1 Timote 3 - Tege Kiwoyeti (teg) NT Portions

Amfumu ba Okuga

¹ Lemono mbari ye jaajaa: aka mbuuru ajya kaka mfumu nca Okuga, nde jii kasala keeve.

² Ŋaa ave mfumu wua eku beebi kali. Olumi ki tele ma okari a nde, ki mfumu nde-ankulu, ncimi taataa nca eki e nde, kayamba le baari yemiŋi, ŋa kabuna kayiziga.

³ Ave nde ki ka oyiga maali ŋi, se nkeri kali, ŋaa kadusu, kaka pi. Ŋa ndi nde bizi kalege jya kayila ampara!

⁴ Ave nde kyeli nkwono nde yemiŋi, baana ba anyima nde bila onyimi ywori.

⁵ Okorogo, aka mbuuru kabiza kakyele njo nde-ankulu, nde bunu kakyele njo Okuga Njyami?

⁶ Ave nde bizi kaka oyaligi wo nyarigi, ncanke nde luuli ma nkamba, ŋa Njyami apama nde mva kaka pami jabiri.

⁷ Ave se baali ki akiricye ŋi acimiŋi yemiŋi ma mfumu wua. Ŋaa mbuuru ki lyele maabi ma nde ŋi, ŋa nde aka va nca tanga le jabiri ŋi.

Ajanji

⁸ Ave se ndi asali aki abalaga ba baanyima ŋa abagi mbari mon. Ave bo aki nywa maali kuna ŋi, se aki saga kabaga ampara maabi ŋi.

⁹ Ave bo akyele bila otuma o cece asisyele a lila ma Njyami ma kalyeli.

¹⁰ Ave abaani yeligi bo. Amana, aka ba kabaga kalogo yila bo ŋi, bo yiga asala mva asali.

¹¹ Ma lemigi loankulu lya, ndi ave akaazi ŋa onyimi, bo aki lyele maami maabi ma abuga ŋi. Ave bo aki amfumu a bo ankulu ŋa aki tele ma maaso.

¹² Ave ojanji ki tele ma okari a nde. Ave nde yayi kakyele baana a nde taataa ŋa njo nde-ankulu.

¹³ Asali ba baasa osala o bo taataa abagi kaduduma keeve, ŋa bila tari leenini le lila la le vusa bizi a be bila Kirisite Zezi.

Ayizigi amvyeri

¹⁴ Mi teendi we okanda wua, bila tari ma buni mi emono we tuga.

¹⁵ Ŋaa aka mi ebiza kato ŋa asari, we ayaa ma okanda wua lemigi leka baari nca nkwono Njyami. Nkwono yia, kamaka Okuga Njyami omwon, wo ayamba ŋa wo akyele asysyele.

¹⁶ Ee, jaajaa, nde ŋa onini, kaya ka jaa ka lila kempa bizi a be: Kirisite, cuugi ma ka kiriga balaga, amoni nde tele ma Oduduma Santi, ŋa amoni ma antuma-yulu, adugi kanca esi, ayaligi bege nca okiri, asati nde ma lekuma le yulu.