Zacarías 4 - Toba del Oeste

Nauanaĝanaĝac jo'ne 'uo jaga'me coyadaĝanaqate nataq'aen gaa'me e'epa jo'ne olivo

¹ Yitaĝa 'niyelaq joñe'me piyem le'ec ca'li jayem dojetapegue', qama'le jayem noqotoĝon, ena'am nale joga'me qonoqotoĝon nale t'ochetac, qama'le jayem yenat:

² «¿Jach'e ga'me auana?» Qama'le ja'ateguet: «'Uo jaga'me coyadaĝanaqate jo'ne yataqata oro, chayovida'a uo'oe gaa'me aceite lete', da'me qayaje'meque. Jauana da'me uo'oe siete coyadaĝanaqa'te jo'ne naqaenaua yeloteda'a ñe'me aceite qa'a 'uo joga'me ladic.

³ Jenjo' ne'tot jañe'me coyadaĝanaqate, uo'oe jogaa'me dos e'epa jo'ne olivo, ue'ta onole na'me yayaten, laqaya ue'ta na'me 'nemaq.»

⁴ Paja'a jenat joñe'me piyem le'ec jo'ne jayem ne'tajop: «Am yejaliaĝanec, ¿jach'e ga'me yelo'teguet jena'me jenjo'?»

⁵ Joñe'me piyem le'ec jayem 'yateguet: «¿Qo'li ja auayaten joga'me yelo'teguet?» Qama'le jenaac: «Ja jayaten, am jaliaĝanec.»

⁶ Qama'le enaac joñe'me: «Maliaĝa queta jenjo' 'laqataĝanaĝac joñe'me Jaliaĝanec, yelo'ta joga'me Zorobabel: “Da'me adomataĝanaĝac ja chiyaqayi ga'me coicopi, uotaĝa yema ga'me at'añaĝaqui; yejamaq jena'me jenjo' yañoqotaĝanaĝac. Naq'aeta da'me 'yaqatac, mach'e jayem Jaliaĝanec jo'ne ñapacalegue ena'uac.

⁷ ¡Qaya'te nauaneguet da'me ladiquiyaĝac joñe'me Zorobabel, uotaĝa ta'le ga'me qajoĝonaĝa t'adaic! Qomle qa'a am pal, qama'le yitaĝa nalo'ta't jena'me aleua, qom am dajotalegue joñe'me Zorobabel. Qa'a joñe'me male yana'ña ñe'me tamenaĝaiqui joga'me qa' jo'ne p'ajaye, qama'le joga'me jiyaĝadipi 'nalaĝadijeguem, nenaĝategue: ¡Yataqata onaĝaic jena'me jenjo', yataqata onaĝaic!”»

⁸ Yem da'me dojo' qama'le yitaĝa 'uo da'me 'laqataĝanaĝac ñe'me Jaliaĝanec jo'ne jayem 'yaĝatem:

⁹ «Zorobabel ca'li ya'uo ga'me 'lonatac jo'ne qa' lojoche jo'ne p'añe jenjo' tamenaĝaiqui, qama'le naqaeñe qomle 'noota ta'le yomat jenjo', qaedi male yataqata qoyayaten da'me naqayem jo'ne am ñamaĝaquena, mach'e jayem Jaliaĝanec jo'ne napacalegue ena'uac.

¹⁰ Jogaa'me ca'li jo'ne ja yataqata e'n eja jenjo', ca'li yemta 'uo jenjo', nayi male made'tape qom yauata joñe'me Zorobabel, da'me male yomat jenjo' 'nonatac.» Yem ca'li joñe'me piyem le'ec yitaĝa enaac: «Naa'me naajo' siete coyadaĝanaqa'te naqaenaua 'lai'te joñe'me Jaliaĝanec jo'ne coletedapelegue jena'me aleua.»

¹¹ Cha'li jenat ñe'me piyem le'ec: «¿Jach'e naa'me naajo' dos e'epa jo'ne olivo, da'me onole'tape na'ñalo naa'me lael janjo' coyadaĝanaqate?»

¹² Nataq'aen yitaĝa jenat: «¿Jach'e joga'me yelo'teguet naa'me naajo' dos olivo lepeel, jo'ne na'ñalo naa'me lael gaa'me aceite ladico jo'ne oro, qama'le novitalo naajo' coyadaĝanaqa'te?»

¹³ Joñe'me piyem le'ec jayem 'yateguet: «¿Qo'li ja auayaten joga'me yelo'teguet?» Ja'ateguet: «Ja jayaten, jaliaĝanec.»

¹⁴ Qama'le jayem 'yateguet: «Naa'me naajo' yelo'tegueta gaa'me dos jiyaĝa'u jo'ne qoyecodelo'te ga'me aceite qaedi t'onataĝadeuo'o joñe'me Jaliaĝanec, mach'e loĝot yema jena'me aleua.»