Oseas 12 - Toba del Oeste

¹ «Joga'me Efraín yecanac jena'me layat: yemeda naa'me noloqo'ote quetapegue' joga'me layat chiyoĝogue jena'me cha'ña. Nichiquetaye da'me loqovinaĝanaĝac, nataq'aen male yataqata qaleuaĝaic; yauote 'naĝataĝac nale uaĝayet jodi'me Asiria, qama'le yamaĝa aceite di'me Egipto, ch'e en neme.»

² Joñe'me Jaliaĝanec ya'uo laqalaic di'me Israel, ya'uo lec'atenaĝanaĝac di'me noic jo'ne Jacob, qa'a yajouaĝat da'me ja no'en lelnataĝaco; yejeteneque da'me mach'e etede'ec joga'me yauotedac.

³ Ca'li maliaĝa ja 'niyiñe, Jacob joote napacalegue ñe'me leuadiaĝaua, qama'le ca'li male 'yaĝaic deloi'ye' joñe'me Dios.

⁴ Deloi'ye' ca'li ga'me piyem le'ec ca'li jo'ne yajaĝañe; yataqata noyen chayovida'a nachoĝodenot qaedi qoyichoĝoden. Yem qama'le Dios yauana ca'li ue'ta di'me Betel, qama'le ua'a ca'li dojapegue'.

⁵ Nach'eñe joñe'me Jaliaĝanec jo'ne napacalegue ena'uac: Jaliaĝanec da'me mach'e lenaĝat.

⁶ Chane'eja, am Israel, 'noota qom yitaĝa a'niyeloqot joñe'me Dios, aua'uo da'me am choĝodenataĝanaĝaic nataq'aen am chimaqachiñe, nataq'aen yataqata auep'iya'a joñe'me Anedios.

⁷ 'Laqatac joñe'me Jaliaĝanec: «Am Israel, auena'am ga'me Canaán, qa'a uetauelo naa'me adoua' joda'me noqovinaĝanaĝac, qa'a ja yepaquichigui ga'me lajo'vi nale auemenaĝan.

⁸ Efraín 'laqatac: “Eja nayi yataqata jayem neuoyaq, yataqata jauana jaga'me laicaua. Qalaĝaja qaya'te yaqanatet ta'le 'uo joga'me en yaviyaĝajet, da'me nayi 'uo jaga'me yomataĝanaqate, qa'a eja te'me ja jayem 'te no'en”.

⁹ Jayem jo'ne Jaliaĝanec, mach'e jayem Anedios ca'li maliaĝa oueta'ña di'me Egipto; qomle yitaĝa jen onauelo gaa'me nomachaĝaiqui', ena'am ca'li yemta am jauana jenjo' ua'a ca'li di'me aleua totapega't.

¹⁰ »Joote jojapegue'to gaa'me aqataĝanaĝayaqa, qama'le yitaĝa jen nichidegue q'ae'n jogaa'me lauanaĝanaĝaco, nataq'aen da'me yojaĝac jalcote uo'oe naa'me je'n yeloteda'a.

¹¹ Jodi'me Galaad, uo'oe naa'me qop'iyapegalo jo'ne ja 'noe'n, jo'ne yataqata ja yataĝalo'te. Jodi'me Guilgal qoyauo'oe lajaqajec jo'ne uaca le'mi; naa'me c'atonaĝala'te ena'ama jogaa'me qadi nale qolapodijeguem, uañelo jogaa'me nanaĝanaqa'te.»

¹² Jacob ca'li dajoye, quetalegue joga'me lanaĝanaqa' jodi'me Aram, naqaena jenjo' ua'a ta'le yauana jaga'me jetaque en loua: qo'oche' t'onataĝatac, netela jaga'me 'nanaĝatel.

¹³ Qalaĝaja joñe'me Jaliaĝanec yamaq ga'me 'laqatanaĝanaĝanec qaedi yachiyoĝota'ña di'me Egipto joñe'me Israel, qama'le 'uo joñe'me aqataĝanaĝaic jo'ne naqaeñe netela ca'li.

¹⁴ Jogaa'me Efraín laje' yataqata 'yota'n joñe'me Jaliaĝanec, yataqata en aloqota q'aen joñe'me. Chane'eja qomle joñe'me Jaliaĝanec 'yiyelaĝateguet yema da'me 'lonataĝanaĝa'j jo'ne ja no'en nayi 'yetedac, qama'le 'uo jo' qomle ga'me ualo'te.