Miqueas 3 - Toba del Oeste

Qonelaĝalo gaa'me ja 'noe'n jaliaĝanaqa

¹ Anaquiaĝañiya jenjo', ami jaliaĝanaqa jena'me jenjo' aleua, ami jo'ne najoĝola'te jena'me jenjo' Israel: ¿qo'li ja naqa'ami jo'ne auayachiñe da'me qoya'uo da'me chimaqachiñe?

² Qalaĝaja da'me ami yataqata ja adoqopichiya da'me 'noota, qama'le yejamaq da'me aueñi joga'me ja no'en. Yataqachiñe a'viñejoda ga'me yalaqapi: ena'am ta'le anaqachi ga'me loje', qama'le aueñi jale'taguelo gaa'me p'inaqa.

³ Naq'aeta da'me ena'am ta'le aualiqui ga'me lapa't jena'me jenjo' yalaqapi: anaqachi ga'me lo'oc, nataq'aen auecagaĝachi' gaa'me p'inaqa; aueñe'tem ga'me nojec nale qoyachañgui jaga'me taĝaiqui.

⁴ Gaa'me noloqo'ote qomle da'me aviyaĝañiya ñe'me Jaliaĝanec, qama'te joñe'me ja ami 'te 'yategueta. Gaa'me noloqo'ote joñe'me ami nañoĝochi'ñejopa, yajouaĝa't jogaa'me adoecodi' jo'ne a'vichi' ca'li.

Qonelaĝalo jogaa'me aqataĝanaĝayaqa jo'ne ja yataĝalo'te

⁵ Anaquiaĝañi nayi, da'me ami aqataĝanaĝayaqa jo'ne auoqovi'n nale jena'me yalaqapi; qo'oche' jogaa'me maliaĝa yaqa'a ga'me quetede'egue. Naqa'ami jo'ne aueñetapega a'uaĝachitac joga'me 'nemaĝac qom yataqata ami qoyiqui'yaĝa'n nale, qalaĝaja ch'e a'uaĝachitac joga'me nalada't qom qaya'te ami qoyanema. Chane'eja naq'aeta da'me 'laqatac joñe'me Jaliaĝanec jo'ne ami yanema:

⁶ «Male ja yitaĝa 'uo joga'me ami qoyaloĝoneque nale pi'yaq jo'ne uetedaue ga'me at'ochaqadi', uotaĝa ta'le auayachiñe jach'e ga'me 'uo jo' qom'te. Male yovita da'me loiquiaqa' joga'me adapaĝaguenataĝanaĝaqui, nach'e ena'am nale yenoĝoñe jañe'me ajeua qama'le yem joga'me 'yoqochiñe.»

⁷ Naajo' uanaĝanaĝayaqa chayovida'alo jogaa'me pi'yoĝo'n male yataqata nayi da'me ja di'yoq joga'me lajoĝo'j. Yemeda naa'me naajo' totelo'te nayi, joda'me male ja 'yategueta joñe'me Dios.

⁸ Qalaĝaja da'me jayem, da'me lañoqotaĝanaĝac joñe'me Jaliaĝanec ya'uo da'me 'yañaĝac nataq'aen en ja'ya da'me yiyamaqachiñe, chayovida'a ya'uo da'me yepagaĝac qaedi ja'aĝatem jodi'me Israel da'me 'uo da'me nautenaĝac chayovida'a joda'me loec.

Napalaĝa di'me Jerusalén

⁹ Anaquiaĝañiya jenjo', ami jo'ne jaliaĝanaqa nataq'aen najoĝola'te jena'me jenjo' noic Israel, ami jo'ne anaucheñiya da'me jo'ne yataqatelegue, qama'le aueñi namaqatapiye joga'me te'me chimaqategue,

¹⁰ ami jo'ne a'noĝoñijeguem ca'li ga'me Jerusalén, noic jo'ne netalegue di'me qajoĝonaĝa Sión, chiyoqochiñe da'me adalataĝanaĝaqui nataq'aen jodaa'me ja ejoda.

¹¹ Nataq'aen ami jo'ne c'atenaĝanaĝayaqa jena'me jenjo' noic, nach'edata da'me alecochiiya joga'me jo'ne yanema jaga'me laicaua; nataq'aen ami jo'ne tamenaĝaiqui lo'ol, ja auapaĝaguenataĝañi qom qaya'te 'uo ga'me qoyejeteneque; nataq'aen ami jo'ne Dios 'laqatanaĝanaĝanaqa, ch'e auemeñi gaa'me adauanaĝanaĝacodi'; auepichiitapega da'me ami lecochitapegalo ñe'me Jaliaĝanec jo'ne ja 'nalegue, male aueñeetac: «Joñe'me Jaliaĝanec qo'mi ue'tajopa; chane'eja qaya'te ja no'en ta'le qo'mi uauelo jo' qomle.»

¹² Chane'eja yema da'me ami auajouaĝachi da'me napalaĝa qomle di'me Jerusalén: noic jo'ne netalegue di'me qajoĝonaĝa Sión, male qoyen lapa joga'me qoyolaĝat, qama'le jodi'me qajoĝonaĝa Sión male auaqapiijat jo' qomle. Chayovida'a di'me netalegue na'me tamenaĝaiqui male qoyeleguemaĝata ga'me viaq.