Zacarías 3 - Toba del Oeste

Nauanaĝanaĝac jo'ne uo'oe gaa'me dalaĝayaqa leuo lael ñe'me tamenaĝaiqui lo'o Josué

¹ Yitaĝa ca'li 'uo ga'me jayem yaloĝona joñe'me Jaliaĝanec, qama'le jauana joñe'me Josué, jenjo' jiyaĝaua mach'e lajoĝola't gaa'me tamenaĝaiqui lo'ol. Jenjo' yataqata nechatetañe ca'li, dajo'taguet joga'me piyem le'ec jo'ne lamaĝajec ñe'me Jaliaĝanec. Ga'me ueta'ña joga'me yayaten ñe'me Josué, 'uo joñe'me piyem le'ec laqaya jo'ne 'uauaĝaic, jo'ne male 'uaeñe da'me paja'a 'uauot.

² Qama'le joñe'me piyem le'ec jo'ne Jaliaĝanec lamaĝajec dojapegue' ñe'me piyem le'ec jo'ne 'uauaĝaic, enaac: «¡'Noota qom joñe'me Jaliaĝanec yataqata am yecochaq, qa'a joñe'me yataqata niquiyaye di'me Jerusalén! ¡Joñe'me yataqata am yecochaq, qa'a jenjo' jiyaĝaua ena'am jaga'me poqo jo'ne edetañgui, yemta qonecadeta!»

³ Josué naa'me yatedañe yataqata eja paĝachiguilo, da'me nechate'tajop joga'me piyem le'ec jo'ne Jaliaĝanec lamaĝajec.

⁴ Qama'le joñe'me piyem le'ec yamaĝalo'te jogaa'me lecochaĝa'u qaedi qonaqa't jogaa'me ja 'noe'n leuo lael ñe'me Josué. Yem qama'le enapega: «Auec'aten jenjo' jo'ne yelo'teguet da'me male japalaĝat da'me adaviyaĝajet. Qama'le nayi, auaediñe adeuo lael jo'ne onaĝayaqa.»

⁵ Qampaja'a jenaac: «'Noota qom qoyanaye na'me laqaic joñe'me Josué jaga'me jaĝa'to dalaĝae!» Chane'eja naq'aeta da'me qoya'uo. Yem qama'le qoye'n yaediñe leuo lael jo'ne 'noe'n. Qalaĝaja joñe'me piyem le'ec maliaĝa nechate'tajop.

⁶ Yem ca'li jenjo' joñe'me piyem le'ec dojapegue' ñe'me Josué:

⁷ «Naq'aeta da'me 'laqatac joñe'me Jaliaĝanec jo'ne napacalegue ena'uac: “Oque'tegue jenjo' mach'e yadic qaedi auauo'oe yemeda naa'me am jamaĝalo'te. Qom aua'uo jenjo', qama'le naqa'am qomle am neteloqo't ñe'me ñetamenaĝaiqui let'adaic. Jenjo' yataqata adetela, nataq'aen joga'me dajoya'ya ga'me, qama'le jayem qomle ja'uo da'me ouauelo gaa'me piyem laje' jo'ne nataq'aen yamaĝa's.

⁸ Cha'li yataqata anaquiaĝana jenjo', am Josué jo'ne yataqata am lajoĝola't gaa'me tamenaĝaiqui lo'ol. Nataq'aen 'noota qom yema qodomachiya jenjo' jogaa'me adecochaĝa'u tamenaĝaiqui lo'ol. Qa'a naqa'ami jo'ne aueloye'tegueta gaa'me noloqo'ote onaĝayaqa jo'ne na'te', qom male jaloĝon joñe'me yamaĝajec jo'ne qoyenaqatenec da'me Nolelijeguem.

⁹ Joote jen 'uauegue joga'me qa' jo'ne siete naa'me 'lai'te, dajota'ye ñe'me Josué, jo'ne mach'e jayem ja'uo yedaĝanaĝac qaedi jedelegue ga'me qa'. Qama'le yem, da'me onolec joga'me nolo' da'me japalaĝat yema loec jenjo' aleua.

¹⁰ Qom yovita jena'me jenjo' nolo', male onolqa'tape da'me ami anachechiyat, qa'a male ami uauelo joda'me 'nemaĝac, ovi'tot joga'me paqal joga'me uva lichidijat, nataq'aen jaga'me epaq jo'ne higuera. Jayem jo'ne Jaliaĝanec jo'ne ñapacalegue ena'uac, naq'aeta jenjo' 'yaqatac.”»