2Timote 1 - Tege Kiwoyeti (teg) NT Portions

Obigi

¹ Mi, Poole ntuma Kirisite Zezi mva Njyami ka kajii, ma kampa ndagi yo omwon o Kirisite Zezi.

² Mi eteende we okanda wu Timote, mwana mi wo jya: ndi Njyami wo Taara ŋa Kirisite Zezi Mfumu a bizi a be ba ampa we puga, akolokolo, ŋa kadusu.

Poole ampa Njyami leve

³ Mi empa Njyami leve, eli mi esala bila otuma cece mva ka si ankaaga a mi, ntini ye selege cimiŋa mi we nca ebwoni, lempiibi bila cugu.

⁴ Mi e baraga acya a we, ŋa mi jii we kamono mabu ndi mi luula ma kase.

⁵ Mi ecimiŋa ma lila le jaajaa leeli ŋa we. Lila lya la leki bila nkaaga we Loyise ŋa nguugu a we Inese ka osu o we. Mi e yalaga ni we se ŋa lila loankulu lia ma we.

⁶ Ma bwa mi ecimiŋa we lo, selege mpa kafi yemiŋi ŋa bugu le Njyami le kampi we, ntini ye legi mi njyala e mi yila we.

⁷ Kabila Oduduma wo mpi Njyami bizi a be aka mpa etuma e bizi a be bwogo ŋi. Ŋaa Oduduma wua aluula etuma e bizi a be mpari, jya, ŋa ye mpa bizi kawasi ma kakyele.

⁸ Yiga ndaga kabaga okuru ma kampa otemi o Mfumu bizi a be, ŋa ndaga okuru kamono ma mi wooli ka ongeneŋe ma nde. Ŋaa mono mpasi bila mi ma Ncya Yeemve bila mpari Njyami.

⁹ Ŋaa nde vuzugi bizi a be ŋa nde cwoli bizi a be ma kaka baari a nde. Ŋa nde ki sa bwa ma esima e bizi a be beeve ŋi, ŋaa nde kuru bwa ma puga le nde. Puga lya le mpi nde bizi a be ma Kirisite Zezi, keebani ba okiri.

¹⁰ Ŋa yiga, nde amvyere bizi a be puga lya ma eyi ba Ovuzigi a bizi a be Kirisite Zezi. Ŋa nde wo mani mpari ye leku, ŋa wo mpi kafi ka njila ma kabaga omwon ba obu-obu ma Ncya Yeemve.

¹¹ Njyami maaswolo mi mva ompa mbari ŋa ntuma ma kayiziga Ncya Yeemve yia.

¹² Ŋa ma bwa mi emono mpasi. Ŋaa mi okuru kali. Kabila mi yayi a mi wo elegi tari ŋa mi yalagi ndi nde ŋa omfumu ma kakyele e nde ka kampi ŋa mi tii cugu le opami.

¹³ Yaga ma lemigi le mbari e tele e we ye yugi ma mi, nca lila ŋa jya ba eli ma Kirisite Zezi.

¹⁴ Ma puga le Oduduma Santi le leeka ma bizi a be, kyele andwo maave ba ampi we ma kakyele.

¹⁵ Mva ka yayi we, bwori ba bungu le Azi ama mpa mi engwo, kanca bo Fijele ŋa Eremojene.

¹⁶ Ndi Mfumu amvyere nya nde ma nkwono Onezifore. Okorogo, nde abana mpa mi kawasi ŋa nde ki mono okuru ma mi ŋi, wooli ka ongeneŋe.

¹⁷ Ŋaa ma ntini ye toyi nde Rome, nde seligi sagi mi tii kabagi nde mi.

¹⁸ Ndi Mfumu kampa nde ma kabaga nya ma Mfumu ma cugu le opami! Ee, we yayi osala ywori o nde wo kavuti mi ka Efeze.