Nehemías 8 - Toba del Oeste

Esdras dajoya'agueta jogaa'me jiyaĝadipi da'me dojelegue jaga'me nede jo'ne lamajoĝonaĝaco ñe'me Dios

¹ Chane'eja ca'li yovita jo'me auoĝoic jo'ne séptimo, lenaĝat Etanim, gaa'me Israel lec'oqo'tepi joote yauo'oe naa'me yataqata 'lachaqa'te. Ga'me nolo' jo'ne 'uaeñe, qama'le yema jogaa'me jiyaĝadipi yema'a't, da'me ueda'a di'me nemaqa', ga'me dajoya'ya joga'me qotayape'uo jo'ne lenaĝat da'me Noĝop Ladiiuo. Qama'le joñe'me Esdras, jo'ne paĝaguenataĝanaĝaic nataq'aen tamenaĝaiqui lo'o, qodojapegue' qaedi yelaque jaga'me nede jo'ne uetalo'te jogaa'me lamajoĝonaĝaco joñe'me Jaliaĝanec, jo'ne qoyanema joca'li ñe'me Moisés qaedi qoyapaĝagueneque jogaa'me Israel lec'oqo'tepi.

² Qama'le Esdras naqat jaga'me nede qama'le yaloĝonalo yema jogaa'me jiyaĝadipi, jogaa'me yauodipi nataq'aen jogaa'me ja 'yaĝayaqa jo'ne 'uo da'me layatenaĝanaĝac.

³ Da'me ne'teta chayovida'a nolo' laeñi, da'me qodojelegue jaga'me nede. Yema joga'me jiyaĝadipi yataqachiñe qonaquiaĝanalo jogaa'me lamajoĝonaĝaco joñe'me Dios.

⁴ Qa'a ñe'me Esdras quije'mec ca'li joga'me lapiaĝala' jo'ne epaq, qama'le pelegue ga'me qayataje'mec qaedi yema qodomachiya ga'me 'yaĝatetac. Nataq'aen ga'me yayaten uo'oe jogaa'me lecochaĝa'u jo'ne lenaqa'te Matatías, Sema, Anías, Urías, Hilquías nataq'aen Maaseías; joga'me 'nemaq ueteda'a jogaa'me laqaya' jo'ne lenaqa'te Pedaías, Misael, Malquías, Hasum, Hasbadana, Zacarías nataq'aen Mesulam.

⁵ Esdras nechatetañe ca'li, qama'le 'youachigui jaga'me nede. Ca'li qoyauatalegue yema joga'me jiyaĝadipi qa'a qoyemalegue yema jogaa'me, qama'le yema nechachidiñi qaedi qonaquiaĝana.

⁶ Qama'le joñe'me Esdras netenec da'me enaac: «¡Qa'nonaĝachigui joda'me lejaliaĝa joñe'me Dios jo'ne napacalegue ena'uac!» Jogaa'me jiyaĝadipi nodidijeguem jogaa'me loua' di'me piyem qama'le nenaĝatedegue da'me etapega't: «¡Amén, amén!» Qama'le naĝadiñi chayovida'a yedota jogaa'me nepeel jena'me aleua da'me 'nonaĝachedigui joñe'me Jaliaĝanec.

⁷ Yem da'me dojo', qama'le yitaĝa nechachidiñi yema jogaa'me jiyaĝadipi. Qama'le queta joda'me qodojelo'te jodaa'me Dios lamajoĝonaĝaco, uo'oe jogaa'me levita laje' jo'ne lenaqa'te da'me Josué, Baní, Serebías, Jamín, Acub, Sabtai, Hodías, Maaseías, Quelitá, Azarías, Jozabad, Hanán nataq'aen Pelaías. Naajo' 'yaĝateguelo joga'me uetalegue jaga'me nede. Qama'le jogaa'me jiyaĝadipi ja queda'e joga'me nechateteda'ña.

⁸ Qa'a jogaa'me qodojetapelegue jo'ne lamajoĝonaĝaco joñe'me Dios jo'ne joote qodomachitapega, da'me yitaĝa qo'viyelaĝatelegue joga'me 'uaechiñe da'me yataqata qoyen di'yoq joda'me yelo'teguet, qaedi yema gaa'me jiyaĝadipi yayate'tedegue.

⁹ Jogaa'me jiyaĝadipi male noye'n qa'a yataqata domachiyalo jogaa'me 'naqataqa jo'ne lamajoĝonaĝaco joñe'me Dios. Chane'eja joñe'me jaliaĝanec Nehemías, joñe'me Esdras jo'ne paĝaguenataĝanaĝaic nataq'aen tamenaĝaiqui lo'o, nataq'aen jogaa'me levita laje' jo'ne 'yaĝadetegue joga'me yataqata lajoĝo'j jodaa'me namajoĝonaĝaco jogaa'me jiyaĝadipi, edaac: «Jenjo' nolo' yataqata qoyen loĝot joñe'me Jaliaĝanec, mach'e Qanedios. Ena'te ta'le aueñetapega ta'le lichiguilo jonaa'me adai'lidi'.»

¹⁰ Joñe'me Nehemías queta joga'me lojaĝac jo'ne enaac: «Jamoyi nataq'aen yataqachiñe 'uo qomle joga'me jo'ne aualiqui, jogaa'me niqui'yaqa'te jo'ne yataqata jama't, nataq'aen aniyomiyigui joga'me jama. Nach'e ena'am auecolaĝachiyeguelo jogaa'me niqui'yaqa'te qama'le auañema jogaa'me uotete' jogaa'me jo'ne maliaĝa ja yauote joga'me yali'j. Jenjo' nolo' yataqata ja 'nalegue jo'ne loĝot joñe'me Qadejaliaĝanec. ¡Ena'te ami totelo'te, uotaĝa lichiguilo jonaa'me adai'lidi', qa'a jouaĝat da'me ya'uo da'me qadamaic joñe'me Jaliaĝanec, jo'ne qo'mi 'yañaqate't!»

¹¹ Chane'eja jogaa'me levita laje' yecocha', enapega'ajalo: «¡At'emaqaiñe! ¡Ena'te anoyeñi! Qa'a jenjo' nolo' jo'ne ja 'nalegue, mach'e loĝot joñe'me Dios.»

¹² Chane'eja yema jogaa'me jiyaĝadipi male yauote joga'me t'adaic leualayaĝa'j, nachetapega't joga'me jo'ne niqui'yaqa'te, yecachidiñi joga'me nolo' da'me made'tape, qa'a male yayate'tedegue da'me lajoĝoc da'me napaĝaguenataĝanaĝac jo'ne qoyanema.

¹³ Joga'me nolo' laqaya, yema jogaa'me lajoĝola'te jogaa'me Israel laje'pi nataq'aen gaa'me tamenaĝaiqui lo'ol choqogaa'me levita laje' male dajoyeda'aguet joñe'me paĝaguenataĝanaĝaic Esdras qaedi male qonapaĝaguenalo jogaa'me Dios lamajoĝonaĝaco.

¹⁴ Qama'le yauata joga'me 'laqatac joñe'me Jaliaĝanec jo'ne yanem ca'li joñe'me Moisés, da'me nale qoya'uo joga'me neualayaĝac jo'ne tachigui joga'me auoĝoic séptimo lenaĝat Etanim, qama'le qoyamaĝalo'te jogaa'me Israel laje' qaedi cha'li nauelo jogaa'me nomachaĝaiqui'.

¹⁵ Chane'eja qo'yaĝatema yema gaa'me 'lachaqa't di'me Jerusalén nataq'aen gaa'me noyaqa laqaya' jenjo' 'naqatac: «Auec'achiyalo jogaa'me qajoĝona'a qaedi anedoye'uo gaa'me olivo lichidic lepeel, joga'me mirto, uotaĝa chaic lepeel nataq'aen gamachaqaega jogaa'me epaq lolelaĝael, qaedi male auauoyi' jogaa'me adomachaĝaiquii', qa'a naq'aeta joga'me jo'ne qo'mi yamaĝalo'te jaga'me 'naqatanaĝalate.»

¹⁶ Chane'eja jogaa'me jiyaĝadipi male eque' qama'le yichaĝadegue jogaa'me epaq lolelaĝael qaedi yauo'oe jogaa'me lomachaĝaiqui'. Qama'le uo'oe jogaa'me jo'ne yanedalegue ga'me p'ajeguem gaa'me emaqa, uotaĝa yaneda'ña ga'me najoĝoc joga'me 'lachaqa', uotaĝa joga'me lae ga'me tamenaĝaiqui, uotaĝa joga'me nemaqa' jo'ne dajoya'ya joga'me qotayape'uo jo'ne lenaĝat da'me Noĝop Ladiiuo, chayovida'a jogaa'me nemaqa' jo'ne yelo'ta joga'me najom di'me Efraín.

¹⁷ Yema jogaa'me jiyaĝadipi jo'ne te'me ne'uaqa ca'li di'me Babilonia male yauote jogaa'me lomachaĝaiqui', qama'le cha'li netauelo. Ca'li chiyoqo'teguet da'me p'aya'aguet di'me Josué, lec'oĝot di'me Nun, chayovida'a jo'me nolo', jogaa'me Israel laje' ja yauote ca'li jenjo' neualayaĝac, qama'le nayi male jalcote joda'me lamai'j.

¹⁸ Chane'eja yauote joga'me neualayaĝac jogaa'me siete noloqo'ote: yemeda jaa'me noloqo'ote, joñe'me Esdras dojetapelegue jaga'me 'laqatanaĝalate joñe'me Dios, chayovida'a da'me yem joga'me neualayaĝac. Qama'le ca'li yovita joga'me octavo nolo', male yauote ga'me nemaĝac jo'ne p'ategue, qa'a naq'aeta da'me Dios lamajoĝonaĝac.