Malaquías 2 - Toba del Oeste

Dios ya'uo ga'me ne'uaĝanague'j qomle gaa'me tamenaĝaiqui lo'ol

¹ Qama'le Dios yitaĝa dojapegue'to ca'li gaa'me tamenaĝaiqui lo'ol, enaac: «Ami tamenaĝaiqui lo'ol, jenjo' yaqataĝac yataqachiñe ami yelo'talo:

² »Qom ja jayem 'te auoqochiiya uotaĝa ta'le jayem auachiquiya'a, qama'le ami jachalo'te da'me ja no'en adachoĝodequi qomle. Qalaĝaja joote jen tayi da'me yalemataic joga'me te'me ami jichoĝode'n jo'ne chiyaqayi nale da'me at'onataĝanaĝaqui, yajouaĝat da'me ja eja da'me jayem auep'iiya'a. Qa'a naqayem Jaliaĝanec jo'ne ñapacalegue ena'uac, qama'le yataqachiñe eja naq'aeta da'me ja'uo qomle.

³ »Yataqata jalematayalo qomle jogaa'me ac'oqo'chedi', nataq'aen jajaĝaque joga'me jiyac latec naa'me adatajoĝocodi', late'j jogaa'me nelopi jo'ne te'me adajaqajequi nale. Chane'eja qom qoyepoloq ga'me jiyac latec qama'le da'me ami nach'e ena'am oviyauelo.

⁴ Qama'le chiyaqayi da'me dojo', male auayachiñe da'me ami janema jenjo' yamajoĝonaĝac, qaedi nach'e eta't yepaquichigui da'me 'ñaĝataĝac jo'ne janem ca'li di'me Leví, jo'ne mach'e auachiyoĝoyeguet.» Naq'aeta da'me 'laqatac joñe'me Jaliaĝanec jo'ne napacalegue ena'uac.

⁵ «Jenjo' 'ñaĝataĝac ca'li, yataqachiñe jetaque janem ga'me nec'alaĝa di'me Leví, nataq'aen da'me 'nemaĝac, qaedi yataqachiñe jayem uate'ca nataq'aen jayem yoqo'cha, qama'le naq'aeta ga'me ya'uo ca'li.

⁶ Leví yataqachiñe ja yoqovi'n jogaa'me jiyaĝadipi, dite da'me yapaĝagueneque da'me eja, qama'le yataqachiñe yauana ca'li da'me 'nemaĝac, qa'a nach'e eta't da'me que'tague da'me jepaquetapega, nataq'aen jalcote gaa'me e'n queda'e ga'me ja no'en.

⁷ Qama'le gaa'me tamenaĝaiqui lo'ol 'uo da'me 'lonata'j jo'ne jayem yatetonaĝatec jogaa'me jayem yelotedaque. Chane'eja 'noota qom yema'a't nale ga'me jiyaĝadipi qaedi qoyapaĝague'n jogaa'me, qa'a gaa'me tamenaĝaiqui lo'ol naqaegaua jo'ne mach'e yamaĝa's.

⁸ »Qalaĝaja da'me ami joote aĝañiñi jena'me 'noota ladic, qama'le aueñi' jalcote ga'me jiyaĝadipi yauote loe'j, yajouaĝat da'me ja no'en adapaĝaguenataĝanaĝaqui. Qama'le ja auauoyi ga'me 'ñaĝataĝac jo'ne janem ca'li di'me Leví. Yataqachiñe naq'aeta jena'me jenjo': naqayem Jaliaĝanec jo'ne ñapacalegue ena'uac.

⁹ Chane'eja jen jena'me noic da'me male yataqachiñe ami qoniquiya'alo, nataq'aen male ja ami 'te qouate'calo, qa'a yajouaĝat da'me ja jayem 'te auoqochiiya, nataq'aen da'me ja yema ga'me jiyaĝadipi ta'le auacoñiyegueta nale auapaĝaguenataĝañi.» Naq'aeta da'me 'laqatac joñe'me Dios jo'ne yataqachiñe qaya'te yaqalatac.

Gaa'me jiyaĝadipi male ja p'iida'a joñe'me Dios

¹⁰ Yema da'me qo'mi 'uo ñe'me Qadet'a mach'e qademaye, nach'eñe ñe'me Dios jo'ne qo'mi ye't ca'li. Chane'eja, qom naq'aeta, ¿toqoch'e ñoqovinaqatapega't? ¿Toqoch'e ja jauoqo ga'me 'naĝataĝac ñe'me Qanedios ca'li uauelo dia'me qadet'al?

¹¹ Yema gaa'me lec'oqo'tepi di'me Judá uo'oe daa'me laviyaĝaje'te, qa'a ja qoyoqo'cha joñe'me Dios: gaa'me neteda'ña di'me Jerusalén nataq'aen yema gaa'me Israel laje'pi yauote joga'me yataqata ja no'en. Gaa'me Judá laje' male ja yiyamaĝatetedac ga'me tamenaqa' jo'ne loĝot joñe'me Jaliaĝanec, jo'ne yataqachiñe noqopita, dite da'me e'n loua' gaa'me yauo' laqaya' jo'ne p'iya'alo gaa'me ja ejoda.

¹² Qama'le nayi, ¡ñe'me Jaliaĝanec yataqachiñe yapalaĝa't qomle yema gaa'me yauote jena'me jenjo', temaqaedi yauote ga'me netamenaĝa'j, uotaĝa ta'le yauote ga'me lajaqaje'j.

¹³ Qalaĝaja da'me ami nataq'aen auauoyi jenjo': anoyeñitac nale ovi'ta ga'me tamenaqa', qama'le a'nalaqayitapijeguem, yajouaĝat da'me male ja qo'yamaqaten ga'me adajaqajequi jo'ne te'me auauoyi: yataqachiñe ja qoyaconeguet.

¹⁴ Qama'le qoyenatec: «¿Toqoch'e ñe'me Jaliaĝanec male ja yaconeguet joga'me te'me qadajaqajec?» Qama'le ami ja'aĝatema da'me ja yaconeguet nayi qa'a joote yauana joda'me a'vichiyeque gaa'me adouadi', naqaegaua jo'ne a'uoñegueta ca'li ami nejoqolqa. Qa'a auauoyi' ca'li daa'me at'aqataqadi' da'me yataqachiñe adoqopichiyalo, qalaĝaja male ja auauoyi jena'me jenjo', dite da'me male auoqoviñi', mate mane'e naqaegaua mach'e aquiaĝa'udi'.

¹⁵ Qalaĝaja joñe'me Qanedios yapetena't gaa'me noua' qaedi onolec da'me nejiyaĝauayaĝa'j. Qama'le ya'uo da'me dojo' qaedi uo'oe gaa'me c'oqo'te jo'ne yataqachiñe yauote da'me eja, chayovida'a yataqachiñe quetedalegue joñe'me. Chane'eja, ¡'noota qom at'oiyiya'aguet jenjo': male aĝañiñi da'me auoqoviñetac jaga'me 'uaeñe adouadi'!

¹⁶ Qa'a joñe'me Jaliaĝanec jo'ne napacalegue ena'uac, mach'e Nedios jena'me Israel, yataqachiñe niquiya'a ga'me etapega ja no'en qaedi yeguem jaga'me loua. Chane'eja anechilila't: ena'te ami qovinaĝanaĝayaqa.

¹⁷ Ñe'me Jaliaĝanec male neli'ñejop da'me nach'e eta't 'uo ga'me qo'yaĝatem. Qalaĝaja da'me ami auenachiyec nale: «¿Jach'e ga'me yajouaĝat da'me neli'ñejopa naa'me qat'aqataqa?» Qa'a joñe'me Jaliaĝanec ja 'yamaqaten joga'me eetac nale: «Joñe'me Dios ja eja, qa'a yaconeguet joga'me ja no'en da'me 'lonatac,» uotaĝa joga'me eetac da'me «Yataqachiñe ja chimaqachiñe joñe'me Dios.»