2Timote 2 - Tege Kiwoyeti (teg) NT Portions

Oworo o Kirisite

¹ Ŋa we, mwana mi, yaga mpari a we nca puga le bizi a be le lewa ma Kirisite Zezi.

² Ŋa e we ka eyugi ma mi ka osu le bege le atemi, mpa ŋa baari ajaajaa, eli bo ba abuna yiziga se ma baari akima.

³ Yaga le we bugu le ampasi, mva oworo omon woove wo Kirisite Zezi.

⁴ Mbuuru wo asala nca eta ŋa ndi nde kasaga kasa ove kamiizi a mfumu, nde ki kipa amaami ma baali ka aworo ŋi.

⁵ Ŋa onduma-nciini kabaga wura le nde aka nde anyima angiri ma kata.

⁶ Ave okuni wo si osala le onono ma kakuna nguunu bagi bugu le nde le osu le mburu.

⁷ Yuga ma alyele mi ŋa Mfumu aje kampa we oyeri ma elogo njwori.

⁸ We baraga Zezi Kirisite, mpabigi Davide ŋa nyuzugi kanca ba akpa akpa, mva ka eyiziga Ncya Yeemve eli mi empa.

⁹ Ŋa ma Ncya Yeemve yia, mi emono mpasi ŋa mi ama akura angazi mva osara. Ŋaa mbari a Njyami akini kura ŋi!

¹⁰ Ŋa ma bwa mi emono mpasi ywori ma baari eli Njyami swoli, mabu ndi bo se avuuga ma Kirisite Zezi, ŋa ma lekuma le obu-obu.

¹¹ Lemono mbari ye jaajaa: «Aka bizi a be le kpa bila nde, bizi a be leje kaka mwon se bila nde;

¹² aka bizi a be leka ŋa mpana, bizi a be leje lekuma se bila nde; aka bizi a be le tuna nde, nde se aje katuna bizi a be;

¹³ aka bizi a be lekami lila, nde aje kaka tele bubu, kabila nde aka buna tuna nde-ankulu ŋi.»

Osali wo ayaligi

¹⁴ Vura sa bo kabaraga bwori. Ka osu o Njyami, piza bo bila mpari ma kabiza kajwana yila ambari. Ma mooca, ŋaa bo ba abiiza ecu e baari ba baayuga yo.

¹⁵ Sa mpari a we ywori ma kamvyere ka osu o Njyami mva balaga eli nde abuna yalaga, ŋa mva osali eli okuru kali, ŋa ayiziga taataa mbari ye asisyele.

¹⁶ Nduma lesugu le oca eli ka tele bila lila ŋi, kabila baari ba baanyunuŋa nca yo baaje kaselege siila lala ma Njyami.

¹⁷ Eyizigi e bo mva pura eli ye selege naŋa ŋa ye ja njuru. Kanca bo ŋa Imene bila Filet:

¹⁸ bo ama nyina asisyele, ŋa bo abiizi lila le baamon ma kalyele bo ndi Njyami ma amana nyuzuga bizi a be ma leku.

¹⁹ Ŋaa ebaani e mpari ba elegi Njyami eli yemiŋi. Lemono mbari ka teendi yila nde: «Mfumu yayi baali ma nde.» Ŋa : «Wo alyele ndi nde li bila Mfumu, ki lala ma esima beebi.»

²⁰ Nca njo yeenini, ki epele ba nore bila ba ampara etu ŋi, ŋa ba eti ŋa ba ncye se. Ba osu amasuuza ma acinda, beemon ba ecugu njwori.

²¹ Aka mbuuru yiga cece ma maami maabi bwori ma lyeli mi, nde aka mva epele ba acinda, nde ma mpa njuru ŋa ove ma mfumu a nde, nde li tuga ma kasa esima njwori beeve.

²² Ŋaa nduma maami maabi ma onkere, ŋa saga opami, lila, jya, kadusu bila ba baabwono Mfumu bila otuma wo cece.

²³ Ŋaa cuna lebila le ococa ŋa ojiri: we yayi ndi bo ba ajura anguru.

²⁴ Ŋa osali a Mfumu aka sa anguru ŋi. Ave nde mvyeri otuma nde woove ma baari bwori, nde abuna kayiziga ŋa kajila engomgbo.

²⁵ Ave nde ka kampa andwo bila kadusu ŋa baari ba babiza ma nde: asoke Njyami aje kabira bo ma kakala esima e bo mabu ndi bo aya asisyele.

²⁶ Ŋaa bo baaje baga ecimiŋi beeve ŋa ba avuuga ma atanga a jabiri eli akwari bo mabu ndi bo aka ŋa ma kasa ma jii nde.