Oseas 9 - Toba del Oeste

'Uo qomle da'me lachoĝode'j gaa'me Israel laje'pi, qa'a yajouaĝat joda'me loe'j

¹ Ami Israel laje'pi, ena'te ami made'tape, ena'te auadenaĝachi' gaa'me noyaqa laqaya' nale auajochitac nataq'aen a'ualaqaitac, qa'a ena'am ta'le ovitaue da'me nequejeguetaĝa ca'li oquiya'e joñe'me mach'e Anedios. Qa'a nale ovi'ta ga'me ua'ña jaga'me trigo jala jo'ne joote qonaqat, qama'le 'uo da'me adamaiqui da'me auañema ga'me adajaqajequi jogaa'me qop'iyapegalo jo'ne ja ejoda.

² Chane'eja male qaga'te jala qomle joga'me trigo nataq'aen joga'me uva jala; te'me 'uo qomle joga'me lataĝa, qalaĝaja jaleca.

³ Ami Efraín lec'oqo'tepi, male ja oñita'ña ga'me mach'e a'naleuai, jo'ne ami yanema ca'li ñe'me Jaliaĝanec, qa'a a'viyelaqa'y qomle di'me Egipto nataq'aen di'me Asiria, qama'le aualiqui ga'me niqui'yaĝat jo'ne te'me ja ami 'te qoyaje'tema.

⁴ Male ja auaqanachichi ta'le auauoyi ga'me adajaqajequi jo'ne uva li'i, uotaĝa ta'le auañem ga'me adajaqajequi jo'ne qoyegoue nale. Joga'me pan lae jo'ne aualiqui qomle ena'am da'me lamaic joga'me pan nale yemta 'uo joga'me yeleu, qama'le ga'me yalic dojo' pan male taue joga'me ja no'en. Qa'a dojo' pan nach'edata da'me qoyalic qomle: qaya qomle ga'me lae jo'ne qoyen najaqajec qaedi qoyanem joñe'me Jaliaĝanec.

⁵ Chane'eja, ¿jach'e joga'me auauoyi qomle, qom yovita ga'me nolo' jo'ne tachigui ga'me adeualayaĝaqui, joga'me nolo' jo'ne yataqachiñe qo'nonaĝachigui joñe'me Jaliaĝanec?

⁶ Qa'a mate mane'e auajoyiye qomle, qaedi ami yaĝa'n ga'me qonolaĝachiñe, qalaĝaja gaa'me Egipto laje'pi male ami yaconalo, qama'le ua'a da'me ami qoyejedi'ña qomle di'me noic jo'ne Menfis. Ga'me auañiya jo'ne plata, yataqachiñe yejamaq nenoĝojeguem jaga'me poqo, chayovida'a joga'me adomachaqadi' male najeguem qomle jaga'me yaĝat.

⁷ ¡Male naditeda'a gaa'me noloqo'ote qom 'uo da'me adachoĝodequi, qom ami qoye'uaĝa'n, yajouaĝa't daa'me adoecodi' jo'ne ja 'noe'n! Qama'le ami Israel laje'pi male auayachiñe queda'me yataqachiñe eja. Qalaĝaja ch'e aue'viñetac jenjo' aqataĝanaĝaic, da'me aueñiyaac nale jenjo': «¡Dojo' yataqachiñe chiyoĝojec, ena'am ta'le qaya'te yayaten!» Qama'te aueñiyaac jenjo' qa'a yataqachiñe jayem adiquiyayi'ya, yajouaĝat da'me yataqachiñe ami najaĝayelo joda'me ja no'en.

⁸ Dios jayem namaĝaquena ca'li, da'me jayem jo'ne 'laqatanaĝanaĝanec joñe'me, qaedi ami jevite'talo, ami Efraín lec'oqo'tepi. Qalaĝaja da'me ami yataqachiñe ja jayem 'te aualemaĝachi, chayovida'a nale ovitaue jena'me netamenaĝaiqui joñe'me Dios yataqachiñe jayem adiquiyayi'ya.

⁹ Yataqachiñe ami uauelo jena'me ja no'en, ena'am jogaa'me neteda'ña ca'li di'me Guibeá. Qalaĝaja joñe'me Jaliaĝanec ja yapalaĝate'ta qomle naajo' adoecodi', qama'le ya'uo qomle ga'me ane'uaĝanaguequi.

¹⁰ 'Laqatac joñe'me Jaliaĝanec, enaac: «Ca'li yemta jauana jodi'me Israel qama'le yataqachiñe jayem matac: jena'am ca'li joga'me yauana ga'me uva lichidijat nale ue'ta joga'me aleua jo'ne totapega't. Gaa'me 'uaediñe adapidii yataqachiñe onaĝayaqa, ena'ama ca'li gaa'me higo jo'ne yemta yi't. Qalaĝaja ca'li yec'adeta di'me aleua jo'ne Baal-peor, qama'le paja'a tadetot joga'me qop'iyapega jo'ne yataqachiñe jouala. Chane'eja male ja 'noe'n jogaa'me, eda'am joga'me qop'iyapega jo'ne noqopideta.

¹¹ Da'me 'lonaĝac di'me Efraín ena'am ta'le uayo qomle, ena'am da'me ec ga'me mayo'. Qama'le ja yitaĝa 'niyiñe joga'me notolec, male qaga'te ta'le yauo jo'ne qo'uaĝae nataq'aen ja yitaĝa 'uo jaga'me c'oe.

¹² Chayovida'a da'me qom 'uo jaga'me te'me c'oe, qama'le jeuodaĝanec qomle joga'me c'oĝot: qaya'te ta'le jen nec'aletaye. ¡Yataqachiñe choĝodac jenjo' jiyaĝadipi qom male jeca'ae!

¹³ Am Efraín, am jauana ca'li da'me am onaĝaic, auena'am ga'me chaic jo'ne ua'ña ga'me nanaĝanaqa'; qalaĝaja nayi auaviquiyiguelo jogaa'me ac'oqo'tepi qaedi yeleuedalegue ga'me nalataqa'.»

¹⁴ Am Jaliaĝanec, ¡'noota qom auanema joga'me jetaque auanema jogaa'me! ¡A'ueteque qomle da'me qaya'te lec'oĝochiyaĝa'j, nataq'aen naa'me lotetel, aue'n qomle da'me qaga'te lochi'!

Lalemataic joñe'me Jaliaĝanec jo'ne yanema jena'me Israel lec'oqo'tepi

¹⁵ 'Laqatac joñe'me Jaliaĝanec, enaac: «Chiyoqo'ta ca'li ueteda'a di'me aleua jo'ne Guilgal, male yema yauote da'me ja no'en, qama'le ua'a ca'li jiquiya'alo. Chane'eja male jeladedegue qomle jenjo' 'yachaqa', yajouaĝa't daa'me 'lonataĝanaĝaco jo'ne yataqachiñe ja 'noe'n. Male ja yitaĝa ta'le joqopitalo gaa'me, qa'a yemeda jogaa'me lajoĝola'te nach'e eta't da'me jayem ye'uetedac.

¹⁶ Efraín 'uo nayi da'me lachoĝodec, ena'am jaga'me epaq nale qaqata joda'me pata', qama'le ja yitaĝa 'uo nale jaga'me jala. Chane'eja ena'ama naajo' Israel laje'pi: qom te'me uo'oe gaa'me c'oqo'te, qama'te yataqachiñe je'n yele'u qomle.»

¹⁷ Jenjo' noic yataqachiñe ja yoqo'cha joñe'me Ñedios. Chane'eja joñe'me male de'uotapegueta jogaa'me, qama'le jalcote da'me lejomaĝa'j qomle, da'me quetedalegue jenjo' aleua.