Zacarías 13 - Toba del Oeste

¹ Yitaĝa enaac ñe'me Jaliaĝanec: «Qom yovita jenjo' nolo', male qoyen 'nouatetaye ga'me noĝop ladic, qaedi nejola'ajalo gaa'me chiyoĝoteguet di'me David, chayovida'alo gaa'me neteda'ña jenjo' Jerusalén, qama'le yaĝadegue gaa'me loeco jo'ne chiyaqayilo da'me male 'yotanaqa.

² Yema jenjo' aleua male yataqata japalaĝa't gaa'me lenaqa'te jogaa'me qop'iyapegalo nale, qaedi ja yitaĝa qouenate'talo. Male jeuodaĝaneque jogaa'me lamaĝa's, nach'egaua jo'ne najaĝayelo da'me lañoqotaĝanaĝac ga'me nepaqal jo'ne ja no'en. Jayem jo'ne Jaliaĝanec naq'aeta jena'me 'yaqatac.

³ Chane'eja qom 'uo joga'me etapela't aqataĝanaĝaic, gaa'me mach'e let'al etedac qomle: “Qomle qa'a adeleu, qa'a a'uaĝate'tape gaa'me ja ejoda jo'ne ch'e auee'tape naajo' 'laqataqa ñe'me Jaliaĝanec.” Qama'le nach'egaua gaa'me let'al male yala't qomle, jouaĝat da'me etapela't aqataĝanaĝaic.

⁴ »Jaajo' aqataĝanaĝayaqa yataqata 'uo qomle da'me lepocoqo' nale jetaque 'yaĝatetedac joga'me lauanaĝanaĝa'j, nataq'aen male ja yaediñe ga'me leuo ga'me 'naqatanaĝanaĝanec qaedi ja doqovinaĝa'n.

⁵ Onolqa'tape etedac qomle: “Ja jayem 'te aqataĝanaĝaic, maq da'me jayem onataĝanaĝaic. Ca'li jayem jaqayi, joote jo'onataĝatapelegue ga'me 'nonaĝa.”

⁶ Nataq'aen qom 'uo joga'me yenat: “¿Jach'e joga'me auachiyoĝoteda'ague naa'me naajo' yédidiñe na'me ado'oc?”, qama'le joñe'me 'yateguet: “Jayem qoye'uaĝan ca'li joue'ta 'lachaqa't gaa'me ñaigaĝa'u.”»

Da'me qo'yeteque qomle gaa'me 'nanaĝatel chayovida'a ga'me neuatoqo't

⁷ Joñe'me Jaliaĝanec jo'ne napacalegue ena'uac eetac: «¡Oñejeguem, am jo'ne nedaĝanaĝat! ¡Anautena ga'me 'nanaĝate neuatoqo't, joga'me mach'e yecochaĝaua! ¡Aualat qomle joga'me, qama'le yataqata nelagaĝa gaa'me 'nanaĝatel! ¡Qama'le da'me jayem jecalo'te gaa'me 'nanaĝate lec'oqo'te!

⁸ Joga'me jiyaĝadipi jo'ne neta'ña jenjo' aleua, jalcote gaa'me yele'u qomle: napacalegue ga'me liiñi jogaa'me nec'aletedaye.

⁹ Qama'le naajo' jo'ne nec'aletedaye qomle je'n tade'ga ga'me dole'. Yataqata je'n yichec, ena'am nale qoye'et jaga'me plata da'me jiyamaĝachiñi. Je'eteque qomle ena'am nale jaga'me oro da'me qo'yiyen, qama'le jogaa'me yemta jayem nenaĝatetedapegue, qama'le ja'ategueta. Male jenaac: “Naqa'ami mach'e yalaqapi.” Qama'le jogaa'me male nenaĝatedegue: “Nach'eñe joñe'me Jaliaĝanec mach'e Qanedios.” Naq'aeta jenjo' 'yaqatac, mach'e jayem Jaliaĝanec.»