Oseas 4 - Toba del Oeste

Dios yepoleguelo'te jena'me Israel laje'pi

¹ Ami Israel lec'oqo'tepi, anaquiaĝañiya joñe'me Jaliaĝanec, jenjo' jena'me 'laqatac jo'ne ami yanema. 'Uo da'me ami yepoleguelo'te, ami aleua laje'pi, yajouaĝat da'me ami ja ami ejoda, ja avichoĝodeñi gaa'me adaqayadi' nataq'aen qaya'te uenate'ta joñe'me Jaliaĝanec ta'le en Nedios.

² Yema da'me ami auoqovinaĝañi nale, yataqata ja eja joga'me anenaĝachiyegue. Nataq'aen 'uo da'me adalataĝanaĝaqui choqoda'me adecachaĝaqui, chayovida'a da'me auoqoviñi' naa'me adouadi'. Yemeda naa'me noloqo'ote 'uo da'me adaqaleuaqai.

³ Qo'oche' yema jena'me aleua laje'pi male noye'tape, nataq'aen ja quete' naa'me lai'li. Qama'le yele'u jo' qomle joga'me yejidipi choqoga'me mayodipi; chayovida'a jena'me niyaqapi qayaua qomle.

Dios yepoleguelo'te jena'me tamenaĝaiqui lo'olpi

⁴ Ñe'me Dios ya'uo ga'me 'laqatac, enaac: «Jogaa'me jepoleguelo'te yejamache gaa'me tamenaĝaiqui lo'ol; qaya'te laqaya ta'le jajaĝalegue jena'me jenjo'.

⁵ Nale nolo' da'me ami male auapoguelaĝañi, nataq'aen gaa'me 'yaqatanaĝanaĝanaqa nach'e ena'am ami equeguelo nale pi'yaq. Chane'eja da'me ami male jen auep'ayitegue: male qaya'te 'uo ga'me adolelaĝaiqui ta'le ami janema.

⁶ Jenjo' noic jo'ne yalaqapi, qaya'te jayem yatetonaĝanaĝaneque, qama'le nayi male nimichidiñe. Da'me ami tamenaĝaiqui lo'ol, jouaĝat da'me ja jayem 'te a'uamaqachiñe, qama'le da'me jayem male ja ami 'te ja'amaqateneque ta'le ayoue jena'me ñetamenaĝaiqui. Da'me ami ja jetaque auoqochiya'alo naa'me yamajoĝonaĝaco, qama'le da'me jayem ja jaje'tema qomle gaa'me ac'oqo'chedi' ta'le qoye'n tamenaĝaiqui lo'ol.»

⁷ Ñe'me Jaliaĝanec yitaĝa nenaĝategue da'me dojo', jouaĝa't jogaa'me tamenaĝaiqui lo'olpi, enaac: «Ca'li da'me jalcote gaa'me tamenaĝaiqui lo'ol, ma'ejama'le nichiguegue ga'me loe'j jo'ne jayem nauteta. Chane'eja male joĝotaĝanec da'me li'yoĝodi'j, qaedi ja'uo lepocoqo' q'aen qomle.

⁸ Gaa'me najaqajel jo'ne jayem yanema ga'me yalaqapi, qaedi japalaĝat ga'me loe'j, nach'egaua jo'ne yacota nale gaa'me tamenaĝaiqui lo'ol qaedi 'uo ga'me liqui'yaĝa'j. Qo'oche' yepaquetedapega da'me ma'ejama'le yauote da'me loe'j jogaa'me yalaqapi.

⁹ Qama'le jene'tema qomle gaa'me yalaqapi jogaa'me tamenaĝaiqui lo'ol: ja'uo ga'me ne'uaĝanague'j, jouaĝat da'me yauote jo'ne ja no'en.

¹⁰ Te'me jalcote da'me liqui'yaĝa'j nale, qalaĝaja ja yono't; te'me jalcote da'me lequejeguetaĝa'j, qalaĝaja qaya'te lec'oqo'te qomle, yajouaĝat da'me joote jayem queda'e.»

Israel laje'pi p'iya'alo gaa'me ch'e nequi'il

¹¹ Yitaĝa enaac ñe'me Jaliaĝanec: «Jena'me yalaqapi ch'e quetapegue'to naa'me quejeguetaĝael, nataq'aen da'me niyomidigui nale ga'me lataĝa, qama'le ena'am ta'le yejoma'ape daa'me lelnataĝaco.

¹² Jogaa'me yalaqapi yena't nale jogaa'me qop'iyapegalo jo'ne ch'e e'epa; nataq'aen ga'me epaĝa lae, etedapega yayaten joga'me 'noota. Da'me lamaic ga'me lequejeguetaĝa'j yataqachiñe yamaqa'tape jogaa'me, qama'le ch'e uenatetedapega da'me jayem queda'e, quetedapegue' da'me nejiyaĝauayaĝa'j lamaic.

¹³ Quije'meque naa'me qajoĝona'a jo'ne qayaje'meque, nataq'aen ne'toto gaa'me paqa'li gaa'me e'epa lat'edael, qaedi yauo'oe lajaqaje'j jo'ne yate'm gaa'me qop'iyapegalo. Qo'oche', ami tamenaĝaiqui lo'ol, gaa'me ac'oqocheldi' nataq'aen gaa'me adateldi' ch'e leua'u nale gaa'me ja loua'.

¹⁴ Qalaĝaja ja ja'uo da'me ne'uaĝanague'j jogaa'me ac'oqocheldi' jouaĝat da'me lequejeguetaĝa'j, nataq'aen jogaa'me adateldi' jouaĝat da'me leua'u nale gaa'me ja loua', qa'a da'me ami nach'e ena'am adeuauae' nale gaa'me quejeguetaĝael; qama'le ovi'tajopa nale auauoyi adajaqajequi jo'ne auañema gaa'me qop'iyapegalo. ¡Qalaĝaja ga'me noic jo'ne qaya'te layatenaĝanaĝac, yataqachiñe qoyapalaĝat jo' qomle!

¹⁵ »Ami Israel lec'oqo'tepi, qom maliaĝa auep'iiya'alo gaa'me qop'iyapegalo, qama'le 'noota ta'le ja ena'ama gaa'me c'oqo'tepi di'me Judá. Male aĝañiñi da'me auec'achiya di'me Guilgal choqodi'me Bet-avén: ¡ena'te auauoyi adajaqajequi nale, uotaĝa ta'le jayem a'naĝachiyot!

¹⁶ Ami Israel lec'oqo'tepi, yataqachiñe ami qaleuaĝayaqa. ¡Yataqachiñe ami pagaĝalayaqa, anapaquiyalegue joga'me uaca le'em jo'ne ouaqaic! Ena'te jayem auajoi'ta qaedi ami je'eteque qomle ta'le aueñiya'ama gaa'me 'nanaĝate lec'oqo'te jo'ne oyaĝayaqa.

¹⁷ »Ami lec'oqo'tepi di'me Efraín, qom jetaque maliaĝa auep'iiya'alo jogaa'me qop'iyapegalo, ¡qama'le ja ami 'te jepagaqate'teque ta'le aĝañiñi!

¹⁸ Nale aniyomitac, yataqachiñe ami taĝayaqa, ¡qama'le aueloyaque jaga'me quejeguetaĝae! Aueñi joga'me at'oyaĝaqui jo'ne ja no'en, qaya ta'le ami jiyaĝa'u jo'ne yataqatelo'te.

¹⁹ Ami qoyaue'j qomle, ovitaue da'me anelataguequi, yajouaĝat da'me maliaĝa auep'iiya'alo gaa'me qop'iyapegalo, qama'le yataqachiñe ovitaue joga'me nepocoĝo.»