Nehemías 5 - Toba del Oeste

Nehemías naquiaĝana da'me necotaĝa'j jogaa'me jiyaĝadipi

¹ Qalaĝaja jaajo' noloqo'ote jogaa'me jiyaĝadipi nataq'aen jogaa'me loua' male necotayapega't jogaa'me 'lachaqadiaĝa'u jo'ne judío laje',

² qama'le uo'oe gaa'me etapega'ajalo: «Ta'le ñaloqotena' jogaa'me qac'oqo'te nataq'aen jogaa'me qac'oqotel, qama'le yema jogaa'me qat'achaqa' laje' male qo'mi qayoĝode'. Chane'eja jouenaqataque ta'le qat'alec joga'me niqui'yaĝat, qaedi ja qo'mi 'te yala't da'me qadoqouaĝa.»

³ Qama'le uo'oe gaa'me laqaya' etapega'ajalo: «Yataqachiñe ja dalaya'a joda'me noqouaĝa jo'ne qo'mi uetauelo, qama'le joote ja'aĝataĝauo jogaa'me qa'nale'u nataq'aen jogaa'me qadoqo'te jo'ne uva lichidijat, chayovida'alo jogaa'me qat'achaqa'te, da'me jenaĝa tayi joga'me jo'ne jetaque jaliguinaq.»

⁴ Qama'le jogaa'me laqaya' male etapega'ajalo: «Da'me qo'mi joote jauoqo da'me janaĝadeuo jogaa'me qa'nale'u lael nataq'aen jogaa'me qadanaĝanaqa'te qaedi jaqanatetaq ta'le jejetenaq joñe'me jaliaĝanec Artajerjes.»

⁵ Nach'e ena'am noqotedegue, enaa'j: «Temaqaedi da'me jenaqa'ama jogaa'me qadaqaya', nataq'aen jogaa'me qac'oqo'te ena'ama jogaa'me mach'e lec'oqo'te, qalaĝaja da'me qo'mi yedalo'te da'me dojo': qama'le qauadegue jogaa'me qac'oqo'te nataq'aen gaa'me qac'oqotel da'me jenaĝa namaĝa's. Joote janaĝadegue gaa'me qac'oqotel laqaya', qama'le ja jaqanatetaq ta'le yitaĝa jenaĝa uojotedañi, qa'a jogaa'me qa'nale'u nataq'aen jogaa'me uva lichidijat male loqo'te jogaa'me jiyaĝa'u laqaya'.»

⁶ Qama'le da'me jayem, ca'li jomachiyalo da'me ja 'yamaqate'n da'me qo'yeteque, qama'le jalcote jalemata.

⁷ Qama'le cha'li ñaloqoten joga'me jetaque ñenaĝategue; ca'li yem qama'le jiyaĝanalo jogaa'me jiyaĝa'u jo'ne p'ajodaye nataq'aen jogaa'me najoĝola'te, qama'le jenapegalo: «¡Yataqachiñe ja no'en da'me dojo' jo'ne a'vichiyeque jogaa'me adaqayadi'!» Yem qama'le jiyaĝanalo yema jogaa'me jiyaĝadipi,

⁸ qama'le jenaac: «Da'me maqachaĝa jaqanatetaq jo'ne jauoqo, joote qanaqate'teque jogaa'me qadaqaya'olqa jo'ne judiopi jo'ne qoyeme'n ca'li da'me qoye'n namaĝa's, qoyanouelo jogaa'me noyaqa. Qama'le da'me ami, ¿teua'atoqo' aueñetapega auemeñi' jogaa'me qadaqaya' jo'ne qo'mi chiyaqauelo?» Qalaĝaja jogaa'me totelo'te ca'li, qa'a ja yayate'n ga'me nenaĝatedegue.

⁹ Male ñoqotenegue da'me jenaac: «Jenjo' a'vichitac jo'ne ja 'noota. Dite da'me auachiquiya'a joñe'me mach'e Qanedios, qaedi ja qo'mi 'te ye'ue'tape gaa'me qadaute'u jogaa'me noyaqa laqaya'.

¹⁰ Da'me jayem choqogaa'me yaqaya' nach'e ena'am qa'natanaĝaneque jaga'me laicaua nataq'aen joga'me trigo jala, qaedi jogaa'me qadaqaya' maqachaĝa nec'aledegue. Chane'eja 'noota qom janaĝajoĝoñi da'me jenaĝa yaguegue da'me lajo'vi.

¹¹ Nayi jenjo' nolo' ami ñachoĝodenoto qaedi a'viyelaĝachiyegueta jogaa'me mach'e 'nale'u, jogaa'me noqop'adichi jo'ne uva lichidijat nataq'aen olivo lichidijat, chayovida'alo jogaa'me mach'e 'lachaqa'te. Nach'e ena'am ena'te 'uo ga'me auaqapiaqachiyañe da'me a'viyelaĝachiyegueta qomle ga'me lae jaga'me laicaua, joga'me trigo jala, joga'me uva li'i nataq'aen joga'me olivo jala li'i.»

¹² Qama'le jayem 'yadeteguet: «Jaa'a, naq'aeta da'me jauoqo qomle. Qa'viyelaĝatoto yema qomle jogaa'me, qama'le qaya'te yitaĝa qaviyaĝanaque ta'le qo'mi yanema.» Chane'eja jiyaĝanalo jogaa'me tamenaĝaiqui lo'ol qaedi jogaa'me jiyaĝadipi yepaquichigui qomle yema joda'me nenaĝatedegue.

¹³ Yem da'me dojo' qama'le ñechiyoĝodiñe naa'me yeuo nataq'aen jenaac: «Da'me jayem male ñechiyoĝoñe jana'me ñeuoĝoe, qama'le nach'e ena'am joñe'me Qanedios yadiyochigui qomle yema joga'me jo'ne ja ya'uo da'me jo'ne joote qonayachiñgui. Qama'le qodoĝotaĝanec joga'me 'lemec, joga'me 'naleua chayovida'a yema joga'me yauana.» Chane'eja ena'uaque gaa'me jiyaĝadipi male nenaĝatedegue da'me 'laqata'j, enaa'j: «¡Amén!» Male 'nonaĝachedigui joñe'me Jaliaĝanec, qama'le yauote joga'me 'naqatac jo'ne joote qonayachiñgui.

¹⁴ Chiyoqotelegue jo'me uo'e jo'ne veinte da'me lejaliaĝa ñe'me jaliaĝanec Artajerjes, jo'me nolo' ca'li jayem namaĝaquena da'me en jelolegue jenjo' aleua Judá, chayovida'a nayi jenjo' uo'e jo'ne treinta y dos, jayem choqogaa'me mach'e yaqaya' ja qauaconoue jaga'me qanachetaqate jo'ne yelo'teguet da'me yejaliaĝa.

¹⁵ Mate mane'e jogaa'me 'uaediñe najoĝola'te ch'e ye'uejoda jogaa'me jiyaĝadipi, qa'a noloqo'ote da'me qoyejeteneque gaa'me cuarenta nemenal jo'ne plata qaedi quetot joga'me yali'j nataq'aen joga'me lataĝa. Chayovida'alo jogaa'me namaĝa's etedapega ca'li da'me napacalo'te jogaa'me judiopi, qama'le jetaque yepitaqatedac da'me jetaque ni'yoĝodelo'te jogaa'me laqaya'. Qalaĝaja da'me jayem qamqa'me ja naq'aeta da'me ja'uo, qa'a yataqata jeuate'ca joñe'me Dios.

¹⁶ Chane'eja nach'edata da'me 'ñoĝojeguem ca'li ga'me lae ga'me nequepaĝanaĝat jodi'me noic, qama'le ja jecot joga'me aleua lae. Nach'e ena'ama gaa'me yamaĝa's, da'me ena'uaque t'onataĝa'tape ca'li.

¹⁷ Nataq'aen uo'oe nale jogaa'me jo'ne jiqui'yaĝa'n, qama'le dajoyedalegue ga'me yiqui'yaĝala' jogaa'me ciento cincuenta jo'ne judiopi choqogaa'me lajoĝola'te, nach'e ena'ama jogaa'me jiyaĝa'u laqaya' jo'ne chiyaqapeguelo jogaa'me 'nachaqa'te laqaya'.

¹⁸ Qama'le ga'me jo'ne nalochiguilo jogaa'me noloqo'ote da'me qoyalat onolec ga'me uaca jo'ne nauegaĝanaĝanec nataq'aen jogaa'me seis 'nanaĝatel jo'ne piyo'y, nataq'aen qoyala't qayoĝode' jogaa'me olegaĝapi. Nale yenoĝodegue gaa'me diez noloqo'ote jo'ne qonovidaĝat ga'me lataĝa. Qalaĝaja da'me jayem, ja jaconoue jaga'me ñachetaqate jo'ne yelo'teguet da'me yejaliaĝa, qa'a jayaten da'me laguegue jogaa'me lachoĝode'j jogaa'me jiyaĝadipi.

¹⁹ Am Ñedios, am ñachoĝodenot qaedi ja jayem 'te auapalaĝate'ta, nataq'aen anetouetac yema da'me dojo' jo'ne je'etem jenjo' jiyaĝadipi.