecugu yiga etari, tari loankulu li, ka tari le otari eli tari yiga le mi kalaga, mi kiigi ebwono ka njo mi. Kancinci ŋaa mi kese bu balaga lemon le amfa ngeri ngeri le cwugi kavuzu o mi,

³¹ ŋa nde ŋa mi ndi: “Koreneye, Njyami mi yuga obwoni a we ŋa nde akalumuŋa lemigi le yamaŋa we afuga ni.

³² Yiga tuma abalaga aje Zafa ma kaje yaga Simon, nkuumu Pyere. Nde kaka ka njo Simon, wo asa janja le ebaana ba anyama, nde njo mpaana lemere.”

³³ Mi sa waa, mi tumi baari ma kaya yaga we ŋa we se si ove ma kaya. Ŋaa yiga bizi a be aso e ba leli ka miizi a Njyami ma kayuga maami aso a Mfumu ma kampi we ma kalyele.»

Pyere ampa Ncya Yeemve mpila Koreneye

³⁴ Ŋaa Pyere yagi mbari ndi: «Jaa jaa mi yiga eyuga ni Njyami kayaga baari aso lemigi lemon.

³⁵ Nca esi eso ba eyayi onkani o nde bila ba eli tele, ŋa ove ma nde.

³⁶ Nde tumi mbari a nde ŋa baari a Ezerayele, ncia yeemve ye kadusu ma Zezi Kristi wooli Mfumu a baari aso baali muon.

³⁷ Be leyayi jaa le baani ya ka Ngalile, ŋa kanca Zude eso, kaamani mpa Zan mbari ŋa ateemi.

³⁸ Be leyayi lemigi le Njyami le kaswolo Zezi wo Nazarete ma janja le nde ŋa nde ma mpa nde mpari ye Oduduma Santi. Be leyaa lemigi le Zezi leka yiri nca kasi ma kasa leve ŋa ma kasalaga aso beeli jabiri ma akuara, kabila Njyami kiigi bila nde.

³⁹ Ŋa bizi a be kamaka atemi ma maami aso maasi nde nca kasi ka aZife ŋa ka Zerizaleme. Ma ka buma nde bo ama kuta nde ma oti wo lemaanji.

⁴⁰ Ŋaa Njyami nyusu nde ma cugu le otari, ŋa nde si nde kamvyere njuru,

⁴¹ ka ma baari aso ni, ŋaa ma bizi beeli Njyami ma sa swolo mva atemi. Bizi a be le ma ja le ma nyua bila nde ntini e Njyami ye kamana nyusa nde nca baari ba akpakpa.

⁴² Nde seligi tumi bizi ma kampa mbari ŋa baari bila ma kalyele ndi nde wo Njyami wo ka swoli ma kampama baari ba omuon bila ba akpakpa.

⁴³ Antuma Njyami aso awobi ma nde, ndi mpini mbuuru wo ayalaga nde abologi maami maabi a nde aso ma onkani o nkuumu a nde.»

Oduduma Santi mi suriga yila baari eli ka aZife ŋi

⁴⁴ Ntini eli Pyere kiigi kini alyele, Oduduma Santi surigi yila baari aso ba kiigi yuga ntigi a nde.

⁴⁵ Ekoli ayaligi baali aZife ba ayi bila Pyere ndi Oduduma Santi wo Njyami wo kampa mi nyunuŋa ma anjuru a baari eli ka aZife ŋi.

⁴⁶ Okorogo nde ka yuga ka alyele bo ma ajui akima ŋa kampa Njyami leve. Ŋaa Pyere ndi:

⁴⁷ «Ba buna liga baari baba yaga ateemi ma anja, eli bo yiga ŋa Oduduma Santi mva bizi a be?»

⁴⁸ Ŋa nde tumi bo ma kampa bo ateemi ma nkuumu Zezi Kirisite. Bo apizi nde ndi nde kasa aka ecugu bila bo.