Oseas 5 - Toba del Oeste

'Laqataĝanaĝac joñe'me Jaliaĝanec jo'ne yelo'talo gaa'me Israel lec'oqo'tepi

¹ «Yataqachiñe anaquiaĝañiya jena'me jenjo', ami tamenaĝaiqui lo'ol, choqoda'me ami lajoĝola'te di'me Israel nataq'aen ami c'oqo'te joñe'me nejaliaĝanec: Male ja'uo yec'atenaĝanaĝac qomle, qama'le ja'uo adachoĝodequi, yajouaĝat da'me auoqoviñe'tape jena'me yalaqapi, da'me aueñi netamenoto joñaa'me ja ejoda jo'ne ueteda'a di'me Mispá nataq'aen di'me Tabor,

² chayovida'a di'me Sitim. Chane'eja ami jachalo'te qomle da'me yec'atenaĝanaĝac.

³ Ami Efraín lec'oqo'tepi jo'ne Israel laje'pi: yataqachiñe jayaten ga'me anejiyaĝauayaĝaqui: qaya'te yaqanatet ta'le jayem nañoĝochi'ñejop. Yataqachiñe aueñiya'am jaga'me quejeguetaĝae, qama'le ja adaloyeguet ta'le jayem anec'achiya.»

⁴ Ja aueñetapega ta'le a'viyelaqaiyot joñe'me Jaliaĝanec mach'e Anedios: yataqachiñe ja a'uamaqachiñe joñe'me, qa'a da'me mach'e adequejeguetaĝaqui ami yamaqa'tape.

⁵ Da'me ani'yoĝodenaĝaqui qa'a ami yaloĝona da'me yataqachiñe ami ja 'noe'n; qama'le daa'me adoecodi' male yajouaĝa't da'me ami qoyapalaĝa't jo' qomle, qama'le nach'e ena'am joga'me ua'ajopa jogaa'me lec'oqo'tepi di'me Judá.

⁶ Uotaĝa male aueloiyaque joñe'me Jaliaĝanec qama'le auaviquiuo gaa'me uaca nataq'aen 'nanaĝate c'oqo'te qaedi auauoyi' jogaa'me adajaqajequidi', qalaĝaja ja auañiya qomle joñe'me, qa'a joote ami ca'ae.

⁷ Ch'e auadenaĝachi jaga'me quejeguetaĝae, qa'a auoqoviñi joñe'me Jaliaĝanec nale anetameñiyoto gaa'me ja ejoda; ena'am ta'le jogaa'me ac'oqo'chedi' male ja loqo'te joñe'me Jaliaĝanec. Chane'eja qom yenoĝonegue ga'me auoĝoic laqaya, qama'le paja'a da'me ami pa'l qomle nataq'aen qoyapalaĝat qomle ga'me a'naleuai.

Lachoĝode'j gaa'me lec'oqo'tepi di'me Israel choqodi'me Judá

⁸ ¡Auajediiyelo naa'me adajeedeldi'! ¡A'uaqataĝañiyema yemeda jogaa'me ueteda'a di'me Guibeá choqodi'me Ramá nataq'aen di'me Bet-avén! ¡'Noota qom niyamaĝateta'ajalo jogaa'me ueteda'a di'me Benjamín!

⁹ Ami Israel lec'oqo'tepi, male auayachiñe da'me 'uo jo' qomle: qa'a yovita qomle ga'me nolo' jo'ne le'uaĝanaĝanaĝac joñe'me Jaliaĝanec, qama'le yataqachiñe qoyolaĝat jaĝa'te jena'me jenjo' aleua.

¹⁰ Yitaĝa enaac joñe'me Jaliaĝanec: «Yataqachiñe 'uo ga'me yalemataic, qama'le japalaĝa't qomle jogaa'me lajoĝola'te jogaa'me Judá lec'oqo'tepi, qa'a ena'ama gaa'me cachaĝayaqa. Yataqachiñe tadoue di'me Israel qaedi doĝotaĝatec di'me aleua.

¹¹ Joga'me lejaliaĝac di'me Israel jalcote da'me lachoĝodec, qa'a uetaue da'me lec'atenaĝanaĝac joñe'me Dios, yajouaĝat da'me yepaquetapega da'me netamenoto gaa'me ja ejoda.

¹² Chane'eja japalaĝat qomle jenjo' lejaliaĝac di'me Israel, jena'am ga'me pit jo'ne yalic nale ga'me neuo lael, nataq'aen jene'tem qomle da'me lejaliaĝa di'me Judá, da'me jena'am ga'me maquic nale yalic ga'me epaq.

¹³ »Qama'le di'me Israel male yauana qomle ga'me lachoĝodec, nataq'aen di'me Judá male yauana qomle da'me yédiñe. Chane'eja Israel yelaque qomle lichoĝodenataĝanaĝac ga'me nejaliaĝanec let'adaic jo'ne yelolegue di'me Asiria. ¡Qalaĝaja joñe'me ja yaqanatet ta'le ami nec'alaĝatedegue!

¹⁴ Da'me jayem male jeloi'ye'to qomle gaa'me Israel lec'oqo'tepi choqogaa'me Judá lec'oqo'tepi, da'me yalemataic ena'am ga'me 'lañaĝac joga'me jauaĝaic. Jaconalo qomle, qama'le yataqachiñe jolaĝachiguilo; qaya'te ta'le nec'alaĝatedegue. Yem qama'le cha'li jaĝadiñe.

¹⁵ »Qama'le jajo'ta ta'le yaĝadiñe jenjo' ja no'en; qom maqachaĝa yayate'n da'me jayem nauteta ca'li, qama'le yataqachiñe totelo'te qomle, chayovida'a da'me yitaĝa jayem yelodaque.»