Nehemías 4 - Toba del Oeste

Nehemías napacalo'te jogaa'me jo'ne jetaque nauateguet

¹ Mane'e ca'li ñe'me Sambalat noma'a queda'me qa'noĝojeguem na'me nequepaĝanaĝat jodi'me noic, qama'le jalcote dalemata, ja 'yamaqaten joda'me jauoqotac, qama'le qo'mi ye'ue'tape.

² Ca'li male yomat joda'me le'uenaĝanaĝac, dajoyilo qaedi dojapegue'to jogaa'me mach'e lecochaĝa'u nataq'aen gaa'me coico laje' jo'ne mach'e 'lachaqa't di'me Samaria, qama'le enaac joñe'me: «Naajo' jo'ne yataqata choĝodache jo'ne judiopi, ¡etapela'ajalo yayate'n joga'me 'yetedac! ¿Qo'li qauaje'tema ta'le yitaĝa yauote joga'me lajaqaje'j qomle? ¿Qo'li etedapega onolec nolo' da'me paja'a yema yoma't da'me 'noĝodijeguem, uotaĝa da'me yaqanate't ta'le yacone'ualo jogaa'me lojochel jogaa'me qadi jo'ne joote nec'atague'j?»

³ Joga'me ueta'ña lae 'uo joñe'me jiyaĝaua jo'ne lenaĝat Tobías mach'e Amón le'ec jo'ne enaac: «Joga'me jo'ne qo'noĝojeguem yataqata ja t'añañi, ¡chayovida'a qom quije'mec jaga'me uaĝayaĝa, qama'le 'naqañe joga'me!»

⁴ Chane'eja male ñetamen: «Mach'e am Qanedios, anaquiaĝanalo nayi jogaa'me jo'ne qo'mi ye'ue'tape, qama'le auen 'viyelaĝalegue jo' qomle da'me dojo' ja no'en jo'ne te'me qo'mi 'yeteque. ¡'Noota qom qoye'n ne'uaqa!

⁵ Ena'te avichoĝode'n jogaa'me, uotaĝa ta'le auapalaĝa't jogaa'me loeco, qa'a qo'mi 'yelaĝatetapeguema ta'le qolaĝalegue da'me qa'noĝojeguem joga'me qat'onatac jo'ne jetaque jadalaĝataq.»

⁶ Da'me qo'mi qa'a qa'noĝojeguem joga'me nequepaĝanaĝat, jo'ne joote na'ña ga'me laeñi ga'me 'nonatac. Yamta'le jomataq joga'me mach'e qat'onataqa, qa'a gaa'me jiyaĝadipi 'uo joda'me 'lañaĝa'j nataq'aen lamai'j ta'le jetaque yoma't.

⁷ Qama'le ñe'me Sambalat nataq'aen ñe'me Tobías, chayovida'alo jogaa'me Arabia laje', gaa'me Amón laje' nataq'aen jogaa'me Asdod laje' nomeda'a queda'me qa'noĝotapijeguem joga'me nequepaĝanaĝat jodi'me Jerusalén, da'me male japadenaĝayilo gaa'me lauaco, qama'le jalcote da'me dalemata'y.

⁸ Qama'le jogaa'me nejoĝona't da'me jetaque qo'mi quiiñguilo, qa'a jetaque nolaĝachidiñe jenjo' noic jo'ne Jerusalén.

⁹ Chane'eja paja'a ñetamenoqot joñe'me Qanedios, nataq'aen da'me jauoqo'oe jogaa'me nouatoqo't nale pi'yaq nataq'aen nale nolo'.

¹⁰ Yem da'me dojo' qama'le jogaa'me jiyaĝadipi jo'ne Judá laje' enapega't: «Jogaa'me jo'ne naqatedegue joga'me qa' lojoche yataqachiñe nelidiñi, qa'a jalcote joga'me jetaque jiyojoq. Chane'eja da'me qo'mi male ja jetaque qolaĝalegue ta'le qa'noĝojeguem jena'me nequepaĝanaĝat.»

¹¹ Joote qauanoma'alo jogaa'me qadaute'u, jo'ne uenatetapegalo queda'me jetaque qo'mi 'notetalo'te queda'me jetaque qo'mi nalachidiñe, qaedi ja jomataq joga'me 'nonatac.

¹² Da'me male yovideta di'me Jerusalén jogaa'me judiopi jo'ne netauelo ca'li jogaa'me qadaute'u, jogaa'me nach'e eta't 'viyelaĝatelo'te jogaa'me 'laqataqa, enapega't: «Jogaa'me ja e'n p'ajaye joga'me auachiyoĝoyeguet, jogaa'me male ami quiiñguilo qomle.»

¹³ Chane'eja jiyamaĝachidiñi jogaa'me jiyaĝadipi, janema jogaa'me 'leuoĝonaqa'te jo'ne ledaĝanaqa'te, jogaa'me miyoĝo nataq'aen jogaa'me lechiquenaqa, jo'ne male janouelo jogaa'me naqaya' jo'ne neteda'ña joga'me noic jo'ne p'añe, da'me nataq'aen janouelo jogaa'me ueteda'ña joga'me nequepaĝanaĝat jo'ne maliaĝa ja qayaje'mec nataq'aen jogaa'me lael da'me ueteda'a joga'me 'yoqodaye jo'ne maliaĝa ja qoyomat.

¹⁴ Qama'le male yem da'me dojo', qama'le da'me jayem male japetena'ajalo jogaa'me jiyaĝa'u jo'ne p'ajodaye nataq'aen jogaa'me najoĝola'te, qama'le jemata'a't yema joga'me noic qama'le jenaac: «Ena'te ta'le at'oiyiyalo gaa'me qadaute'u; anetoviñetac queda'me p'ajaye ñe'me Qadejaliaĝanec, da'me nataq'aen qot'oiyapega. Qama'le jeloiquiaqatac qaedi qaue'uolo'te jogaa'me qadaqaya', choqogaa'me qochalaqa, gaa'me qochalel nataq'aen jogaa'me qadoua'. ¡'Noota qom qadetela yema ga'me qadayi!»

¹⁵ Ca'li jogaa'me qadaute'u nomeda'a da'me dojo' jo'ne jetaque jauoqo, nataq'aen yayate'n ñe'me Dios da'me joote yapalaĝat joga'me loequenataĝanaĝa'j, qama'le da'me qo'mi male qa'viyelaĝa joga'me mach'e qat'onatac.

¹⁶ Qama'le chiyoqotelegue jo'me nolo', ga'me lae gaa'me jiyaĝadipi jo'ne jayem ueteda'ajop male ye't jogaa'me 'nonataqa, qama'le jogaa'me jiyaĝadipi laqaya' male netelalo, yauo'oe jogaa'me nemiyoĝo, jogaa'me lequepaĝanaqatel, lechiquenaqa nataq'aen jogaa'me letoguijel. Qama'le jogaa'me jo'ne yelodelegue jodi'me noic nach'e ena'ama lecochiyalo.

¹⁷ Chane'eja jogaa'me jo'ne 'noĝodijeguem joga'me nequepaĝanaĝat, choqogaa'me yiyoĝotedac joga'me qa' lojoche, e'n onolec ga'me louaq da'me 'yonataĝanaĝa'n, qa'a joga'me louaq laqaya lajoqot'eda joga'me 'leuoĝonaĝa't.

¹⁸ Yemeda jogaa'me 'noĝodijeguem joga'me nequepaĝanaĝat yauo'oe jogaa'me ledaĝanaqa'te jo'ne yanayelo naa'me nejataĝaiqui'. Qama'le ga'me ue'ta jena'me yae nach'eñe jo'ne yajediye nale jaga'me najeede.

¹⁹ Qama'le joote japetena'ajalo jogaa'me jiyaĝa'u jo'ne p'ajodaye nataq'aen jogaa'me najoĝola'te, chayovida'a yema jogaa'me jiyaĝadipi, qama'le jenaac: «Joga'me qat'onatac qa'a t'adaic nataq'aen da'me jalcotelegue, qama'le da'me jenaq qa'a qo'mi qayada'ache joga'me jo'ne je'etaqatac.

²⁰ Qama'le qomle da'me auomachiiya joga'me najeede, qama'le qo'mi aualiquiyeta, qa'a joñe'me Qanedios male qo'mi de'uolo'te yema da'me qo'mi.»

²¹ Da'me naq'aeta, chiyoqotelegue da'me 'noĝojeguem jañe'me ajeua chayovida'a da'me di'yo't jogaa'me uaqachiñipi, da'me maliaĝa jo'onataĝanaĝatac, qama'le jogaa'me jiyaĝa'u laqaya' male lajoqot'alo gaa'me nemiyoĝol.

²² Qama'le jenapegalo jogaa'me: «Yema da'me ami qa'a ovitaue jena'me Jerusalén nale pi'yaq, qama'le onolqa'tape da'me ami auañiya joga'me adamaĝajequi, qaedi adechiliya jena'me noic; nataq'aen joga'me nolo' male a'uonataĝañi, a'vichi joga'me at'onataqui.

²³ Qa'a da'me jayem nataq'aen jogaa'me mach'e yaqaya', chayovida'alo jogaa'me yamaĝa's jo'ne jayem quetedapegue', male jo'onataĝanaĝatac jo'ne qaya'te da'me qa'nomataĝac. Qaya'te da'me qo'mi ta'le naqa't jogaa'me leuo lael nale pi'yaq, qama'le onolqa'tape lajoqot'eda joga'me 'leuoĝonaĝa't.»