Nehemías 1 - Toba del Oeste

Nehemías netamelegue di'me noic Jerusalén

¹ 'Laqataqa ñe'me Nehemías, lec'oĝot jodi'me Hacalías: Ga'me auoĝoic noveno jo'ne lenaĝat Quisleu, ga'me uo'e jo'ne veinte, ca'li joue'ta di'me Susa, jo'ne na'ña ga'me nejaliaĝaiqui.

² Jayem dejapichiya ñe'me Hananí mach'e yaqaya, nach'e ena'am qayoĝode' gaa'me jiyaĝa'u laqaya' jo'ne 'lachaqa't di'me Judá. Male jenateque jogaa'me judiopi jo'ne dajodegue yelotaĝa'n da'me 'loyaĝa'j jo'ne ca'li qoyen ne'uaqa joga'me nalada't, nataq'aen di'me Jerusalén.

³ Jogaa'me jayem 'yaĝadetem: «Jogaa'me jo'ne ne'uaqa joda'me nalada't jo'ne ja qoyaue'j qa'a yataqata ja no'en joda'me 'loyaĝa'j nataq'aen 'uo joda'me lepocoĝo'j, qa'a da'me nequepaĝatejop di'me Jerusalén yataqachiñe qonolaĝachiñe, nataq'aen jogaa'me jo'mi jo'ne datochidiñe.»

⁴ Ca'li male jomachiya da'me dojo', male joñiiñe qama'le ñoyen, qama'le qayoĝode' jogaa'me noloqo'ote da'me 'uo da'me nayaliaĝac jo'ne jayem ue'tajop; ñoqouaqatela't, qama'le ñetamenot joñe'me Dios jo'ne na'ague di'me piyem.

⁵ Qama'le jenaac: «Am Jaliaĝanec Dios jo'ne ona'ague di'me piyem, am jo'ne 'uañaĝaic, am jo'ne let'adaic nataq'aen am qot'oiyapega; da'me am jo'ne nach'e eta't da'me adoqopitalo gaa'me jo'ne am noqopideta nataq'aen yoqocha'alo daa'me adamajoĝonaĝaco nataq'aen da'me auen yepaquichigui da'me a'naĝataĝac jo'ne auanema ca'li jogaa'me.

⁶ Male jayem anaquiaĝana nayi, qama'le aua'uo joda'me jiyaĝataque da'me am ñachoĝodenot nale pi'yaq uotaĝa nolo', da'me jayem mach'e anejoĝonec jo'ne qaya'te yepitaĝanaĝac, jo'ne jetaque yecochiya jodi'me Israel. Jechoĝo't jogaa'me qadoeco da'me am ñautenaĝa, ena'ama jogaa'me 'uaediñe jiyaĝadipi, nach'e ena'am jayem.

⁷ Yataqata ja no'en da'me jo'ne jauoqo nale, queda'me ja jauoqo'oe jogaa'me adamajoĝonaĝaco jo'ne auanema joñe'me anejoĝonec Moisés.

⁸ »Anetouetac da'me jo'ne joote auaqatec joñe'me Moisés, queda'me qom am ñautenaĝa, qama'le qo'mi male auen laguedelegue jogaa'me noyaqa.

⁹ Qalaĝaja qom male ñatetonaĝala't nataq'aen am jelaqaque nataq'aen jauoqo'oe jodaa'me adamajoĝonaĝaco jo'ne ja 'nalo'te, nataq'aen jo'onataĝanaq joda'me at'aqatac, qama'le qo'mi auachiyoĝotauelo gaa'me aleua lael jo'ne qaya'aguelo qaedi qo'mi a'viyelaĝatalo jodi'me aleua jo'ne joote adiquiyac jo'ne auanem joda'me adenaĝat.

¹⁰ »Am Yejaliaĝanec, qo'mi mach'e ac'oqo'tepi, nach'e ena'am qo'mi anejoĝonaqa, queda'me at'añaĝac jo'ne p'ajaye qo'mi nec'alaĝatedegue.

¹¹ Am ñachoĝodenot, am Yejaliaĝanec, jayem anaquiaĝana nale jauo'oe jodaa'me ñachoĝodenaĝaco, jayem jo'ne mach'e anejoĝonec, nach'e ena'am yema jogaa'me jiyaĝadipi jo'ne anejoĝonaqa jo'ne 'nonaĝachedigui joda'me adenaĝat. Jayem auanem da'me dojo', qaedi 'uo joga'me jaqanatet qomle male jajoya'aguet ga'me jaliaĝanec, qaedi nach'e ena'am jayem yanem joga'me jouetaque.» Jaajo' noloqo'ote jayem jo'ne japiyen ga'me laquip joga'me jaliaĝanec.