2Timote 4 - Tege Kiwoyeti (teg) NT Portions

¹ Mono me piza mi we bila mpari, ka osu o Njyami ŋa ka osu ba Kirisite Zezi wo apama baari amwon ŋa baama kpa ma ntini ye eyi e nde ŋa omfumu o nde:

² selege mpa mbari a Njyami, ma antini maabi bila maave, ma kasa kayalaga, yieze bo bila nkeri, ŋa mpa kawasi kanca eyizigi e we bila kajila ka taataa.

³ Kabila ntini ye ya eli baari jala kayuga eyizigi ba cece onyaŋa. Bo ba alwono ajya a bo ŋa baaje kasaga kuna le baari mabu ndi bo ayiziga bo ma jii bo kayuga.

⁴ Bo baaka mayuga maami ma jaajaa ŋi, ŋaa bo baampa lo engwo, ma kayuga maami ma alaa.

⁵ Ŋaa we ka ŋa oyeri ma maami bwori, kyele ampasi, mpa Ncya Yeemve, sa osala o Njyami ba kampi we nca jwogo e we.

⁶ Ma mi, mi mi mpa omwon o mi bwori ŋa Njyami mva maali ma mayira ma ambwoŋi, ŋa ntini ye je mi emito.

⁷ Mi jwani nguru yeemve, mi bari ciini se tii ncwo, ŋa mi ki nyina lila ŋi.

⁸ Ŋaa Njyami ma kyele wura le mi ka yulu ma mi wooli tele ka osu o nde. Mfumu, opama tele avuta mi lo ma cugu le opami. Ŋa ka ma mi otu ŋi, ŋaa bwori eli bila jya le mpari ba ajila eyi e nde.

Angiri ambiza ŋa Timote

⁹ Sa bwori ma kaya bazaga mi asisari.

¹⁰ Kabila Demase ma anyina mi ma nde ma wo vula kajya okiri wo leli ma nde wu, ŋa nde ma je kangundu ka Tesalonike. Keresenes ma je bungu le Ngalate, ŋa Tite bungu le Dalemasi.

¹¹ Like otu oli bila mi. Bira Mareke bila we, kabila nde abuna yamba mi nca kasali ka mi.

¹² Mi tumi Ticike ka Efeze.

¹³ Ntini ye ayaa we, ya bila mi ngoyi yeelaa empebe ye nyini mi ka kangundu ka Toreyase mpila Karepos. Ya se ŋa abuku, vulivuli baasi ma ebaana ba anyama.

¹⁴ Alesandere wo asa mfuba osi mi bege le maami obi. Mfumu avuta nde ma si nde.

¹⁵ We se, kyele we ma nde. Kabila nde seligi bizi mbari ye ampa bizi a be.

¹⁶ Ka osu keebani mi kalyele nca biri ye ba apama ma kavuzuga mi, mbuuru ki yamba mi ŋi, bwori abari mi. Ndi Njyami kabiza bo kampama.

¹⁷ Ŋaa Mfumu kiigi ka mpaana mi. Nde mpi mi mpari mabu ndi mi mpa kuna le Ncya Yeemve ŋa esi njwori eyuga yo. Ŋa nde vuzugi mi ma onyua kangungu.

¹⁸ Mfumu avuzuga mi ma amaami maabi bwori ŋa nde avuzuga mi ma kasa kanyunuŋa yulu, nca omfumu o nde. Ndi lekuma leka bila nde obu-obu! Ee bwa.

Obigi obiza

¹⁹ Biga Pirisile ŋa Akilase bila nkwono Onezifore.

²⁰ Erasete siili ka Korinete, ŋa mi nyini Terofime ka kangundu ka Milet ma nde wo kiigi ŋa ngayi.

²¹ Sa bwori ma kaya keebana ntini empebe. Ebulus, Pudenes, Linus, Kolodiya ŋa adumu baamon bwori baabiga we.

²² Ndi Mfumu kaka bila we. Ndi puga le Njyami leka bila be.