Oseas 6 - Toba del Oeste

Jogaa'me Israel lec'oqo'tepi jetaque 'viyelaĝadetot joñe'me Jaliaĝanec

¹ Qama'le ga'me Israel lec'oqo'tepi male enapega't ca'li: «¡Qolaq! ¡Yitaĝa jec'otaĝa ñe'me Jaliaĝanec! Te'me qo'mi yolaĝachiguilo ca'li, qalaĝaja yataqachiñe qo'mi natade'n qomle; te'me jalcote da'me qo'mi ye'uaĝa'n ca'li, qalaĝaja yataqachiñe qo'mi yichoĝode'n qomle.

² Qom yenoĝodegue dos uotaĝa tres gaa'me noloqo'ote, qama'le yitaĝa qo'mi 'niyelaĝachidijeguem, ¡qa'a qo'mi nec'alaĝatedegue qomle, qaedi nach'e eta't da'me jonaqa'tajop joñe'me!

³ ¡'Noota qom yataqachiñe ñomitaqataque joñe'me Jaliaĝanec! Qa'a qom naq'aeta, qama'le qo'mi yevitetapiye qomle, ena'am jaga'me ajeua nale yemta nenoĝojeguem, ena'ama gaa'me 'uaediñe uochi'pi jo'ne uo'oe nale ga'me nauoĝo.»

Dios 'yategueta ga'me Israel lec'oqo'tepi

⁴ Qalaĝaja joñe'me Dios male enaac: «Ami Israel laje'pi nataq'aen ami Judá laje'pi, ¿jach'e jogamaĝa ami je'eteque nayi? Aueñeetac nale da'me jayem avichoĝodeñi, qalaĝaja da'me adichoĝodenataĝanaĝaqui ena'am ga'me nichaĝa, chayovida'a ga'me ja'ya nale ne'teta: ¡qomle yataqachiñe pal!

⁵ Qo'oche' 'uo ca'li joga'me 'yaqatac, jo'ne ami yanema gaa'me 'yaqatanaĝanaĝanaqa, qaedi ami qonolaĝachidiñe. Qama'le da'me yec'atenaĝanaĝac joote di'yoq, ena'am da'me 'yoqochiñe.

⁶ Jepaquetapega ta'le yataqachiñe ami choĝodenataĝanaĝayaqa, chayovida'a da'me jayem auatetoñi, da'me jayem mach'e Anedios; ja naqaeda ta'le auauoyi adajaqajequi jo'ne auequiyoue nale.

⁷ »Qalaĝaja aueñiya'am di'me Adán: qa'a ch'e auenoĝoñi da'me ñiyamaĝataĝac, da'me jayem auoqoviñi nale.

⁸ Jodi'me noic jo'ne Galaad, yejamache gaa'me jiyaĝa'u jo'ne qaleuaĝayaqa nataq'aen lataĝanaĝayaqa.

⁹ Naa'me tamenaĝaiqui lo'ol ena'ama gaa'me cachaĝayaqa: nañoĝochidi'ña nale joga'me naq'aic jo'ne yelo'tegue di'me Siquem, qama'le nouo't nataq'aen yala't joga'me ta'yedi.

¹⁰ Joote jauana da'me ja no'en jo'ne yauote gaa'me Israel lec'oqo'tepi: qa'a yataqachiñe eda'am jaga'me quejeguetaĝae, qama'le ja naloteguet ta'le jayem nec'adeta.

¹¹ Nataq'aen ami Judá lec'oqo'tepi, nach'e ena'am 'uo jaĝa'te ga'me nolo' qom ja'uo joga'me adachoĝodequi, yajouaĝat da'me ja no'en jo'ne auauoyi nale. »Qalaĝaja qomle jetaque yitaĝa je'eteque da'me 'noota joga'me yalaqapi Israel.