Malaquías 3 - Toba del Oeste

Ñe'me Dios male namaĝaquena ga'me 'laqatanaĝanaĝanec qaedi yiyamaĝatetac da'me ladic

¹ Joñe'me Jaliaĝanec jo'ne napacalegue ena'uac yitaĝa enaac: «¡Je'uauaĝata qomle na'me 'yaqatanaĝanaĝanec qaedi yiyamaĝatetac qomle na'me yadic! Qama'le paja'a jajoyi ga'me tamenaĝaiqui, nach'ayem Adejaliaĝanequi jo'ne aueloyitaque. ¡Ñe'me yamaĝajec yamta'le novi', naqaeñe jo'ne auachiitaque qaedi ami 'yaĝatetapema qomle da'me ñiyamaĝataĝac!»

² Qalaĝaja qom novi', male qaya'te dajo'tot: yataqachiñe qaya'te yaqanatet ta'le nechatetañe, qa'a ñe'me yamaĝajec ena'am joga'me dole' nale en yavic jaga'me laicaua, nataq'aen ena'am joga'me niyonaĝa't nale en yoqovita ga'me paĝachigui.

³ Qom novi', male ñiiñe qaedi yapalaĝa't gaa'me loeco naa'me naajo' jo'ne chiyoĝoteguet di'me Leví, ena'am nale qoye'et jaga'me oro nataq'aen jaga'me plata nale qoyachañgui ga'me dole'. Chane'eja naqaenaua male yanema qomle gaa'me lajaqaje'j jo'ne chimadichidiñe joñe'me Jaliaĝanec.

⁴ Chane'eja joñe'me male yataqachiñe matac da'me yaconegueta gaa'me lajaqaje'j ga'me Jerusalén laje'pi nataq'aen yema ga'me lec'oqo'tepi di'me Judá, ena'am da'me qoya'uo joca'li.

⁵ Joñe'me Jaliaĝanec jo'ne napacalegue ena'uac male enaac: «Chane'eja male ja'uo yec'atenaĝanaĝac qaedi ami je'uaĝa'n jo' qomle, qa'a da'me jayem jec'ate'tape yemeda gaa'me jo'ne napaĝaguetedapega da'me pinec, nataq'aen jogaa'me quejeguetaĝayaqa, chayovida'alo gaa'me ja yepaquichigui da'me 'laqata'j, nataq'aen gaa'me ye'ue'tape gaa'me onataĝanaĝayaqa, gaa'me ja lecochiyalo gaa'me p'ael uotaĝa gaa'me jape'l, nach'e ena'am ja no'en da'me 'yeteque gaa'me ja Israel laje', nataq'aen gaa'me jo'ne ja jayem 'te uatequeda'a.»

'Noota qom yitaĝa qoyauo'oe naa'me najaqajecpi

⁶ Joñe'me Dios yitaĝa enaac: «Jayem anaquiaĝañiya, ami Israel lec'oqo'tepi: da'me ami maliaĝa ja ami 'te qoyapalaĝa't yajouaĝat da'me yoqopich'i, qa'a jayem jo'ne Jaliaĝanec ja ñadalaĝatela't.

⁷ Qalaĝaja da'me ami qamqa'me chiyoqo'taguet dia'me adet'aldi', nach'e eta't ja auoqochiiyalo gaa'me yamajoĝonaĝaco. Chane'eja, 'noota qom male jayem a'niyelaqaeya, qama'le yitaĝa ami ji'iyelaĝalo qomle, mach'e jayem Jaliaĝanec jo'ne ñapacalegue ena'uac. Jaja'a, yataqachiñe naq'aeta qomle ga'me ja'uo. Qalaĝaja da'me ami 'uo ga'me jayem auenachiyec: “¿Jach'e ga'me 'noota ta'le jauoqo, qaedi am ji'iyelaĝajaĝa?”

⁸ Qama'le ami ja'ategueta nayi: Yataqachiñe qalaq ta'le 'uo joga'me jayem decachiyot, ¡qalaĝaja da'me ami qamqa'me joote jayem auecachiiyot! Qalaĝaja maliaĝa jayem auenachiyec: “¿Jach'e ga'me jecachaĝa ca'li?” Chane'eja yataqachiñe jayem anaquiaĝañiya nayi: jayem auecachiiyot ca'li male aĝañiñi da'me auauoyi adajaqajequi nataq'aen joga'me jo'ne diezmo.

⁹ ¡Yema da'me ami joote jayem auecachiiyot! Chane'eja nayi male ami jachalo'te da'me ja no'en adachoĝodequi, yema da'me ami Israel lec'oqo'tepi.

¹⁰ Anedoyiquena ga'me diezmo, qama'le auachiyañgui jaga'me najaqaje lae't, qaedi jena'me 'yemec male ja qaya ga'me nalic. ¡Cha'li jayem auapiyeñi! Qama'le auañiya qomle da'me jo'ouategue di'me piyem, qaedi jen jalcote ga'me ami jeyala'aque.

¹¹ Chayovida'alo gaa'me qojequioĝoel nataq'aen gaa'me napaĝatpi jo'ne yali'j nale ga'me adanec, male je'n qaya'alo, qama'le gaa'me uva lichidijat jalcote ga'me jala qomle.

¹² Qama'le auañiya queda'me jenjo' at'achaqadi' male yataqachiñe onaĝaic, qama'le yemeda naa'me noyaqa male yauata da'me ami made'tape. Naqayem Jaliaĝanec jo'ne ñapacalegue ena'uac, yataqachiñe naq'aeta da'me 'yaqatac jo'ne ami janema.»

Lichoĝodenataĝanaĝac joñe'me Dios

¹³ Joñe'me Jaliaĝanec yitaĝa nenaĝategue jenjo': «Da'me ami yataqachiñe ja 'noe'n daa'me at'aqataqadi' jo'ne jayem auachiyalo'te, qalaĝaja maliaĝa 'uo joga'me adenataĝanaĝaqui: “¿Jach'e jogamaĝa ga'me ja no'en jo'ne ñenaĝataĝaye?”

¹⁴ Jenjo' ca'li jena'me anenaĝachiyegue: “Qaya'te chiyaqayi ta'le jo'onataĝaneuo'o joñe'me Dios: qom 'uo ga'me qadoec, ja no'en ta'le qo'mi totelo'te, qa'a yataqachiñe qaya'te ga'me chiyaqayi ta'le qolaqa'taguelo naa'me lamajoĝonaĝaco.

¹⁵ Yataqachiñe jayatenaq queda'me 'uo da'me lamai'j gaa'me qaleuaĝayaqa, nataq'aen jogaa'me ja 'noe'n da'me 'loyaĝa'j, qa'a maliaĝa nauteta nale joñe'me Dios, chayovida'a ma'te yapiye'n joñe'me, qalaĝaja qaya'te ne'uaĝanague'j jogaa'me.”»

¹⁶ Gaa'me yataqachiñe uatequeda'a joñe'me Jaliaĝanec, male dojetapega't, qama'le joñe'me nach'e ena'am domachiyalo. Chane'eja male damaĝajoĝolegue qaedi qonedouo jaga'me nede qaedi qoyedidiñe naa'me lenaqa'te jogaa'me.

¹⁷ Qama'le joñe'me Jaliaĝanec jo'ne napacalegue ena'uac 'yaĝate'tape jogaa'me, enaac: «Yamta'le yovita ga'me nolo' qom naa'me naajo' yitaĝa jayem 'niyelaĝadeta. Male je'n yeuoyaĝac, qama'le yataqachiñe qaya'te je'eteque; jene'tem nale ga'me net'a da'me yichoĝode'n jogaa'me c'oqo'te jo'ne yoqochideta.

¹⁸ Chane'eja yitaĝa auañiya qomle joga'me yataqatelegue, da'me ja ena'am joga'me ya'uo da'me ja no'en, qama'le yataqachiñe auayachiñe ga'me t'onataĝaneuo'o joñe'me Dios, ja ena'am joga'me ja p'iya'a.»