Miqueas 4 - Toba del Oeste

Da'me lejaliaĝa jo'ne 'nemaĝac chiyaqayi joñe'me Jaliaĝanec

¹ Gaa'me noloqo'ote jo'ne p'atedegue male qoyen p'ajaye jodi'me qajoĝonaĝa Sión, qaya'te laqaya ta'le napacalegue, qa'a ga'me tamenaĝaiqui jo'ne mach'e Jaliaĝanec loĝot netalegue jodi'me. Chane'eja naa'me noyaqa qonec'ata qomle jena'me jenjo':

² yataqata jalcote gaa'me noyaqa nec'adeta qomle, qama'le enapega't: «¡Auanayiquena! ¡Qolaĝaje'mec jodi'me qajoĝonaĝa jo'ne loĝot joñe'me Jaliaĝanec, mach'e Nedios di'me Jacob, qama'le jec'ataĝa ñe'me netamenaĝaiqui! Chane'eja nach'eñe joñe'me qo'mi yapaĝagueneque qomle gaa'me mach'e ladico, qaedi qolaqa'taguelo gaa'me naq'aico jo'ne jalecayelo.» Qa'a nach'edi di'me Sión chiyaqaue joga'me Dios lapaĝaguenataĝanaĝac; chiyoqoda'ague qomle di'me Jerusalén gaa'me mach'e 'laqataqa.

³ Qama'le naqaeñe ya'uo qomle lec'atenaĝanaĝac da'me yec'ate'n naa'me noyaqa, nataq'aen male en yem joga'me qonaqalatapiyelo ga'me jiyaĝadipi jo'ne jalcote, chayovida'alo jogaa'me qaya'alo. Qama'le jogaa'me yaconalo naa'me ledaĝanaqa'te jo'ne nalada't lo'ol, qaedi male qoye'n jegaĝanaqatel jo'ne yolaĝa't nale jena'me aleua, nataq'aen gaa'me lechiquenal qoye'n qomle nequejoĝonaqa'te. Chane'eja male qaya'te noic ta'le yitaĝa yacona joga'me 'neuoĝonaĝat qaedi deloiquitapegue'to gaa'me laqaya', uotaĝa ta'le 'uo joga'me dapaĝaguenataĝanec ga'me nalada't.

⁴ Male nayi qaya'te 'uo joga'me t'oitac, dite da'me yema yataqata machiñe nale 'nomategue, ue'tot jaga'me uva lichidic nataq'aen epaq lenaĝat higuera. ¡Nach'enaua jo'ne 'laqataqa joñe'me Jaliaĝanec jo'ne napacalegue ena'uac!

⁵ Gaa'me noyaqa laqaya' yataqata quetapegue'to jogaa'me mach'e p'iya'alo, qalaĝaja da'me qo'mi nach'e eta't jauoqo 'laqatac joñe'me Jaliaĝanec mach'e Qanedios.

Joñe'me Jaliaĝanec nec'alaĝatedegue ga'me c'oqo'tepi

⁶ Yitaĝa nenaĝategue jenjo' ñe'me Jaliaĝanec: «Qom yovita joga'me nolo', male japetena't yema jogaa'me yalaqa, jogaa'me jo'ne ena'ama jogaa'me 'nanaĝatel jo'ne nelagaĝa, uayodaĝael nataq'aen nelidiñi, jo'ne ja'uo lachoĝode'j ca'li jamaĝategue di'me Babilonia.

⁷ Yemeda naa'me naajo' jo'ne maliaĝa uo'oe, male jen noic dalaĝaic jo'ne yataqata 'uo da'me 'lañaĝac. Chane'eja da'me jayem jo'ne jayem Jaliaĝanec male yataqata ñejaliaĝatelo'te gaa'me yalaqapi, da'me joue'ta na'me qajoĝonaĝa jo'ne Sión, da'me nayi chayovida'alo naa'me noloqo'ote jo'ne na'te'.

⁸ Qama'le am Jerusalén, auena'am ga'me emec jo'ne qayaje'mec, qaedi qonetelalo gaa'me yalaqa. Qomle yitaĝa am p'ajaye, da'me naqa'am yejaliaqa', qama'le auena'am jaga'me jaliaĝana, nach'e ena'am da'me at'oyaĝac joca'li 'uaechiñe.»

⁹ Qama'le jega: ¿toqoch'e a'ualaqatac nayi? ¡Auena'am jaga'me yauo jo'ne jetaque c'oe nale! ¿Qo'li qaya'te am nejaliaĝatelegue, uotaĝa ta'le joote yele'u jogaa'me anapaĝaguenoqo't?

¹⁰ Am noic jo'ne ona'ña di'me Sión, ¡am lecoqotapega't nayi, nataq'aen a'nalaqatapijeguem! ¡Auena'am jaga'me yauo nale dayalitac da'me jetaque c'oe! Qa'a am queda'e qomle ga'me ac'oqo'tepi qama'le neda'ña di'me aleua jo'ne 'nonaĝa, chayovida'a da'me yovideta qomle di'me noic laqaya jo'ne Babilonia. Qalaĝaja nach'edi yachiyoĝoteda'ña qomle male de'uolo'te ñe'me Jaliaĝanec jogaa'me lec'oqo'tepi, nec'alaĝate'guejopa jogaa'me laute'u.

¹¹ Am noic jo'ne Jerusalén: jalcote jogaa'me noyaqa jo'ne am nauteta nayi, jo'ne nenaĝatedegue jenjo': «¡Yataqata 'noota da'me qadamaic qomle da'me qoya'uo lachoĝodec di'me Jerusalén!»

¹² Qalaĝaja naa'me naajo' noyaqa ja yateto'n gaa'me lelnataĝaco joñe'me Jaliaĝanec mach'e Dios, nataq'aen ja yetade'n joga'me jetaque 'lonataĝanaĝac joñe'me. Ja yayate'n da'me naqaeñe yemata'a't qomle, ene'tem joga'me auaqapi p'inec da'me naqa't gaa'me layoqotel, qom ya'uo lec'atenaĝanaĝac.

¹³ ¡Oñejeguem! Male yataqata auapiyiñguilo jogaa'me, am noic jo'ne Sión, qa'a joñe'me Jaliaĝanec eetac jenjo': «Am janem qomle joga'me at'añaĝac, qaedi auena'am joga'me uaca t'adaic, naa'me lepeel qa'a yataqata laicaua jo'ne hierro, nataq'aen naa'me lena'achi yataqata bronce. Qa'a jalcote jogaa'me noyaqa jo'ne auapalaĝa't qomle, qama'le aueuodaĝanec joga'me leuoyaĝa'j jo'ne ch'e yacota ca'li, qaedi jayem auanem, mach'e jayem Jaliaĝanec jo'ne jelolegue yema jena'me aleua.»