2Timote 3 - Tege Kiwoyeti (teg) NT Portions

Ecugu ebiza

¹ Ave we yayi ndi nca ecugu embiza lebaga antini ampasi.

² Kabila baari baaka ŋa jya le bo-ankulu, adigi ba ampara, kajogo bila nkamba; bo ba atuga Njyami. Bo baaka nyima ataara a bo ŋa anguugu a bo ŋi, ŋa bo ba abiza se bwori maali cece.

³ Bo ba kajya mbuuru ŋi, bo ba kamono nya mbuuru ŋi. Bo ba lyele maami maabi ma njuru abuga, bo ba akabuna nyima njuru a bo-ankulu ŋi. Bo baaka baari baabi, ŋa anyon ma maave.

⁴ Bo ba aka ŋa ompyele, bo baaje kasa maami ma esisi, ŋa aluuli ma nkamba. Bo ba aje kabaga jya le okiri ka le Njyami ŋi.

⁵ Bo baaje kasa mva baali ŋa lila, ŋaa bo baaje katuna mpari a Njyami. We cyege bila baari ba.

⁶ Ake kanca bo ba anyunuŋa nca anjo. Ŋa bo ba yaga nca atanga a bo akaazi baali mpari kali. Kabila akaazi ba, ba abira olemi ma amaami maabi a bo, ŋa ba alwono kaga le ajya bwori.

⁷ Bo kaselege kasaga kayiga ŋaa ba kabuna kaya asisyele ŋi.

⁸ Ntini ekala, Janese ŋa Jambere aki yalaga Moyize ŋi. Ma lemigi loankulu lia se baari aki yalaga asisyele ŋi. Bo ŋa epundu beebi ŋa lila le bo kalogo kooca.

⁹ Ŋaa bo ba kaje laa ŋi, kabila okiri ywori aya ojiri o bo, mva maami maabi ma Janese ŋa Jambere.

Angiri ambiza

¹⁰ Ŋaa we, we lwoni mi nca eyizigi e mi, ma eki e mi, maami a mi, lila le mi, kajila ka mi, jya le mi, ŋa ma lebigi le mi.

¹¹ We yayi ewyeli e mi ŋa ampasi a mi, mva ami keemoni ka Antiyoce ma Pisidi, ka Ikoniyume, ka Lisetere. Yini mpasi mi bizi mono! Ŋa ma bwori Mfumu vuzugi mi.

¹² Okorogo, bwori baajii kabira omwon cece ma Kirisite Zezi ba awyele bo.

¹³ Ŋaa baari baabi ŋa anga kura ba aselege je lala nca esima beebi. Bo baaje kakura abuga, ŋa ba kura bo se.

¹⁴ Ŋaa we, ka tele nca ma ayizigi e we ŋa ma yaligi we ma otuma we ywori. We yayi ba ayizigi we,

¹⁵ ŋa ndi kasa baana we oburi, we yayi Eteendi e Cece. Bo ba abuna mpa we ecimiŋi e jaajaa ba beebira kavuzuga ma lila le Kirisite Zezi.

¹⁶ Eteendi e Cece njwori ecuugi ma onyua Njyami, ŋa ove ma kayiziga asisyele, ma kasa kayalaga, ma kakozo obi, ŋa kasa ma lemigi le kaka le jii Njyami,

¹⁷ mabu ndi mbuuru a Njyami ami selege taataa ŋa yiga tuga ma kasa esima njwori beeve.