Oseas 7 - Toba del Oeste

¹ Qom jetaque ñec'alaĝatedegue naa'me naajo' yalaqapi, qama'te nach'edata da'me qoyauanalo daa'me loeco: yemeda naa'me pecayaqa nataq'aen cachaĝayaqa, qama'le quetayelo naa'me emaqa qaedi decachi'y, chayovida'a jena'me naq'aic nouo't joga'me ta'yedi.

² Ja jayem 'te uenateteda'a da'me ñetouetac da'me ja no'en jo'ne yauote. Qalaĝaja daa'me 'lonataqa male yapadelo'te jogaa'me, qama'le yema jec'atetac nayi.

Ja yataĝalo'te gaa'me jaliaĝanaqa

³ »Yajouaĝa't jogaa'me loeco nataq'aen gaa'me loqovinaĝanaĝaco, e'n matac ñe'me lajoĝola't nataq'aen gaa'me jaliaĝanaqa.

⁴ Qaya'te onolec ta'le ja yoqovin jaga'me loua, qa'a yemeda jogaa'me eda'am jaga'me pan nauoĝotaĝaiqui jo'ne joote p'e: qama'le joñe'me pan lo'o dajo'ta nale qaale ga'me nonañejec joote yajediye.

⁵ Ga'me nolo' ca'li ya'uo neualayaĝac ñe'me qadajoĝola', qama'le uo'oe gaa'me jaliaĝanaqa e'n taĝaic joñe'me: nach'egaua gaa'me yauote ca'li da'me dojo' yataqachiñe ye'uetedac ca'li joñe'me qadajoĝola', qalaĝaja joñe'me paja'a da'me e'n naigaĝa'u jogaa'me.

⁶ Qama'le yachedaue jaga'me lequidiaqate qaedi male ja 'noote' gaa'me lelnataĝaco, ena'am nale qoyalonoue jaga'me pan nauoĝotaĝaiqui. Qama'le joñe'me pan lo'o cha'li 'nomategue yema ga'me pi'yaq, qalaĝaja ga'me 'yoĝoñi laqaya, nach'e eta't joda'me yataqata p'e.

⁷ Eda'am jaga'me pan nauoĝotaĝaiqui, qa'a yataqachiñe edetañguilo, qaedi yavi'j gaa'me najoĝola'te. Chane'eja naq'aeta da'me joote qoyegue'm yemeda naa'me jaliaĝanaqa, qalaĝaja qaya'te onolec ta'le jayem yelaque qaedi jichoĝoden.»

Jena'me noic ca'e joñe'me Dios

⁸ Yitaĝa enaac joñe'me Jaliaĝanec: «Joga'me Israel lec'oqo'tepi male 'yamaqate'n jogaa'me jiyaĝa'u jo'ne ja jayem 'te p'iida'a; qama'le eda'am jaga'me pan jo'ne yavic: 'uo ga'me lae jo'ne joote dato, qalaĝaja ga'me lae laqaya maliaĝa ja dato.

⁹ Qa'a joga'me Egipto laje'pi choqoga'me Asiria laje'pi jetaque doĝotaĝatec da'me 'lañaĝa'j ga'me Israel lec'oqo'tepi, qalaĝaja jogaa'me ja nomeda'a da'me dojo'. Male yovita qom 'te da'me loiquiaqa't, qalaĝaja nach'e ena'am ja nomeda'a da'me dojo'.

¹⁰ Ga'me Israel lec'oqo'tepi ja jetaque yauote lelnataĝa'j dalaĝaic, uotaĝa ta'le jayem yelodaque, mach'e jayem Nedios, qa'a yataqachiñe uetedaue da'me ni'yoĝodenaĝa'j.

¹¹ Qa'a eda'am joga'me doqoto' jo'ne dajotapi'ñgui, da'me ja yayaten ga'me ua'a da'me 'nomataqa': qa'a 'uaeñe da'me nachoĝodetot di'me Egipto qaedi qoyichoĝode'n; yem qama'le yec'adeta di'me Asiria.

¹² Qalaĝaja qom ua'a da'me te'me yelodaque jenjo' nichoĝodenataĝanaĝac, male yoĝonaqa, ena'ama jogaa'me mayodi, qama'le yataqachiñe ja'uo qomle da'me lachoĝode'j, yajouaĝat da'me ja no'en jo'ne yauote.

¹³ »¡Degueja da'me lachoĝode'j qomle, qa'a yataqachiñe jayem yaĝadiñe! Yataqachiñe ja no'en joga'me ualo'te qomle, yajouaĝat da'me yataqachiñe jayem nauteta. Maliaĝa 'uo da'me yelnataĝac ta'le ñec'alaĝatedegue jogaa'me, qalaĝaja nach'edata da'me jayem yachedalegue da'me loqovinaĝanaĝa'j.

¹⁴ Nale uetalo'te jogaa'me lela'te, yataqachiñe noye'tape qa'a 'uo da'me lachoĝode'j, chayovida'a da'me yauo'oe nale jogaa'me yedidiñe. Qalaĝaja naa'me netamenaĝaco ja ejoda, dite da'me ch'e yauote qaedi janema joga'me onaĝaic laqataĝanaĝa'j. ¡Maliaĝa qaleuaĝayaqa jogaa'me!

¹⁵ Joote japaĝague'n ca'li, nataq'aen yataqachiñe ja'uo 'lañaĝa'j, qalaĝaja maliaĝa uo'oe gaa'me lelnataĝaco qaedi jayem nauteta.

¹⁶ Male jayem queda'e qaedi yec'adeta joñe'me qop'iyapega jo'ne ja eja; eda'am ga'me chiquenec namaqaic qa'a nach'e eta't da'me nepate'n da'me 'noota ladic. Jogaa'me lejaliaĝanaqa yele'u qomle uedalegue joga'me nalataqa', jouaĝat da'me jo'ne nenaĝatedegue da'me jayem nauteta, qama'le joga'me Egipto laje'pi yataqachiñe ye'ue'tape jogaa'me.»