Zacarías 2 - Toba del Oeste

Nauanaĝanaĝac jo'ne 'uo joga'me naloqotenaĝanaĝat

¹ Yitaĝa ca'li 'uo joga'me yauanaĝanaĝac: 'uo joga'me jayem naloĝoneguet jo'ne jiyaĝaua lajoqot'a joga'me laloqotenaĝanaĝat qaedi 'uo joga'me naloqoten.

² Qama'le jenat: «¿Jach'e ga'me auajoyi?» Joga'me jayem 'yateguet: «Jajoyi jodi'me Jerusalén, qaedi ñaloqoten jodi'me noic, qaedi jayaten jach'e eeta nalo'taguet da'me chimaqategue, chayovida'a joga'me loiquiaqa'.»

³ Eja jauana ca'li ec joga'me piyem le'ec jo'ne jayem dojetapegue' quidi, qama'le 'uo joñe'me piyem le'ec laqaya jo'ne ca'aguet,

⁴ jo'ne t'aqataĝanem: «Anaqalegoq qaedi auojapegue' jo'me nejoq jo'ne yachitac ga'me laloqotenaĝanaĝat: a'uaĝatem jodi'me Jerusalén da'me yitaĝa qona'ña qomle, jo'ne yataqata jalcote qomle joga'me neda'ña, chayovida'a joga'me lalopi. Chane'eja male ja qoyaqanatet ta'le 'uo joga'me nequepaĝanaĝat.

⁵ Qama'le joñe'me Jaliaĝanec 'yaĝatetac: “Da'me jayem jena'am qomle ga'me nequepaĝanaĝat jo'ne 'uo joga'me dole' lauaq da'me jecoleejop di'me Jerusalén, nataq'aen qom jouañe laeñi jenjo' noic, qama'le jaloĝon da'me yejaliaĝa.”»

Joñe'me Jaliaĝanec nec'alaĝategue qomle ga'me c'oqo'tepi

⁶ Ñe'me Jaliaĝanec enaac: «Ami yalaqapi, ami jelagaĝatelo'te ca'li gaa'me ale'u lael, qalaĝaja nayi ñenaĝategue jenjo': ¡'Noota qom paja'a auajoyiye! ¡Oquiya'e jenjo' aleua jo'ne p'aĝajom!

⁷ ¡Ami Sión laje' jo'ne ovi'ta jodi'me Babilonia, ami e'teguelo da'me oquiye! Jayem jo'ne Jaliaĝanec naq'aeta da'me 'yaqatac.»

⁸ Qa'a joñe'me Jaliaĝanec jo'ne napacalegue ena'uac, jo'ne jalcote da'me lejaliaĝa, jayem yamaĝalegue jenjo' 'laqataĝanaĝac, qaedi janema yema gaa'me aleua lael jo'ne ca'li ami nouo't: «Gamachaqaega jo'ne ja no'en da'me ami 'yeteque, ena'am ta'le yacona joga'me yataqachiñe ja jejet.

⁹ Chane'eja naqayem qomle mach'e jeloi'ye'to naa'me naajo' noyaqa jo'ne ami e'n ne'uaqa ca'li: male je'eteque qomle qaedi ena'am ta'le adeuodaĝanaĝachi.» Qa'a male yaloĝon da'me lejaliaĝa ñe'me Jaliaĝanec jo'ne napacalegue ena'uac, qaedi male auayachiñe da'me naqaeñe jayem namaĝaquena ca'li.

¹⁰ Yitaĝa joñe'me Jaliaĝanec enaac: «¡A'uonaĝañi qa'a ami made'tape, ami Sión laje'pi, qa'a nayi male ami jonauelo!

¹¹ »Qom 'uo jena'me jenjo', jalcote gaa'me noyaqa male jayem 'niyelaĝadetot, qama'le jenaac qomle: Yemeda naa'me naajo' nataq'aen yalaqa, qama'le eja nataq'aen ami jonauelo.» Qom 'uo jena'me jenjo', male yataqata auayachiñe da'me 'uo da'me lañoqotaĝanaĝac joñe'me Jaliaĝanec, naqaeñe jayem namaĝaquena ca'li.

¹² Joñe'me Jaliaĝanec yitaĝa yiyaĝana ñe'me Judá qaedi yitaĝa na'ña jodi'me mach'e yataqata 'naleua jo'ne ja 'nalegue, qaedi yitaĝa qo'nonaĝachijeguem jodi'me Jerusalén jo'ne noic yataqata niyamaqatac.

¹³ ¡'Noota qom yema jena'me aleua yataqata 'yemaqata da'me qodajoya'aguet ñe'me Jaliaĝanec, qa'a joñe'me male naequena, qo'mi nec'atalo, chiyaqañe jodi'me ja 'nalegue jo'ne mach'e 'lachaqa'!