Zacarías 8 - Toba del Oeste

Ñe'me Jaliaĝanec jetaque yachalo'te da'me leyalaqataĝanaĝac ga'me lec'oqo'tepi

¹ Joñe'me Jaliaĝanec jo'ne napacalegue ena'uac jayem yanem da'me 'laqatac da'me enaac:

² «Naq'aeta nayi jayem Jaliaĝanec jo'ne ñapacalegue ena'uac, ñenaĝategue: Yataqata let'adaic joda'me yoqopich'i di'me Sión, qama'le nayi qa'a yataqata jalematayalo jogaa'me laute'u.

³ »Nataq'aen ñenaĝategue jenjo': Joote ji'iyelaĝa di'me Sión qaedi male jona'ague. Qama'le jena'me jenjo' Jerusalén qomle qoyen lenaĝat da'me “Noic jo'ne jayem p'iya'a”, nataq'aen jodi'me Sión qoyen lenaĝat qomle da'me “Qajoĝonaĝa jo'ne ja 'nalegue”.

⁴ Gaa'me 'yaĝaicachidi uotaĝa 'yaĝainadi' male yaqanate't da'me yitaĝa neta'ñalo qomle jogaa'me nemaqa'te jenjo' Jerusalén; te'me yaco'teguet joga'me lajele't qa'a male yataqata 'yaĝaicachidi jogaa'me.

⁵ Nataq'aen gaa'me ñoqolqapi uotaĝa ñoqolel yataqata jalcote da'me yeualaĝae'n naajo' nemaqa'te jena'me jenjo' noic.

⁶ »Nataq'aen ñenaĝategue jenjo': Qomle gaa'me 'niyoqo'te jenjo' yalaqapi male uelna't da'me yataqata qalaq da'me yitaĝa naq'aeta jenjo'. Qalaĝaja da'me jayem yataqata ja jen qalaq jena'me jenjo'. Jayem Jaliaĝanec jo'ne ñapacalegue ena'uac, naq'aeta ga'me ñenaĝategue.

⁷ »Nataq'aen ñenaĝategue jenjo': Qomle yitaĝa je'uolegue jenjo' yalaqapi, jen 'niyelaĝatequena, chiyoĝotegue di'me chauo'o jenjo' aleua, nataq'aen chiyoĝotegue di'me chaje'ma.

⁸ Ñauegalo qomle jena'me Jerusalén qaedi yitaĝa neda'ña, qama'le naa'me naajo' mach'e yalaqa qomle, qama'le da'me jayem mach'e Nedios, mach'e jayem jo'ne yataqatelegue nataq'aen chimaqachiñe.»

⁹ Jenjo' 'laqatac ñe'me Jaliaĝanec jo'ne napacalegue ena'uac: «'Noota qom yataqata a'nañaĝachi, da'me ami jo'ne joote auomachiiya jaajo' 'laqataqa gaa'me 'yaqatanaĝanaĝanaqa, chiyoqotelegue ca'li qoya'uo joga'me p'añe jenjo' ñetamenaĝaiqui.

¹⁰ Qa'a jaajo' noloqo'ote ca'li maliaĝa ja qo'noĝojeguem jena'me tamenaĝaiqui, qaya'te nejetenague'j gaa'me jiyaĝa'u, uotaĝa ta'le qot'onataĝanalo gaa'me yejidi. Nataq'aen yajouaĝa't jogaa'me laute'u, qaya'te 'nemaĝac jenjo' jiyaĝadipi, qa'a male je'n onolqa'tape da'me deloiquitapega't.

¹¹ Qalaĝaja nayi, jogaa'me ueteda'a jena'me jenjo' noic, male ja je'eteque ta'le ena'am ca'li yemta. Mach'e jayem jo'ne Jaliaĝanec jo'ne ñapacalegue ena'uac, naq'aeta da'me 'yaqatac.

¹² Qa'a da'me 'nemaĝac male ami qoyanema. Onolqa'tape ami uetauelo gaa'me uva lichidijat, jalcote qomle jaga'me jala. Jena'me aleua, yema joga'me chiyaqayi; jena'me piyem, ga'me loiquiaĝa. Yema jena'me jenjo' ami janema, tayi da'me ovitapega jenjo' noic.

¹³ Ena'am da'me ami, Judá laje' uotaĝa Israel c'oqo'tepi, ca'li yataqata ami qo'yota'n gaa'me ale'u lael, qalaĝaja nayi male ami ñec'alaĝatedegue, chayovida'a yataqata ñichigaĝategue da'me adeuoyaĝaqui. ¡Ena'te at'oiyi, a'nañaĝachi!»

¹⁴ Jenjo' 'laqatac ñe'me Jaliaĝanec jo'ne napacalegue ena'uac: «Ca'li yelnataĝac da'me yataqata ja'uo lachoĝode'j dia'me adet'aldi', qa'a yataqata e'n jalemata. Qama'le nach'ena ca'li jenjo' ja'uo.

¹⁵ Qalaĝaja nayi, male je'etec di'me Jerusalén da'me yataqata 'noota qomle, nataq'aen jona'me Judá. Qo'oche' male ena'te at'oiyac nayi.

¹⁶ 'Noota qom nach'e eta't auauoyi jena'me jenjo': nach'e eta't a'uaĝachitac da'me eja, onolqa'tape da'me ami, nataq'aen auauoyi nec'atenaĝanaĝac jo'ne yataqata eja, ga'me mach'e 'lonatac jenjo'.

¹⁷ Ena'te aua'uo lachoĝodec joga'me adaqaya, uotaĝa aua'uo at'aqatac qom ja eja, qa'a yataqata jiquiya'a jena'me jenjo'. Naq'aeta jenjo' 'yaqatac, mach'e jayem Jaliaĝanec.»

¹⁸ Joñe'me Jaliaĝanec jo'ne napacalegue ena'uac jayem yanem da'me 'laqatac da'me enaac:

¹⁹ «Nale anoqouaqachela't ga'me onolec nolo', joga'me auoĝoic jo'ne cuarto, nataq'aen ga'me auoĝoic jo'ne quinto, uotaĝa séptimo chayovida'a décimo, qalaĝaja qomle male auauoyi adamaiqui, auauoyi adeualayaĝaqui, ami c'oqo'tepi di'me Judá. Qama'le yataqata adoqopichiya da'me 'nemaĝac nataq'aen joga'me yataqata eja.»

²⁰ Jenjo' 'laqatac ñe'me Jaliaĝanec jo'ne napacalegue ena'uac: «Na'taquena qomle ga'me jiyaĝadipi, chiyoĝoguelo naa'me noyaqa laqaya',

²¹ qama'le onolqa'tape jogaa'me noyaqa da'me t'aqataĝa'tape, dojetapega't: “'Noota qom yataqata jelaqaque joñe'me Jaliaĝanec jo'ne napacalegue ena'uac, jajelaĝanoqot qaedi nichigaĝategue da'me qadamaic.” Qama'le jogaa'me laqaya' 'yadeteguet: “Qo'mi nataq'aen jec'ataĝa.”

²² Yataqata qonec'ata jena'me Jerusalén, jalcote gaa'me noyaqa, ale'u lael jo'ne let'adayaqa, qa'a yataqata jayem qoyelaque, mach'e jayem Jaliaĝanec jo'ne ñapacalegue ena'uac, qaedi ñichigaĝategue da'me lamai'j.

²³ Qomle gaa'me noloqo'ote, uo'oe jogaa'me diez jiyaĝa'u jo'ne ja 'lachaqa'tedi, male yacotedapegue' ga'me leuo lae joga'me onolec Judá le'ec qama'le etedac: “Jetaque ami qolaĝaguelo, qa'a jomachaqatapelegue da'me ami ue'tajopa joñe'me Dios.”»