1 Timote 5 - Tege Kiwoyeti (teg) NT Portions

Ajwo ma mfumu wo Okuga

¹ Biza kabama kakubu kambuuru bila nkala. Ŋaa mpa nde andwo mva ndi nde taara we. Selege enkere ba abalaga mva adumu,

² akaazi ba ekubu mva anguugu, ŋa enkere ba akaazi mva ankeri, ma o cece bwori.

³ Kyele akuuli yemiŋi, ma baali jaajaa bomo otu.

⁴ Ŋaa aka okuuli ŋa baana sikali andaala, ave bo ayayi bu: bo abaani legi lila le bo ma nkwono bomo ankulu. Ma lemigi lya, bo ba avuta ŋa ankwono a bo bila ŋa ankaaga a bo ma bagi bo ma bo. Mono ma jii Njyami.

⁵ Okuuli wooli mbuuru wo akyele nde kali, ŋa wo aka nde nde otu, ma lege tari le nde ŋa Njyami. Cugu bila lempiibi, nde ma kabwono Njyami ma kayamba nde.

⁶ Ŋaa okuuli wo asaga sa ma amono nde ove ma mana kpa, se nde li mwoyi.

⁷ Mono se ma alyele we bo, mini bo ki ka ŋa eku beebi ŋi.

⁸ Aka mbuuru aka kyele nkwono nde e lala yemiŋi ŋi, ŋa vulivuli baari ba nkwono nde-ankulu, nde mi cuna lila le nde, nde vuli wooli ki oyaligi ŋi ma amaami obi.

⁹ Ma oju wo akuuli, teende okaazi wooli ma abaga esibi asoke enkuumu esiami. Ave nde kiigi tele ma olumi a nde.

¹⁰ Ave ayayi maami maave bwori a nde makasa: nde akyele baana a nde yemiŋi, nde yambi ba ki ya mpila nde yemiŋi, nde cuki taami ye ayaligi, nde yambi baali nca mpasi, ŋa nde si kaga le amaami maave bwori.

¹¹ Ŋaa ma akuuli ba enkere ba akaazi, nyina kalege bo yila okanda. Kabila ntini ye vura jya bo kabala, bo ba anyina njila Kirisite.

¹² Ma lemigi lya, bo ba ajiima opami yila bo ankulu, ma bo ba amicala okezi wo labi bo ma ntini ekala.

¹³ Mva eli bo kalogo ka baasa kali, bo ba ayaga kasima ma kaje anjo ŋa anjo. Ŋaa ye vuli bwa bo ba akasa kalogo ŋi, bo ba alyele kuna ŋa bo se ba ka kyele maami ŋi, bo se kalyele maami mama biza bo kakese.

¹⁴ Yiga mi jii ni akuuli ba enkere ba akaazi avura bala, bo abagi baana ŋa akyele anjo a bo. Ŋaa bo abiza kampa ŋa alogi njila ma kalyele maami maabi ma bizi a be.

¹⁵ Okorogo, yiga ŋa akuuli ake ba aminywoŋo ma kalwono Sata.

¹⁶ Ŋaa aka oyaligi wo okaazi ŋa akuuli nca nkwono nde, nde yambi bo. Ŋa nde bizi kanyina Okuga ma kayamba, ŋa nde kayamba akuuli baali jaajaa bomo otu.

¹⁷ Ntini yeeli akuuru ba abira Okuga yemiŋi, ave anyimi bo ŋa awuri yemiŋi. Vulivuli ba baasala kuna ma kampa mbari ŋa kayiziga.

¹⁸ Kabila mbari a Njyami ye lyele ndi: «Ntini ye asala ngoombi ma ntini ye ba atolo, biza ka liga nde ma kaja», ŋa: «Osali ave bagi wura le nde.»

¹⁹ Ave atemi bwele sikali atari, ma ka kata okuuru. Aka ka bwa ni, biza kayalaga ni akata nde.

²⁰ Ŋaa aka okuuru maasa maami maabi, bama nde ka osu o baari bwori, abuga se abaga obwogo.

²¹ Mono me piza mi we bila mpari ka osu o Njyami, ka osu o Kirisite Zezi, ŋa ka osu ba antuma-yulu a Njyami ba kaswolo: nyima ma bwori eli ambolo ayika kali, ki ka lengulu lemon ŋi.

²² Ndaga kalege njwogo e we asisari yila mbuuru ma kasuuza nde katege ma kasa osala le Mfumu. Nyina kanyunuŋa nca maami maabi ma abuga. Ka we cece.

²³ Biza kanyua anja otu. Yaga se maali nceti ma wuzu le we, ma we wo ava ngayi.

²⁴ Amaami maabi ma baari ake baamono mon taataa, se ka ba baana pama bo levuzu, ŋaa maami maabi ma baamon kacuuga lembiza.

²⁵ Maami maave, mon se kamono taataa. Ŋa esima beeve ba baabiza mono taataa ki buna kaka ma ayizigi bubu ŋi.