Oseas 13 - Toba del Oeste

Qomle yataqata qoyapalaĝat di'me Israel

¹ Ca'li joñe'me Efraín dojetac, jena'me Israel yataqata 'uo da'me lauategaĝac; qalaĝaja Efraín male ualegue leleuaĝa ca'li ya'uo jenjo', da'me netamenot joñe'me Baal.

² Qama'te jogaa'me Efraín lec'oqo'tepi maliaĝa yauote loe'j. Chiyaqayi jaga'me plata da'me yauote ga'me netametot: jenjo' yauote nale neda'ña joga'me lelnataĝa'j, ga'me yauote naajo' onataĝanaĝayaqa. Enapega't nale: «Auauoyi adajaqajequi», qama'le joga'me jiyaĝadipi yataqata qonec'ouoq jenjo' uaca c'oĝot lequi'i.

³ Chane'eja ena'am joga'me loiquiaĝa nale ne'teta, uotaĝa nichaĝa nale yamta'le 'yoĝoñi, jo'ne nale ne'teta male qaya; ena'am joga'me epaĝa lojoche nale layat yayoĝon, ena'am joga'me nemala' nale ta'ya ga'me nemala' ladic.

⁴ 'Laqatac joñe'me Jaliaĝanec: «Jayem Jaliaĝanec jo'ne mach'e Anedios ca'li maliaĝa oue'ta jona'me Egipto: Ena'te a'uamaqaten ta'le aua'uo ga'me qop'iyapega laqaya, maq joda'me jayem auen onolec, qa'a jayem onolec da'me Adec'alaĝaiqui.

⁵ Am jetela ca'li oue'ta di'me aleua jo'ne totapega't jo'ne yataqata p'e.

⁶ »Qalaĝaja ca'li ja auoviñetaque ga'me aualiqui, chayovida'a yataqata adanodiye, naa'me adequidiaqachildi' male yataqata uauelo da'me ja no'en, qama'le jayem aĝañiñi.

⁷ Chane'eja nayi da'me jayem jena'am ga'me jauaĝaic, jena'am ga'me quedoc nale nauatac joga'me naq'aic.

⁸ Male jec'ate'ga jodi'me naq'aic jadenaĝat jaga'me potae polio' jo'ne yejoma'ape gaa'me c'oqo'te, qama'le qomle yataqata ñaqat jaga'me lequidiaqate. Jena'am joga'me jauaĝaic da'me paja'a jalic joga'me jauana, nataq'aen jena'am jaga'me pioĝodalo da'me deque'e.

⁹ Yataqata am qoyapalaĝat qomle, am Israel, qa'a a'uotan da'me yecochaĝac.

¹⁰ Qama'le nayi, ¿jego ue'tague joga'me adejaliaĝanec, qaedi am nec'alaĝategue? ¿Jegaua jogaa'me lajoĝola'te gaa'me noyaqa, jo'ne aue'n adejaliaĝanec nataq'aen adajoĝola'te ca'li?

¹¹ Am jalemataya ca'li, qama'le ja'uo joga'me adejaliaĝanec; yem qama'le yitaĝa am jalemataya, chayovida'a da'me yitaĝa jeuodaĝanec joga'me.

¹² »Joga'me ja no'en jo'ne Efraín loĝot yataqata joote qoyediñe ca'li, yataqata 'uo joga'me lomalate da'me loec.

¹³ Jenjo' Israel ena'am ga'me notolec qom male laloqo' da'me 'niyiñe, qalaĝaja ena'am ta'le ja najenegue.

¹⁴ ¿Qo'li ami jejodegue qomle, da'me ami ñec'alaĝate'guejopa da'me lañoqotaĝanaĝac joda'me neleuaĝa? ¿Jego ue'ta jenjo' neleuaĝa jo'ne 'uo da'me lañoqotaĝanaĝac? ¡Qa'a naqayem jo'ne japalaĝa't qomle jogaa'me, chayovida'a ueteda'a jenjo' napa'l lae't! Yataqata male ja jichoĝode'n naajo' jiyaĝa'u.

¹⁵ Te'me eja onaĝael gaa'me la'uo jodi'me Israel, ena'am joga'me auaqapi, qalaĝaja nac joga'me layat jo'ne vichaĝaguet, chiyoĝogue di'me aleua jo'ne totapega't. Male paja'a daqaqa, qaya qomle ga'me noĝop jo'ne nayetajeguem. Joga'me lauteua deuodaĝanec joga'me leuoyaĝac, yacona naicaua lael, chayovida'a loqolal jo'ne onaĝael.

¹⁶ Joga'me noic jo'ne Samaria naqaega ualegue qomle jenjo' nec'atenaĝanaĝac, qa'a yataqata 'yotan joñe'me Dios. Male yele'u qa'a ualo'te ñe'me nedaĝanaĝat jo'ne yayaqa yemeda naa'me lael; joga'me c'oqo'tepi male yataqata qoyajaĝa'ña jena'me aleua, jogaa'me yauo' jo'ne qo'uaĝael ualo'te da'me qoyichaĝayelo da'me qoyala't.»