1 Timote 1 - Tege Kiwoyeti (teg) NT Portions

Obigi

¹ Mi, Poole, ntuma Kirisite Zezi ma elyeli e Njyami, Ovuzigi a bizi a be, ŋa Kirisite Zezi, tari le bizi a be.

² Ma Timote, mwana a mi wo taataa nca lila: ndi Njyami wo Taara ŋa Kirisite Zezi Mfumu a bizi a be kampa we puga, ŋa nya bila kadusu.

Lesa oyeri ma eyizigi beebi

³ Mva kampi mi we kawasi ma ntini ye kiigi yie mi Masedoyine, ka ka Efeze. Baari ake kakwa ba ayiziga eyizigi ba alaa. Lyele bo andaga ka maasa.

⁴ Ndi bo andaga amaami ma alaa ŋa okanda wo olaa wo ankaaga! Ma kayaa bila labila leebi, ma bwori maya bila etogi, ŋa ma kaciina ma kasa osala ba Njyami ŋi, ma ayayi ma lila.

⁵ Eyiezi bya ma kasa ayaligi kajya ake ŋa baamon bila jya le lepala ma otuma wo cece, ŋa ma oduduma woove, bila lila le taataa.

⁶ Ake ayeni lala ma njila yia, bo anyuoŋi nca labila le ojiri.

⁷ Bo ba asaga kaka ayizigi aNgiri, ŋaa bo ba kayuga ma laga bo ŋi, se maami ma alyele bo tari onyaŋa.

⁸ Bizi le yayi ni Ngiri ŋa ove, aka lesa ma jii nde yemiŋi.

⁹ Leyuga kalogo kamon: Ngiri aki sa ma baali tele ŋi. Yo asi ma baari baba abiza nyima, ma baari ba kamba, ma baali ŋa nkeri, ŋa ma angaa maami maabi. Ngiri ma baba abiza nyima Njyami se maali cece, ma baba buma ataara a bo sikali anguugu a bo, ma ambumi a baari,

¹⁰ baali ma opala, abalaga ba baasa abaala bila abuga ba abalaga, akaazi bila akaazi, ma antege ayiga, ma baari ba alaa, ma baari ba baasa okezi wo alaa, ŋa ba baasa ekemi ma eyizigi e cece.

¹¹ Eyizigi bya eli nca Ncya Yeemve ye ampi mi ŋa ye fi mpila Njyami wo lekuma, ŋa ove.

Poole ompi Kirisite leve

¹² Mi e mpa Kirisite Zezi Mfumu a bizi a be leve wo mpi mi mpari ma kasa kasali ka mi. Mi e mpa nde leve ma nde wo legi tari le nde ma kayaga mi ma kasali ka nde.

¹³ Ŋa kalakala, mi kiigi ntuga nde, mi kiigi mpa baari a nde mpasi, mi kiigi ŋa nkeri. Ŋaa Njyami moni mi nya, kabila mi kiigi sa mon ma leya kali, ŋa mi kiigi kini yalaga Kirisite ŋi.

¹⁴ Ŋa puga le Mfumu a bizi a be kiigi levuli kayila mi, bila lila ŋa jya leeli ŋa Zezi Kirisite.

¹⁵ Lemono mbari ye jaajaa, eli ba abuna kayalaga bwori: Kirisite Zezi yi nca okiri ma kavuzuga baari ba angaa maami maabi. Kanca bo bwori mi vuli.

¹⁶ Ŋaa ma bwa, Njyami mvyeri mi otuma nde woove, mini Kirisite Zezi amvyere mi, ndi vuli abuga ma amaami obi, ejili e nde njwori mva ocya ma baali bari, ayalaga nde ŋa bo abaga omwon ba obu-obu.

¹⁷ Ndi baari bwori abwono Njyami. Nde Mfumu wo obu-obu, wo aka kpa ŋi, ndi mbuuru aka mono ŋi, Njyami ndeme otu. Ndi lekuma leka bila nde obu-obu! Ee bwa.

¹⁸ Timote mwana mi, mono eyizigi ba empa mi we. Nde oli taataa bila mbari ye antuma Njyami ma acuzigi yila we ma antini akala. Mbari yia ye mpa we kawasi, ŋa we yiga abuna jwana mvuru yeemve.

¹⁹ Kyele lila bila otuma woove. Ake abiri ma kayuga etuma e bo beeve ŋa bo abiizi lila le bo mva kafunuŋa vaari nca anja.

²⁰ Kanca bo abaragi Imene ŋa Alesander. Mi mpi bo ŋa Satan, ma bwa bo aya ndi ba kantuga Njyami ŋi.