Esima 1 - Tege Kiwoyeti (teg) NT Portions

Oduduma Santi wo legi antuma ndagi

¹ Mbuuru ami Tofile, nca buku le mi le osu, mi naani maami aso maasi Zezi bila ma yizigi nde ka ebaani,

² tii cugu lekumi nde yulu. Nde kiigi kini yila ncie, nde kamana mpa angiri ma mpari a Oduduma Santi, ma baari ba aswoli nde ndi antuma.

³ Esa bwa, amana leku le nde, ma amigi akukuna nde mvyeri bo njuru ndi nde kiigi kini mwon. Ma ecugu ŋa ena bo aselegi moni nde, ŋaa nde wobi bo ma omfumu o Njyami.

⁴ Cugu lemon leekiigi ja nde bila bo, nde mpi bo angiri: «Be lebizi kaje laa ŋa Zerizaleme, ŋaa lejila ndagi a Taara ye kadugi be, le mi le dugi be.

⁵ Kabila Zan mpi ateemi ma anja, ŋaa nca ecugu nceti, be leje kabaga ateemi ma Oduduma Santi.»

Zezi akuma yulu

⁶ Ba abaaka ma oju ka mpaana a Zezi apizi nde ndi: «Mfumu we parabu ŋa avura vuta omfumu ba Ezerayele?»

⁷ Zezi akaala ŋa bo ndi: «Be leki buna yaa antini bila tari leya amaami maa ŋi, kabila Taara nde otu ma akura.

⁸ Ŋaa be leje kabaga mpari ntini ka aje kasuruga Oduduma Santi yila be. Be leje kaka atemi a mi ka Zerizaleme nca Zide eso bila Samari ŋa ancwo ma okiri.»

⁹ Zezi kamana mbari yia, nde kumi yulu ma ntini ye kiigi kese baari aso nde, ŋaa mono kaduba kamon ka keeduba bo miizi.

¹⁰ Bo kiigi akini ba kese yulu ma kacu ka kiigi je Zezi, parabu abalaga bwele baama alaaza amfa akubugi akiigi ka mpaana bo,

¹¹ ŋaa bo ŋa bo ndi: «Be baari a Ngalile, be meema levura kaana ma kakese yulu? Zezi wo acyeze be ma kaje le yulu, aya vuruga ma lemigi loankulu lemoni be nde aje li.»

Matiyase akiriga ma biri a Zuda

¹² Antuma kiigi akini ka kakuri ka Elivye, bo se avurugi kwa ŋa kwa. Kakuri kia kali tuga ŋa kangundu, katini ma kaciege ŋaa tii kangundu nkaali katini ka tari.

¹³ Bo ato Zerizaleme, bo akumi yila katini ka njo keeli kayulu ka abana vunuŋa bo. Kiigi ŋa Pyere, ŋa Zan, ŋa Zake bila Andre, ŋa Filipe bila Tuma, Bateleme bila Matiye, Zake wo mwana Yalefe, Simon wo Kanonon bila Zide wo mwana Zake.

¹⁴ Antini aso bo kiigi kaka biri mon ma kabwono bila akaazi ake, ŋaa kiigi ŋa Mariya wo nguugu a Zezi bila adumu a nde.

¹⁵ Nca ecugu bia kamon, ayaligi a Njyami kiigi ali ma oju wo nkama ŋa ekuumu e baari jyele. Pyere sarigi ka miizi a bo ndi:

¹⁶ «Be ba andumu a mi bila ankeri a mi, kiigi ave ma dugi Oduduma Santi ma ateendi nca mbari ma acugi ma onyua Davide kayila Zida mbuuru wo biri baari ba akuari Zezi.

¹⁷ Zida kiigi buga le lebaaka bila bizi ŋaa nde se bagi le nde bugu le janja.»

¹⁸ (Bila ampara ma awuri nde ma bumi, nde suumi nguunu, nde vi mfumuŋa, mwon pazi ŋaa enyiaga eso ecuugi.

¹⁹ Baari a Zerizaleme ayuga jaa lia bo acwoli nguunu yia ma jui le bo ndi «Akeledama», ma kalyele ndi «nguunu a togi.»)

²⁰ Ŋaa Pyere vuri dugi ndi, «Ama teende nca buku le Pisomi ndi: “Njo nde ye ka boo, Ŋaa mbuuru aka maka nca yo ŋi!” Ŋaa avuri lagi ndi: “Mbuuru okima kayaga katomi ka nde.”

²¹ Ave bizi a be le swoli balaga lemon nca baari ba kiigi yila bila bizi a be ma antini aso ye kiigi yila bizi a be bila Mfumu Zezi ma ebiri eso,

²² ma ka baana ntini ye mpi Zan Batise nde ateemi tii ntini ye kumi nde yulu. Ŋaa balaga lia leje kaka temi bila bizi a be le enyuzigi e nde.»

²³ Amvyeri baari bwele: Zizefu wo acwoli ma Baresabase, a nde ye nkyege Zusetise, bila Matiyase.

²⁴ Ŋaa Okuga bwoni ndi: «Mfumu, we wo yayi etuma eso mvyere bizi nca bo abwele wo swoli we,

²⁵ ma kajanja nca katomi ka antuma a Zezi, ŋa ma kayaga biri ye ciegi Zida ma kaje biri ye ka nde.»

²⁶ Ŋaa bo asi kasima ma kamono wo aka, ŋaa evi ma a Matiyase, wo alusi bila antuma akwumu ŋa omon.