Nahúm 2 - Toba del Oeste

Male qoya'uo lachoĝodec di'me Nínive

¹ ¡Am Nínive, male am yec'ata ñe'me jetaque am yapalaĝat! ¡Auanedalegue ga'me adequepaĝanaĝat jogaa'me adeloiquiaĝanaĝanaqa! ¡Auelolegue jona'me naq'aic! ¡Yataqata aniyamaĝateta't! ¡Auemata'a't jogaa'me adeloiquiaĝanaĝanaqa qaedi yataqata 'nañaĝate'tape!

² Qa'a joñe'me Jaliaĝanec yadalaĝat qomle da'me 'lañaĝa'j jena'me lec'oqo'tepi jodi'me Jacob, nach'e ena'am da'me 'lañaĝa'j jena'me Israel lec'oqo'tepi, qaedi male ena'am ca'li da'me jona'li qonouo', qaedi ja yitaĝa ta'le eda'am jaga'me uva lichidijat jo'ne qaqata.

³ ¡Tomaĝadael gaa'me lequepaĝanaqatel jogaa'me coico laje' jo'ne am nateda'a, nataq'aen tomaĝadayaqa gaa'me leuo lael jogaa'me! ¡Joote niyamaĝateta'ajalo qaedi male deloiqui'y! Gaa'me leloiquiaĝaiqui' jo'ne cadeetal 'uo da'me laqajelgaĝa'j ena'am ga'me dole'; joga'me pegadipi joote ja 'yemadete'.

⁴ Gaa'me leloiquiaĝaiqui' yataqata 'uo da'me lajamaĝaco nale ta'yalo naa'me naq'aico, uotaĝa nale quetapiyelo naa'me nemaqa'te; 'uo da'me laqajelgaĝa'j jo'ne ena'am joga'me necoyadaĝanaĝat nale edañgui, nataq'aen nale tade'guedi eda'am ga'me qajoĝonaĝa lauaq.

⁵ Jogaa'me coico laje' male qoyiyaĝanalo, qalaĝaja poguelaĝa'n nale naqalego', da'me yacheda'a joga'me nequepaĝanaĝat ga'me noic qaedi yiyamaĝatetedac joga'me nequepaĝanaĝat jo'ne quetapiyet, jo'ne 'uo ga'me epaq 'me qoyen nejogaĝanaĝat.

⁶ Male 'nouatedegue jogaa'me jo'mi jo'ne nauateda'aguet ga'me noĝop, qama'le joga'me nejaliaĝaiqui male iyiñe.

⁷ Jaga'me nejaliaĝana male qoyen nelata, qoyauegue joga'me aleua jo'ne ja jote'tegue; gaa'me lamaĝajel 'uo da'me 'lalaĝa'j ena'am joga'me doqoto', male noye'tape, ye'uaĝatalo'te naa'me letoguel.

⁸ Ena'am nale ga'me noĝop ladic da'me tauoĝoyi, gaa'me 'lachaqa't di'me Nínive yataqata dajodegue. Te'me qoyiyaĝatapegue'to: «¡A'niyelaqai! ¡Cha'li anechachetañe!» Qalaĝaja qaya'te 'niyelaq.

⁹ ¡Auacoñiya jana'me plata! ¡Auecachiiya jana'me oro! ¡Da'me leuoyaĝac di'me noic Nínive yataqata qaya'te loiquiaqa'!

¹⁰ ¡Di'me Nínive yataqata qoyapalaĝat, nataq'aen totapega't, tochiñe! Naa'me lequidiaqatel gaa'me Nínive laje' yataqata t'oi'y, male ja t'añiguelo naa'me leliquetel qa'a 'uo da'me loqolanaqa'. Male yema qaya'te 'lañaĝa'j, gaa'me latajoĝo'j yataqata pagaqate'.

¹¹ ¿Jach'e ga'me netaue nayi ga'me lauac joga'me jauaĝaic? Qa'a joga'me p'auo netauelo ca'li gaa'me c'oqo'te jaga'me jauaĝae. Qa'a jaga'me jauaĝae choqogaa'me c'oqo'te yataqata machidiñe ca'li da'me nañoĝochidiñe gaa'me, qaya'te ta'le yoqochoqote't.

¹² Ga'me jauaĝaic ca'li 'uo joga'me loĝonec, qama'le yema qoyalic, deque'e ca'li jaga'me lat'e choqogaa'me c'oqo'te, qama'le jalcote ga'me p'inec uetaue joga'me lauac.

¹³ Joñe'me Jaliaĝanec jo'ne napacalegue ena'uac male enaac: «Jayem 'uo nayi qaedi yataqata am ñautena: male jegouelo gaa'me cadeetal jo'ne nalada't lo'ol qama'le jen yeleguemaĝa't ga'me nemala'; male jala't gaa'me ac'oqo'chedi'; male jen pal da'me adeuodaĝanaĝat jena'me a'naleua, nataq'aen male ja yitaĝa qodomachiya ga'me lajamaĝa gaa'me adamaĝa's.»