Miqueas 7 - Toba del Oeste

Da'me 'letaĝaloĝo'j joga'me Israel lec'oqo'tepi

¹ ¡Jayem choĝodac nayi! Male jena'am joga'me quetalegue ga'me nanaĝanaqa' da'me joote yem ga'me naqataĝanaĝac, qalaĝaja qaya'te yejomalegue jo'ne uva jala uotaĝa jaga'me higo: male qayaua naajo' jalal jo'ne yataqata jetaque jali'y.

² Qa'a male qayaua jena'me jenjo' aleua gaa'me jiyaĝa'u jo'ne onaĝayaqa loec, uotaĝa ta'le maliaĝa uo'oe gaa'me chimaqachidiñe. Dite da'me yemeda yeuateda'a ga'me ua'a da'me yala't joga'me laqaya't, qama'le onolqa'tape napogoĝot ga'me laqaya qaedi yoqovin.

³ Yataqata jalcote da'me ja no'en jo'ne ye't nale: jogaa'me nejaliaĝanaqa paquetedapega ta'le qoyejete'n, qama'le jogaa'me jo'ne yauote nale lec'atenaĝanaĝa'j nataq'aen decachi'tape. Jogaa'me 'uo da'me lañoqotaĝanaĝa'j yauote ga'me yauote, qama'le ye'uetedac nale jena'me noic.

⁴ Joga'me uetauelo jo'ne te'me 'noota, nataq'aen joga'me te'me qouate'ca nale, naqaegaua jo'ne ch'e ena'ama gaa'me yaĝat. Qalaĝaja male novi' qomle joga'me nolo' jo'ne 'yaĝatetedac ca'li gaa'me vitaĝayaqa: joga'me nolo' qomle qoya'uo ne'uaĝanague'j, ¡qama'le novi' da'me 'uo joga'me lejomaĝa'j!

⁵ Chane'eja ena'te a'uamaqaten joga'me 'laqataĝanaĝac ga'me adejec, nataq'aen ena'te auep'iya'a ga'me adaqaya; chayovida'a da'me analoqoten joga'me at'aqatac nale auojapegue' jaga'me adoua,

⁶ qa'a gaa'me nec'oqo'te male yataqata 'yota'n jogaa'me let'al, gaa'me nec'oqotel 'yota'n jogaa'me lat'el, nataq'aen gaa'me natel nautenalo gaa'me li'yodol, qama'le jogaa'me mach'e naqaya', onolqa'tape da'me nautena't.

⁷ Qalaĝaja da'me jayem, nach'e eta't da'me jajo'ta joñe'me Jaliaĝanec; 'uo da'me yajoĝonataĝanaĝac ñe'me Dios jo'ne mach'e Yec'alaĝaiqui, qa'a joñe'me jayem naquiaĝana qomle.

Dios nec'alaĝatedegue qomle jena'me Israel laje'pi

⁸ «Am yauteua, ena'te am matac, yajouaĝat jenjo' yachoĝodec nayi: qa'a te'me 'ñaqañe ca'li, qalaĝaja yitaĝa joñejeguem qomle. Ga'me 'lalaĝa te'me jayem uetalegue nayi, qalaĝaja ñe'me Jaliaĝanec nach'eñe jayem yecoyadetalegue qomle.

⁹ 'Uo ca'li ga'me yoec jo'ne ja no'en, da'me ja joqo'cha ca'li joñe'me Jaliaĝanec. Chane'eja male 'ñañaĝateguet ga'me lalemataic joñe'me; qa'a joñe'me nach'e ena'am ya'uo qomle da'me lec'atenaĝanaĝac yemeda gaa'me yaute'upi, qama'le yataqata ye'uaĝa'n qomle jogaa'me ja 'noe'n daa'me 'lonataqa. Qa'a joñe'me Jaliaĝanec jayem yauegue qomle ga'me 'yoqochiñe, male jayem yaloĝona da'me lomataĝanaĝac.

¹⁰ Chane'eja, qom yauana da'me dojo' ga'me yauteua, qama'le 'uo da'me lepocoĝoc q'aen. Qa'a ca'li jayem ye'uetac nale jayem yenat: “¿Jach'e ga'me uetaue joga'me Jaliaĝanec mach'e Anedios?” Qalaĝaja nayi male jayem matacolec da'me jec'aten joga'me, qa'a yataqata qopiyiñgui qomle, ena'am ga'me jenal jo'ne uañgui ga'me naq'aic.»

Da'me yitaĝa qo'noĝojeguem di'me Jerusalén

¹¹ Am Jerusalén, nadi'tequena ga'me nolo' qomle yitaĝa qo'noĝodijeguem gaa'me adequepaĝanaqa'te, nataq'aen gaa'me loiquiaqa'te ga'me a'naleua qonichigaĝategue qomle.

¹² Qama'le ga'me ac'oqo'tepi male 'niyela', chiyoĝoguelo yemeda naa'me aleua lael: uo'oe gaa'me chiyoqotede'egue di'me aleua jo'ne Asiria, gaa'me laqaya' chiyoqotede'egue di'me Egipto. Chiyoqochidi'ña di'me ñache Nilo, nataq'aen jodi'me Éufrates, quetañelo naa'me noqo'opi let'adayaqa nataq'aen quetalo'te naa'me qajoĝona'a.

¹³ Qama'le gaa'me ale'u lael jo'ne chiyaqapeguelo male qoyeleguemaĝatalo da'me aleua jo'ne totapega't, yajouaĝa't gaa'me 'lachaqa'tedi, da'me ja no'en ga'me 'lonataĝanaĝa'j.

Qonetamelo'te ga'me Israel lec'oqo'tepi qaedi yitaĝa qoyachauelo da'me onaĝaic ladic

¹⁴ Am Jaliaĝanec, adetela jenjo' ac'oqo'tepi: naa'me naajo' 'nanaĝatelpi jo'ne mach'e adoqo'te, queda'me yejamache da'me netedaue ga'me viaq. Qalaĝaja 'uo ga'me aleua jo'ne yataqachiñe onaĝaic: auaue'j: auene'tema ca'li jaa'me noloqo'ote jo'ne 'uaediñe, da'me auaueta gaa'me qadet'al ga'me auaqapiijat jo'ne ua'a di'me Basán nataq'aen di'me Galaad.

¹⁵ Auen yec'ate'n jodaa'me onaĝayaqa at'onataqa, ena'am ca'li jaa'me noloqo'ote da'me auachiyoĝoteda'ña gaa'me qadet'al di'me Egipto.

¹⁶ 'Noota qom naa'me 'nachaqa'te laqaya' qoyauana jena'me jenjo', qama'le jalcote da'me lepocoqo'; te'me jalcote da'me lañoqotaĝanaĝa'j, qalaĝaja naajo' male ja doje'y uotaĝa ja domachi'y.

¹⁷ Qama'le yataqata yipaĝatedoue qomle jena'me aleua, ena'ama jogaa'me nanayaqa nataq'aen yemeda gaa'me jo'ne naqaledelegue jena'me aleua. Qama'le diviloĝo'l nale nenoĝodegue, chiyaqauelo naa'me pataque'te: ¡yataqata jalcote da'me loqolanaqa't da'me am yec'adeta, am Jaliaĝanec, mach'e am Qanedios!

Dios male yichoĝode'n ga'me c'oqo'tepi

¹⁸ Qaya'te Dios laqaya ta'le am ena'am, qa'a auapalaĝa't gaa'me qadoeco, nataq'aen auapalaĝate'talo gaa'me qanautenaĝaco, da'me qo'mi ac'oqo'tepi jo'ne ja qo'mi 'te lama'y. Ja nach'e eta't am ue'tajop da'me adalemataic, qa'a 'uo da'me adamaic nale qo'mi aualoĝonalo da'me adichoĝodenataĝanaĝac.

¹⁹ Chane'eja yitaĝa qo'mi avichoĝode'n qomle, qama'le auejediñe naa'me qadoeco; yataqata auajaĝadiñgui ga'me noĝop laeñi jo'ne jetap.

²⁰ Am Jaliaĝanec, adetela da'me adamaic choqoda'me adoqopich'i jo'ne joote a'uaĝatema ca'li dia'me 'uaediñe jachiyoĝojoĝogueta, di'me Abraham nataq'aen Jacob joca'li.