Nehemías 2 - Toba del Oeste

Artajerjes yamaq joñe'me Nehemías yamaĝa jodi'me Jerusalén joñe'me Nehemías

¹ Ga'me auoĝoic 'uaeñe jo'ne Nisán, ga'me uo'e jo'ne veinte da'me lejaliaĝa ñe'me Artajerjes, qama'le ca'li male jetaque ñiyomaĝan ñe'me jaliaĝanec joga'me lataĝa, qama'le joñe'me jayem yec'aten queda'me qaya'te nolo' ta'le jayem yauana da'me jayem totelegue da'me jajo'tot.

² Chane'eja jayem yenat: «¿Toqoch'e am totelegue, Nehemías? Qa'a da'me at'oyaĝac ja adeleuac. Da'me jo'ne at'oyaĝac qa'a dayali na'me adauel.» Jayem jalcote da'me yoqolanaĝa,

³ qama'le ja'ateguet: «¡Qayoĝode' jogaa'me anenoloqo'ote da'me anejiyaĝauayaĝac, am jaliaĝanec! ¿Teua'atoqo' ja jayem 'te totelegue, queda'me yataqata qoyenoĝoda't di'me noic jo'ne ueda'ña jodia'me mach'e yet'al, nataq'aen jogaa'me jo'mi jo'ne datochidiñe q'ae'n joga'me dole'?»

⁴ Ñe'me jaliaĝanec male jayem yenat: «¿Jach'e ga'me jo'ne jayem auajelaĝanot?» Jayem jajela joñe'me Dios jo'ne na'ague di'me piyem,

⁵ qama'le ja'ateguet ñe'me jaliaĝanec: «Qom adelnataĝac, am yejaliaĝanec, ta'le jayem avichoĝoden, qama'le jayem auaje'tem ta'le jajoyi di'me Judá, jodi'me noic jo'ne ca'li ueda'ña jodia'me yet'al qama'le jetaque jadalaĝat.»

⁶ Joñe'me jaliaĝanec jo'ne neta'ña lae jañe'me jaliaĝana 'me jayem yenat: «¿Jach'e eete' gaa'me noloqo'ote jo'ne auouetaque? Qama'le, ¿jach'e eeta qom a'niyelaq?» Jayem ja'ateguet yema joga'me nedaqa' jo'ne jouetaque, qama'le ñe'me jaliaĝanec jayem yajeta ca'li da'me jajoyi.

⁷ Nataq'aen ja'aĝatem: «Qom adelnataĝac, am jaliaĝanec, qama'le qoyauo'oe jogaa'me adediijel jo'ne qoyamaĝalo jogaa'me jaliaĝanaqa laqaya' jo'ne neda'ña di'me lajego di'me ñache, qaedi jayem qoyaje'tem ta'le jovida'ata nataq'aen jovita jodi'me Judá,

⁸ nataq'aen jaga'me adediije jo'ne yelo'ta ñe'me Asaf jo'ne neteloqo't jodi'me 'nonaĝa jo'ne adoĝot, am jaliaĝanec, jo'ne ya'uo da'me lecochaĝac jo'ne jouetaque, qaedi yitaĝa 'ñoĝojeguem jogaa'me lael ñe'me tamenaĝaiqui choqogaa'me lael joga'me noic, nataq'aen qaedi ja'uo ga'me emec jo'ne jonaue.» Qama'le ñe'me jaliaĝanec Artajerjes jayem yanem yema jenjo', qa'a da'me lichoĝodenataĝanaĝac joñe'me Dios jayem ue'tajop.

⁹ Male jajoyilo jogaa'me jaliaĝanaqa jo'ne neteda'ña di'me lajego joga'me ñache, qama'le janema jogaa'me nediijel jo'ne yauo'oe joñe'me jaliaĝanec Artajerjes. Nataq'aen uo'oe gaa'me coico laje' nataq'aen naa'me coico le'ec lejaliaĝanaqa jo'ne jayem namaĝaguelo ñe'me Artajerjes qaedi jayem naquetegue.

¹⁰ Qalaĝaja ca'li male nomeda'a ñe'me Sambalat jo'ne Horón le'ec nataq'aen joñe'me Tobías, lamaĝajec jo'ne Amón le'ec, qama'le jalcote da'me lalematai'j, qa'a ja 'yamaqate'n ta'le 'uo joga'me necochaĝac jo'ne qoyanema jogaa'me Israel lec'oqo'tepi.

Nehemías 'yañaqate't gaa'me jiyaĝa'u qaedi qo'noĝojeguem ga'me nequepaĝatejop di'me noic

¹¹ Ca'li yenoĝodegue tres jogaa'me noloqo'ote da'me male joue'ta di'me Jerusalén,

¹² male joñejeguem jo'me pi'yaq qama'le jec, ñaequetapegue'to jogaa'me jiyaĝa'u, qalaĝaja qaya'te jiyaĝaua ta'le yayaten joga'me yelnataĝac jo'ne Dios yanoue jena'me yeuel, qaedi je'etem jodi'me Jerusalén. Qaya'te jauana joga'me pegaq laqaya, nach'egata joga'me jonetalegue.

¹³ Chane'eja jojo' pi'yaq ja'ya joga'me nadiiuo jo'ne lenaĝat C'ama'ague Ladiiuo, qama'le jajoyi jodi'me lec lejede nataq'aen joga'me nadiiuo laqaya jo'ne lenaĝat Qoyacha'ña nale ga'me Qoyeguem, qama'le ñaloqoten joga'me lequepaĝanaĝat di'me Jerusalén: jauana da'me 'uaĝañe, nataq'aen gaa'me jo'mi jo'ne datochidiñe.

¹⁴ Yem qama'le jajoyi joga'me nadiiuo laqaya jo'ne lenaĝat Noĝop jo'ne Nayetaye, chayovida'a joga'me noĝop lae't jo'ne lenaĝat Loqote jo'me Jaliaĝanec, qalaĝaja ga'me pegaq jo'ne jonetalegue ja yaqanatet ta'le ta'ya.

¹⁵ Chane'eja ca'li maliaĝa pi'yaq, male jeguije'mec di'me noĝop ladic, qama'le jec'atetac joga'me nequepaĝatejop di'me noic nataq'aen ñaloqoten. Yem da'me dojo' qama'le yitaĝa ji'iyelaq, ja'uet joga'me C'ama'ague Ladiiuo.

¹⁶ Jogaa'me jaliaĝanaqa ja yayate'n joga'me jo'ne jajoyi, nataq'aen joga'me je'etetac, qa'a qaya'te joga'me ñechoĝota. Nataq'aen maliaĝa ja ja'aqataĝanema jogaa'me judiopi, uotaĝa jogaa'me tamenaĝaiqui lo'ol, jogaa'me jiyaĝa'u jo'ne p'ajodaye, uotaĝa jogaa'me najoĝola'te. Chayovida'alo jogaa'me 'noĝodijeguem joga'me noic, qaya'te 'uo ga'me yayaten joda'me ja'uo ca'li.

¹⁷ Ca'li male ji'iyelaq qama'le jenaac: «Da'me ami joote auañiya joda'me ja no'en jo'ne qo'mi tauelo. Qa'a jena'me Jerusalén yataqachiñe qonolaĝachiñe, nataq'aen jogaa'me jo'mi jo'ne datochidiñe. Chane'eja jayem ademii'teguet qaedi 'ñoĝonaĝajeguem ga'me nequepaĝatejop jenjo' Jerusalén, qaedi ja yitaĝa ta'le qo'mi qoye'ue'tape.»

¹⁸ Ca'li ja'aĝatema da'me eeta da'me jayem lecochiya ñe'me Dios qaedi ñanac, nataq'aen da'me 'laqatac ca'li jo'me jaliaĝanec Artajerjes, qama'le jogaa'me jo'ne jayem ueteda'ajop male jayem 'yadeteguet: «¡Jaa'a, jo'onataĝanaq!» Qama'le 'nañaĝadijeguem qaedi yauote da'me 'nonataĝanaĝac.

¹⁹ Qalaĝaja ca'li Sambalat jo'ne Horón le'ec noma'a da'me dojo', nataq'aen ñe'me Tobías, lamaĝajec jo'ne Amón le'ec, nataq'aen ñe'me Guésem jo'ne Arabia le'ec, qama'le qo'mi ye'ue'tape nataq'aen enaa'j: «¿Jach'e ga'me aueñetapega ta'le auauoyi? ¿Qo'li jetaque anaucheñiya ga'me jaliaĝanec Artajerjes?»

²⁰ Qalaĝaja ja'ategueta ca'li: «Ñe'me Dios jo'ne na'ague di'me piyem, nach'eñe qo'mi ue'tajopa, qama'le qo'mi mach'e nejoĝonaqa jetaque 'ñoĝonaĝajeguem qomle jena'me noic. Qalaĝaja da'me ami qaya'te auaqanachichi, nataq'aen qaya'te adajo'viyaĝaqui, nataq'aen ja ami 'te qoyouetapiye jena'me jenjo' Jerusalén.»