Oseas 1 - Toba del Oeste

Oseas en loua jañe'me quejeguetaĝae

¹ Jenjo' nach'ena 'laqataĝanaĝac joñe'me Jaliaĝanec jo'ne qoyanem ca'li ñe'me Oseas, c'oĝot joñe'me Beerí, ca'li maliaĝa lejaliaĝanec ga'me Israel laje'pi joñe'me Jeroboam, mach'e c'oĝot jodi'me Joás. Jenjo' 'uo ca'li 'uo ga'me lejaliaĝa di'me Ozías, Jotam, Ahaz chayovida'a Ezequías, nach'ediaua jo'ne nejaliaĝatelo'te ca'li ga'me Judá laje'pi.

² Chane'eja joñe'me Jaliaĝanec dojapegue' ca'li joñe'me Oseas, enaac jenjo': «Jamo, oc, qama'le auen adoua jaga'me quejeguetaĝae, qama'le auauo'oe ac'oqo'te qomle, qa'a joga'me Israel lec'oqo'tepi yataqata jayem queda'e, da'me e'n 'loyaĝa'j ena'am jaga'me quejeguetaĝae.»

³ Chane'eja ec ñe'me Oseas qama'le 'uoneguet jañe'me Gómer, c'oqote jodi'me Diblaim, jo'ne ca'li male qo'uaĝae qama'le 'uo joga'me c'oĝot.

⁴ Qama'le joñe'me Dios yitaĝa dojapegue' ñe'me Oseas, enaac: «Jena'me jenjo' ac'oĝot, auen lenaĝat da'me Jezreel, qa'a male yataqata ja'uo lachoĝode'j jo' qomle gaa'me c'oqo'te ñe'me jaliaĝanec Jehú, yajouaĝat da'me 'lonataĝanaĝa'j jo'ne ja no'en ca'li yala't ga'me yalaqapi jo'ne ueteda'ña di'me laqauaedegue jo'ne lenaĝat da'me Jezreel. Chane'eja male jen qaya da'me nejaliaĝa jenjo' Israel.

⁵ Nach'edi di'me laqauaedegue jo'ne Jezreel, yataqata ñoma't jo' qomle ga'me nalada't lo'olpi jo'ne Israel laje'.»

⁶ Yem qama'le jañe'me Gómer yitaĝa qo'uaĝae, qama'le 'uo jañe'me c'oqote yauo. Chane'eja joñe'me Dios yitaĝa yanem jenjo' 'laqatac joñe'me Oseas: «Jana'me janjo' notole, auen lenaĝat da'me Lo-ruhama, qa'a ja yitaĝa jichoĝode'n qomle jogaa'me ueteda'ña jena'me jenjo' nejaliaĝa jena'me Israel: male qayaua'te ta'le yecochiyalo.

⁷ Qalaĝaja yataqachiñe jichoĝode'n qomle joga'me lec'oqo'tepi di'me Judá: da'me jayem jo'ne Jaliaĝanec mach'e Nedios, naqayem ñec'alaĝatedegue qomle jogaa'me, qalaĝaja ja jouetaque joga'me coicopi, uotaĝa 'yeuoĝonaĝat jo'ne nalada't lo'o uotaĝa gaa'me netalo'te gaa'me pe'ga.»

⁸ Yem da'me qoyanogaĝatac jañe'me Lo-ruhama, jañe'me Gómer yitaĝa qo'uaĝae, qama'le 'uo joñe'me c'oĝot jo'ne le'em.

⁹ Chane'eja joñe'me Dios yitaĝa dojapegue' ñe'me Oseas, enaac: «Jena'me jenjo' notolec, auen lenaĝat da'me Lo-amí, qa'a da'me ami Israel lec'oqo'tepi, male ja oviyaue jena'me 'yachaqayaĝac, nataq'aen male ja jayem 'te Anedios.

¹⁰ »Qalaĝaja 'uo jo' qom'te ga'me nolo' ga'me lec'oqo'tepi di'me Israel yataqata jalcote, ena'am joga'me pogaĝanaĝa jo'ne ue'ta ga'me lae ga'me ñache let'a, jo'ne yataqata ja qonalo'oguet da'me qonaloqote'n. Qom yovita ga'me nolo', ñe'me Dios male ja yitaĝa nenaĝategue jena'me jenjo': “Da'me ami ja ovitauelo jena'me yalaqa,” dite da'me male nenaĝategue qomle: “Da'me ami yataqata ami yalaqapi, mach'e jayem Jaliaĝanec jo'ne nach'e eta't ñec'aletaye.”

¹¹ Qama'le jena'me lec'oqo'tepi di'me Judá nataq'aen ga'me Israel lec'oqo'tepi male yema'a't qom'te, qama'le onolec da'me qoyemalegue joga'me lajoĝola't, qaedi yitaĝa onaĝaic da'me 'loyaĝa'j jogaa'me. ¡Yataqata onaĝaic ga'me nolo' qom'te, naqaega jo'ne lenaĝat da'me “Nolo' Jezreel”, jo'ne yelo'teguet da'me Dios danaĝan.