Oseas 14 - Toba del Oeste

Oseas nachoĝodenoue jodi'me Israel qaedi yitaĝa 'viyelaĝa joñe'me Jaliaĝanec

¹ A'niyelaq, am Israel, anec'ata joñe'me Jaliaĝanec mach'e Anedios, qa'a ena'am ta'le auapoguelaĝan ca'li, jouaĝat da'me adoec.

² A'niyelaĝa joñe'me Jaliaĝanec, aua'uo nayi jenjo' tamenaĝac: «Qo'mi avichoĝode'n, auapalaĝa't yema jogaa'me qadoeco, auaconeguet jenjo' qanechoĝotaĝac, jenjo' qadamaic jo'ne am janemaĝam.

³ Asiria ja yaqanatet ta'le qo'mi nec'alaĝatedegue, uotaĝa jajoĝoye da'me jonaqalegue joga'me pegaq. Male ja jenaĝa “Qanedios” joga'me ch'e qat'onatac, qa'a am onolec am Jaliaĝanec avichoĝode'n jogaa'me jape'l.»

Joñe'me Jaliaĝanec yitaĝa ya'uo 'loyaĝac dalaĝaic qomle di'me Israel

⁴ 'Laqatac joñe'me Jaliaĝanec: «Male ñataden qomle jenjo' nechiyoĝojoĝo'j, yitaĝa joqopitalo naa'me qa'a naq'aeta da'me yelnataĝac, qama'le ja yitaĝa ta'le jachalo'te da'me yalemataic.

⁵ Male je'etec nayi jodi'me Israel ena'am ga'me nichaĝa jo'ne ometeguet, qama'le yataqata onaĝae jaga'me la'uo, ena'am jaga'me lirio, nataq'aen naa'me patadi' yataqata t'añidañi qomle, ena'ama gaa'me e'epa dia'me qajoĝona'a di'me Líbano.

⁶ Naa'me lepeel yataqata nichidegue, yataqata onaĝayaqa, ena'am jaga'me olivo, da'me lavionaĝa yataqata ena'am jaga'me cedro jo'ne 'uo di'me Líbano.

⁷ Israel yitaĝa uetoue yequepaqataĝanaĝac, qama'le nichiquetedaye, ena'am joga'me trigo; naa'me la'uol eda'am joga'me uva lichidic, qama'le yataqata qoyateto'n qomle, ena'am joga'me lataĝa di'me Líbano.

⁸ Efraín male enaac: “Ja yitaĝa ja'amaqate'n jogaa'me ch'e 'nonataqa jo'ne qonetamenoto”. Naqayem jo'ne jelo'oguet nataq'aen jetela joga'me yalaqapi; jena'am jaga'me epaq jo'ne pino, nach'e eta't jayem dadala; chiyaqayi da'me jayem, jenjo' yalaqapi nayi 'uo joda'me jalayaĝac.»

'Naqataĝanaĝac jo'ne p'ategue

⁹ 'Noota qom jogaa'me yatenaĝanaĝayaqa uotaĝa telaĝayaqa cha'li naquiaĝata jenjo' 'yaqataĝanaĝac: Naa'me ladico joñe'me Jaliaĝanec yataqata chimadetedegue, qama'le jogaa'me yataqatelo'te quetegue jenjo', qalaĝaja jogaa'me ja 'noe'n poguelaĝa'n nale tade'ga.