1 Timote 4 - Tege Kiwoyeti (teg) NT Portions

Bwori ma wangi Njyami maave

¹ Ŋaa Oduduma Santi alyele taataa ndi: nca antini ambiza, ake baanyina lila, bo baalwono epundu ba beekura, ŋa eyizigi ba beeya ma amfu.

² Baari ba kalakali ŋa ba alaa baakura ma mbari a bo. Baari baa ama nyina etuma emabya, mva kama acuga bo bila nkozo e mbaa.

³ Baari baa, ba ayiziga ndi ki bala ŋi, ki ja ambiri ake ŋi. Ŋaa Njyami wangi elogo njwori mabu ndi ayaligi ba ayayi asisyele, ayagi ma kampa nde leve.

⁴ Kabila njwori ba wangi Njyami beeve, kaba cuna kali, ŋaa ave lebagi njwori ma kampa Njyami leve.

⁵ Okorogo mbari a Njyami ŋa kabwono yeesa ndi elogo bya beeya ŋa ove ma Njyami.

Ojanji woove o Zezi Kirisite

⁶ Yiziga ma bwori ma adumu. Ŋaa we aka osali woove wo Zezi Kirisite, we amvyere ndi we ba abunuŋa ma mbari e lila ŋa eyizigi e taataa ba elwoni we tele.

⁷ Ŋaa cuna amaami ma ojiri ŋa ki tele ma lila ŋi. Selege yiga ma kaka tele ŋa Njyami.

⁸ Okorogo, esima enjuru ŋa ove ma elogo nceti. Ŋaa, leka le tele ŋa Njyami ŋa ove ma maami bwori. Kabila yo ye mpa bizi a be tari le omwon o lubu ŋa ampa bizi a be ndagi ma omwon baba oya.

⁹ Lemono mbari ye jaajaa, eli ba abuna kayalaga ma bwori.

¹⁰ Okorogo, aka bizi a be lesala bila mpari, ŋa aka le jwana, ŋa ma bizi a be lema lege tari le bizi a be nca Njyami omwon, wooli Ovuzigi a baari bwori, vulivuli ba amayalaga.

¹¹ Lyele ŋa yiziga mon bwori.

¹² Ndi mbuuru bizi we kakese ococa kabilakama ma we oli onkere. Ŋaa mvyere eki beeve ma ayaligi, nca mbari a we, nca eki e we, nca jya le we, nca lila le we ŋa nca o cece o we.

¹³ Tii ka eya mi, selege lira Eteendi, ma kawasa, ŋa ma kayiziga.

¹⁴ We bizi kabiza bugu le puga leeli ŋa we. We bagi lo ma ntini ye baari ka alyeli ecimiŋi e Njyami yila we ntini ye akuuru ba Okuga ka alegi angaga kayila we.

¹⁵ Mono ma kyele we ma otuma. Mono e we kasa mpana. Ma bwa baari bwori amono we aje levuzu.

¹⁶ Sa oyeri ma lemigi le aka we ŋa ma eyizigi e we. Sa mpana nca njila yia. Okorogo, aka we asa bwa, we aje kavuuga ma we ankulu bila baari ba baayuga we.