Nehemías 9 - Toba del Oeste

Esdras nechoĝotot joñe'me Dios jouaĝa't gaa'me loeco jogaa'me Israel laje'pi.

¹ Joga'me nolo' veinticuatro jo'ne nach'ega auoĝoic jo'ne séptimo, lenaĝat Etanim, jogaa'me Israel laje'pi yitaĝa yemetapega'ajalo qaedi noqouaqatela'ajalo; yatedañe jogaa'me leuo jo'ne ja no'en nataq'aen yecodelo'te joga'me aleua naa'me laqai'go.

² Qama'le jogaa'me yataqachiñe Israel laje'pi male ca'ae jogaa'me jo'ne yaqa'a da'me chiyoĝoteguet; ena'uaque nechachidiñi da'me yechoĝote'tape jogaa'me mach'e loeco, nataq'aen gaa'me loeco jogaa'me chiyoĝogueta.

³ Da'me maliaĝa nechatetedañe, chayovida'a tres horas male qodojelegue jaga'me nede jo'ne uetalegue da'me lamajoĝonaĝac joñe'me Jaliaĝanec mach'e Nedios, nataq'aen yitaĝa uo'oe jogaa'me tres horas da'me yechoĝote'tape jogaa'me loeco nataq'aen 'nonaĝachedigui joñe'me Jaliaĝanec.

⁴ Yem qama'le uo'oe jogaa'me levita laje' jo'ne Josué, Binuy, Cadmiel, Sebanías, Binui, Serebías, Baní nataq'aen joñe'me Quenaní, male dajo'tagueta jogaa'me jiyaĝadipi da'me netametedapecot joñe'me Jaliaĝanec mach'e Nedios.

⁵ Yem qama'le jogaa'me levita laje' jo'ne Josué, Cadmiel, Binuy, Hasabnías, Serebías, Hodías, Sebanías nataq'aen Petahías male dojapegue'to gaa'me jiyaĝadipi: «Nayi, 'noota qom 'ñonaĝataĝaye joñe'me Jaliaĝanec mach'e Qanedios, jo'ne joote jalchi'ena 'uo, nataq'aen da'me qaya'te loiquiaqa'. »¡Qa'nonaĝachigui da'me 'lonaĝac joda'me adenaĝat, am Jaliaĝanec, qa'a anapacalo'te gamachaqaegaua jogaa'me qadeyalaqataĝanaĝaco choqogaa'me qadi'yoĝodenataĝanaĝaco!

⁶ »Am Jaliaĝanec, am onolec mach'e Dios. Naqa'am jo'ne aue'et di'me piyem choqogaa'me uo'oe jo'ne laje'pi. Aue'et jena'me aleua nataq'aen gamachaqaegaua gaa'me uo'oe; aue't jogaa'me noqo'opi let'al choqogaa'me laje'pi. Naqa'am jo'ne auanema yema da'me 'loyaĝac, qama'le jogaa'me piyem laje' nach'e eta't am 'nonaĝachedigui.

⁷ »Am Jaliaĝanec, naqa'am mach'e Dios jo'ne auen adiquiyac joñe'me Abram, jo'ne auachiyoĝota'ña di'me noic jo'ne Ur da'me anaqategue, mach'e 'lachaqa't jogaa'me caldeopi, qama'le auadalaĝat joga'me lenaĝat da'me auenaqatenec Abraham.

⁸ Ca'li auana da'me yataqachiñe am p'iya'a, qama'le anayate'ne' joñe'me: a'uaĝatem da'me qomle auanema jogaa'me mach'e c'oqo'tepi jogaa'me 'nale'u jogaa'me Canaán laje', jogaa'me hitita laje', jogaa'me amorreopi, jogaa'me Jebús laje', jogaa'me ferezeo laje', nataq'aen jogaa'me gergeseo laje'. Chane'eja male auen yepaquichigui joga'me a'naĝataĝac, qa'a am yataqatelegue.

⁹ Auec'ate'tape gaa'me lachoĝodeco jogaa'me jo'ne qauachiyoĝogueta ca'li jodi'me Egipto, nataq'aen auomachiya joga'me 'lalaĝa'j ca'li ueda'a di'me lae joga'me ñache let'a lenaĝat da'me Chi'najat.

¹⁰ Aualoĝonalo ca'li jogaa'me at'anaqa chayovida'alo jogaa'me adañoqotaĝanaĝaco, da'me auen nauanegueta joñe'me faraón choqogaa'me lecochaĝa'u nataq'aen yemeda jogaa'me Egipto laje'pi. Qa'a auetaden da'me naqaenaua jo'ne yachoĝode'tape jogaa'me mach'e qadayi. Nach'ejoua jaa'me noloqo'ote queda'me qonetouena joda'me adenaĝat chayovida'a nayi.

¹¹ Auecolaĝachigui joga'me ñache let'a, auen yauata jogaa'me Israel lec'oqo'tepi, qaedi tade'ga joga'me ladic jo'ne qaqata. Qalaĝaja auen ouaĝayaqa jogaa'me Egipto laje' jo'ne yecaa'tape, qama'le domalidiñe ena'am joga'me qa' jo'ne taue joga'me noĝop ja jochichi'iñgui.

¹² »Yem qama'le auaue'j, auen dajoteda'ye ga'me piyem lo'oc nale nolo', nataq'aen nale pi'yaq male dajoteda'ye ga'me dole' lauaq, qaedi yecoyadelegue joga'me ladiquiyaĝa'j jo'ne auen queteda'ague.

¹³ Ca'li yovideta joga'me qajoĝonaĝa jo'ne lenaĝat Sinaí, qama'le anenochiñe, qama'le chiyaqaje'ma jodi'me piyem da'me auojapegue'to. Auanema gaa'me a'naĝataĝaco jo'ne chimaqachidiñe nataq'aen jogaa'me adapaĝaguenataĝanaĝaco jo'ne ejoda, choqogaa'me adamajoĝonaĝaco jo'ne onaĝayaqa.

¹⁴ Auayatenaĝanaĝaneque da'me yiyamaĝa't joga'me nolo' jo'ne omataĝaiqui, nataq'aen auanema jogaa'me naqataĝaco, namajoĝonaĝaco nataq'aen ga'me napaĝaguenataĝanaĝaco, jo'ne auanema joñe'me adiquiyac Moisés qaedi auen yedidiñe.

¹⁵ Auanema ca'li joga'me yali'j jo'ne chiyaqaje'ma di'me piyem qaedi qoyalamat joga'me loqouaqa', nataq'aen auen chiyaqaue joga'me qa' let'adaic ga'me noĝop qaedi qoyalamat da'me noĝop lamaic. Yem qama'le auamajoĝolo'te qaedi neda'ña di'me aleua jo'ne joote a'uaĝatema da'me auanema.

¹⁶ »Qalaĝaja jogaa'me qauachiyoĝogueta yauote da'me ja no'en. Ja chimadichidiñe ca'li, qama'le ja yoqochideta jodaa'me adamajoĝonaĝaco.

¹⁷ Ja jetaque am naquiaĝata, nataq'aen ja netouetaque jodaa'me adañoqotaĝanaĝaco jo'ne auen yauachiguilo. Qama'le yelodaque joga'me lajoĝola't da'me jetaque 'viyelaĝategue jodi'me Egipto qaedi yitaĝa qoyen nelataqa. Qalaĝaja am Dios jo'ne auapalaĝa't jogaa'me loeco, am jo'ne choĝodenataĝanaĝaic nataq'aen 'uo da'me adepagaĝac, am jo'ne ja paja'a aualematayalo nataq'aen qaya'te loiquiaqa' da'me adoqopich'i; jo'oche' da'me ja oca'ae ca'li jogaa'me.

¹⁸ Mate mane'e da'me yauote joga'me lequi'i ga'me uaca c'oĝot jo'ne qa' lojoche, qama'le enapega't: “Nach'ena jenjo' mach'e Qanedios jo'ne qo'mi yachiyoĝoteda'ña di'me Egipto”. Qama'le yauo'oe jogaa'me yataqachiñe ja 'noe'n jo'ne ja aviyamaĝade'n,

¹⁹ qalaĝaja da'me am ja oca'ae jogaa'me, da'me ueteda'a joga'me aleua jo'ne totapega't, qa'a jouaĝat joda'me adichoĝodenataĝanaĝac. Joga'me piyem lo'oc ja yaĝadegue da'me quetapegue'to nale nolo', nataq'aen ga'me dole' lauaq nale pi'yaq, nach'e eta't da'me yecoyadetalegue joga'me ladi'j.

²⁰ Auanema joda'me adañoqotaĝanaĝac jo'ne onaĝaic qaedi yapaĝague'n. Ja auen 'te youetedaque jaga'me maná da'me aviqui'yaĝaneque, nataq'aen auanema joga'me noĝop qaedi ja yeliñqui'p.

²¹ Adetelalo nalo'tagueta cuarenta jogaa'me 'uoidi jo'ne auen ueteda'a joga'me aleua jo'ne totapega't, qama'le qaya'te youetedaque. Ja dola'y jogaa'me leuo', nataq'aen da'me ja nala't jogaa'me lapia'te.

²² »Auanouelo loua' jogaa'me Israel lec'oqo'tepi gaa'me noyaqa nataq'aen gaa'me nejaliaqa'te, qama'le auanema gaa'me 'nale'u lael. Qama'le e'n loĝo't jodi'me Hesbón, 'naleua ñe'me jaliaĝanec Sihón, nataq'aen di'me Basán, 'naleua joñe'me jaliaĝanec Og.

²³ Auanema jogaa'me jalcote lec'oqo'tepi jo'ne ena'ama jogaa'me uaqachiñil, qama'le auen neda'ña joga'me aleua jo'ne joote a'uaĝatema ca'li jogaa'me mach'e chiyoĝogueta.

²⁴ Chane'eja gaa'me Israel laje' nec'adeta jena'me aleua, qama'le auanema joga'me lomataĝanaĝa'j; auen noma't jogaa'me Canaán laje', jogaa'me lejaliaĝanaqa choqogaa'me noyaqa jo'ne leje'gue, qaedi 'yeteque da'me jo'ne jetaque yauote.

²⁵ Qama'le dotaĝaneque jogaa'me noyaqa jo'ne uo'oe gaa'me lequepaĝanaqa'te nataq'aen gaa'me ale'u jo'ne 'uo yema joga'me jo'ne qoyalic, yema jogaa'me emaqa jo'ne najaqachiguilo joga'me neuoyaĝac, gaa'me nejedel jo'ne noĝop lete', nataq'aen jogaa'me nanaĝanaqa'te jo'ne uva lichidijat, epaq lichidijat jo'ne olivo, nataq'aen jogaa'me e'epa laqaya' jo'ne uo'oe jogaa'me jalayaĝa'j. Yataqachiñe 'uo joda'me liqui'yaĝa'j, male yataqata piyo'y nataq'aen yataqata yono't, qa'a ena'am ta'le yepitaqatedac da'me adichoĝodenataĝanaĝac.

²⁶ »Qalaĝaja jogaa'me am nauteta; am netauoĝoteguet qama'le 'yota'n jogaa'me adamajoĝonaĝaco. Nalachidiñe ca'li jogaa'me at'aqatanaĝanaĝanaqa jo'ne e'n di'yo't jogaa'me loeco qaedi male am 'viyelaĝadetot, qalaĝaja nach'edata da'me yauote joga'me jo'ne yataqachiñe ja no'en.

²⁷ Jo'oche' auanouelo jogaa'me laute'u qaedi qo'yeteque joga'me ja no'en. Ca'li yauata da'me lachoĝode'j, qama'le am yiyaĝategue; qama'le auomachiya joda'me liyaĝanaĝa'j jo'ne am yedaje'ma, da'me one'tague di'me piyem. Chane'eja, jouaĝat da'me jalcote adichoĝodenataĝanaĝac, auanema ca'li jogaa'me jiyaĝa'u jo'ne yataqata 'uañaĝayaqa qaedi nec'alaĝate'guejopa da'me lañoqotaĝanaĝa'j jogaa'me laute'u.

²⁸ »Qalaĝaja da'me te'me ue'tajopa da'me 'lemaĝa'j, male yitaĝa 'viyelaĝadeta joga'me jalchi'ena 'yetetedac jo'ne ja no'en. Chane'eja yitaĝa oca'ae, qama'le auanouelo jogaa'me laute'u qaedi nejaliaĝatelo'te. Qalaĝaja yitaĝa am nachoĝodetot, qama'le am jo'ne one'tague di'me piyem nach'e eta't da'me anaquiaĝanalo, nataq'aen nach'e eta't aue'uolo'te, jouaĝat da'me adichoĝodenataĝanaĝac.

²⁹ Anoqotenalo jogaa'me qaedi 'viyelaĝalo jogaa'me adapaĝaguenataĝanaĝaco, qalaĝaja jogaa'me chiyoĝo's ca'li, ja yoqocha'alo jodaa'me adamajoĝonaĝaco; ja yauo'oe jodaa'me chimaqachidiñe, jo'ne yelotede'eguet da'me nec'alaĝa. Am nauteta, qama'le am netauoĝoteguet da'me ja am 'te naquiaĝata.

³⁰ Qayoĝode' jaa'me 'uoidi da'me anapogaĝadenegueta jogaa'me, joote auen najaqachiguilo da'me adañoqotaĝanaĝac jogaa'me at'aqatanaĝanaĝanaqa qaedi yayatenaĝanaĝaneque jogaa'me, qalaĝaja gaa'me ja naquiaĝanalo. Chane'eja yitaĝa auanouelo jogaa'me noyaqa laqaya' jo'ne laute'u.

³¹ Qalaĝaja da'me 'uo joda'me adoqopich'i nataq'aen 'uo joda'me adichoĝodenataĝanaĝac, qama'le ja auapalaĝa't jogaa'me nataq'aen ja auegue'm, qa'a da'me am mach'e Dios jo'ne ja jemataqaic nataq'aen choĝodenataĝanaĝaic.

³² »Am mach'e Qanedios, am Dios jo'ne anapacalegue ena'uac, da'me am 'uañaĝaic, am jo'ne qot'oiyapega, am jo'ne yataqatelegue da'me auen yepaquichiguilo jogaa'me a'naĝataĝaco: ena'te auapalaĝate'talo gaa'me lachoĝodeco jogaa'me qadejaliaĝanaqa, jogaa'me najoĝola'te, jogaa'me tamenaĝaiqui lo'ol, jogaa'me at'aqatanaĝanaĝanaqa, jogaa'me qauachiyoĝogueta nataq'aen yema jogaa'me ac'oqo'tepi, chiyoqotelegue ca'li jaa'me noloqo'ote ca'li uo'oe jogaa'me jaliaĝanaqa di'me Asiria chayovida'a nayi.

³³ Qa'a yema da'me dojo' qadajouaĝac ja am 'te chiyaqayi, qa'a nach'e eta't am yataqatelegue; da'me qo'mi qamqa'me jauoqo'oe nale jodaa'me ja 'noe'n.

³⁴ Chayovida'alo jogaa'me qadejaliaĝanaqa, gaa'me qadajoĝola'te, jogaa'me tamenaĝaiqui lo'ol nataq'aen jogaa'me qauachiyoĝogueta, ja yauo'oe jodaa'me adamajoĝonaĝaco nataq'aen ja naquiaĝanalo jogaa'me adaqataĝaco.

³⁵ Mate mane'e gaa'me nejaliaĝanaqa qaya'te youetedaque ca'li, qa'a jouaĝat da'me adichoĝodenataĝanaĝac jo'ne auanema, chayovida'a jena'me jenjo' aleua jo'ne auanema jo'ne jalcote da'me leuoyaĝac; qalaĝaja nach'edi da'me ja am 'te yoqochideta, ja yaĝadiñe jogaa'me ja 'noe'n.

³⁶ »Qo'mi jo'ne nelataqa nayi da'me jonaqata'ña jena'me jenjo' aleua jo'ne auanema ca'li jogaa'me qauachiyoĝogueta qaedi yali'y yema joga'me chiyaqayi da'me 'lonataĝanaĝa'j.

³⁷ Yema jenjo' nanec male qoyachauelo jogaa'me liquipi jogaa'me jaliaĝanaqa jo'ne aue'n qo'mi nejaliaĝatelo'te nayi, yajouaĝa't naa'me mach'e qadoeco. Chane'eja nayi mach'e qo'mi ye'ue'tape, choqogaa'me yejidipi jo'ne jauanaĝalo. Qo'oche' naq'aeta da'me male 'uo joda'me qadachoĝodec.»

Jogaa'me Israel laje'pi nayatena'ajalo qaedi que'teguelo jodaa'me namajoĝonaĝaco

³⁸ Chiyaqayi yema da'me dojo' 'uo ca'li, da'me qo'mi male ja'anaĝaeñi da'me qat'aqatac qaedi joqochaĝa joñe'me Qanedios, qama'le nach'e ena'am jedaĝañe nataq'aen qoyetouoĝolegue jaga'me netouojoĝonaqate, qama'le nededelegue jogaa'me qadajoĝola'te, jogaa'me levita laje' nataq'aen jogaa'me tamenaĝaiqui lo'ol.