Zacarías 7 - Toba del Oeste

Joga'me jiyaĝadipi te'me noqouaqatela'ajalo ca'li, qalaĝaja joñe'me Jaliaĝanec ja 'yamaqate'n

¹ Jo'me nolo' jo'ne cuatro, auoĝoic jo'ne noveno qoyen lenaĝat Quisleu, uo'e jo'ne cuatro ca'li 'uo lejaliaĝa ñe'me Darío, qama'le joñe'me Jaliaĝanec ya'uo 'laqatac, yanem joñe'me 'laqatanaĝanaĝanec jo'ne Zacarías.

² Ca'li jaajo' noloqo'ote, di'me noic jo'ne Betel qoyamaq ca'li joñe'me Sarézer nataq'aen joñe'me Réguem-mélec, naequetapegue'to gaa'me lamaĝa's, qaedi yauote nachoĝodenaĝac yate'm joñe'me Jaliaĝanec.

³ Nataq'aen male yataqata yena't gaa'me Dios 'laqatanaĝanaĝanaqa, chayovida'alo gaa'me tamenaĝaiqui lo'ol jo'ne ueteda'a ga'me 'lemec joñe'me Dios: «¿Qo'li maliaĝa jauoqotac jenjo' qanoenaĝac nataq'aen cha'li ja qaueque'e, nale yovita joga'me auoĝoic jo'ne quinto yemeda naa'me 'uoidi, jo'ne joote jauoqotac chayovida'a nayi?»

⁴ Chane'eja joñe'me Jaliaĝanec jo'ne napacalegue ena'uac jayem yanem da'me 'laqatac da'me enaac:

⁵ «A'uaĝatem yema joga'me jiyaĝadipi jena'me jenjo' aleua, nataq'aen jogaa'me tamenaĝaiqui lo'ol: “Joote yenoĝodegue setenta naa'me 'uoidi da'me auauoyi nale da'me ja auequiye nataq'aen anoyeñitac, nale yovita ga'me auoĝoic jo'ne quinto nataq'aen ga'me séptimo. Qalaĝaja, ¿qo'li yataqata jayem a'nonaĝachiigui nale auauoyi da'me dojo'?

⁶ Qa'a nale auequiye uotaĝa aniyomi, mach'e auauoyi qaedi chiyaqayi da'me adamaiqui.”»

⁷ ¿Qo'li ja nach'ena jenjo' nenaĝategue ca'li joñe'me Jaliaĝanec, ca'li uo'oe dia'me 'uaediñe 'laqatanaĝanaĝanaqa joñe'me Dios? Ca'li di'me Jerusalén uetaue da'me 'nemaĝac, chayovida'a da'me yataqata jalcote ga'me jiyaĝadipi, nataq'aen gaa'me noyaqa laqaya' jo'ne leje'gue jenjo', chayovida'a naajo' ale'u lael jo'ne Négueb nataq'aen jena'me aleua jo'ne nalo'ta't.

Ca'li male ja qoyoqo'cha, chiyaqayi ca'li qoyaue'j ga'me Israel lec'oqo'tepi

⁸ Joñe'me Jaliaĝanec yanem ca'li da'me 'laqatac ñe'me Dios 'laqatanaĝanaĝanec jo'ne Zacarías qama'le t'aqataĝanem:

⁹ «Jenjo' jo'ne am jamaĝalegue: 'Noota qom yataqata ja auoqoviñi nale 'uo joga'me jetaque auauoyi, ami onaĝayaqa loe'j, chayovida'a yataqata avichoĝodeñi' yemeda gaa'me adaqayadi'.

¹⁰ Ena'te aueladiidegue gaa'me p'ael uotaĝa gaa'me jape'l, gaa'me ja 'lachaqa'tedi, chayovida'alo jogaa'me qaya'te yauata. Ena'te adelnataĝaqui qaedi auauoyi lachoĝodec ga'me adayii.»

¹¹ Qalaĝaja di'me noic yataqata nemaneguet qaedi ya'uo jenjo', yema netauoĝoteguet, ena'am ta'le ja domachi'y.

¹² Yataqata e'n t'añi'y naa'me lequidiaqatel, ena'am joga'me qa' jo'ne onaĝaic lenaĝat diamante, qaedi ja naquiaĝanalo naajo' napaĝaguenataĝanaĝaco, chayovida'alo jogaa'me lamajoĝonaĝaco ñe'me Jaliaĝanec jo'ne napacalegue ena'uac. Jenjo' 'yaĝatetedac ca'li gaa'me 'uaediñe Dios 'laqatanaĝanaĝanaqa, da'me uauelo da'me lañoqotaĝanaĝac ñe'me Jaliaĝanec. Chane'eja ca'li ñe'me Jaliaĝanec yataqata dalemata,

¹³ qama'le enaac: «Ena'am da'me ja jayem 'te naquiaĝata ca'li jiyaĝatapegalo, qama'le nach'e ena'am qomle da'me ja ñaquiaĝanalo, qom te'me jayem yiyaĝatedapecot.

¹⁴ Chane'eja jen laguedelegue gaa'me noyaqa laqaya' jo'ne ja qoyateto'n. Chane'eja nayi joga'me 'naleua' male totapega't, jo'ne qaya'te yaqanatet ta'le na'ña. Jenjo' aleua te'me onaĝaic ca'li, qalaĝaja jenjo' jiyaĝadipi yeleguemaĝa't nayi da'me yataqata totapega't.»