Malaquías 1 - Toba del Oeste

Dios yataqachiñe noqopitalo jogaa'me Israel lec'oqo'tepi

¹ 'Laqataĝanaĝac joñe'me Jaliaĝanec jo'ne qoyanem ca'li ñe'me Malaquías, qaedi 'yaĝatema ga'me lec'oqo'tepi di'me Israel.

² Ñe'me Jaliaĝanec enaac: «Ami yalaqapi, yataqachiñe ami joqopitalo.» Qalaĝaja da'me ami a'uachiyeguet joñe'me: «¿Jach'e ga'me qo'mi di'yoĝoma da'me qo'mi adoqopitalo?» Chane'eja Dios male ami 'yategueta, enaac: «Anetoviñetac dia'me Jacob nataq'aen Esaú da'me neuadiaĝa'u. Qama'le ena'ama ami joqopitalo, ena'am da'me yataqachiñe joqopita ca'li ñe'me Jacob.

³ Qalaĝaja ñe'me Esaú ja ñelaque ca'li. Joga'me 'naleua jo'ne neda'ña gaa'me qajoĝona'a, jen neleguemaĝata da'me totapega't; ga'me mach'e 'naleua nayi yejamaq da'me nedalegue jogaa'me yejidi jo'ne viaĝa's.»

⁴ Jogaa'me Edom laje' jo'ne lec'oqo'tepi di'me Esaú male enapega't: «Uotaĝa qo'mi qonolaĝachidiñe ca'li, qalaĝaja yitaĝa qa'nedijeguem jo' qomle ga'me qa'naleua.» Qalaĝaja joñe'me Jaliaĝanec jo'ne napacalegue ena'uac male 'yategueta: «Qom 'uo ga'me yitaĝa 'niyelaĝachidijeguem, qalaĝaja yitaĝa japalaĝat qomle.» Qama'le joga'me 'naleua jogaa'me male qoyateton da'me aleua jo'ne ue'ta joda'me ja no'en, nataq'aen jogaa'me 'lachaqa'tedi yataqachiñe qoyateto'n da'me nach'e eta't dalematayalo joñe'me Dios.

⁵ Da'me ami yataqachiñe auañiya qomle da'me dojo', qama'le aueñiyaac jo': «¡Yataqachiñe let'adaic joda'me lañoqotaĝanaĝac joñe'me Jaliaĝanec, jo'ne nala'alo gaa'me noyaqa laqaya' jo'ne ja Israel laje'pi!»

'Naqataĝanaĝac jo'ne yelo'talo gaa'me tamenaĝaiqui lo'ol

⁶ Joñe'me Jaliaĝanec jo'ne napacalegue ena'uac male dojapegue'to gaa'me tamenaĝaiqui lo'ol, enaac: «Ami tamenaĝaiqui lo'ol, yataqachiñe auomachiiya jenjo'. Gaa'me nec'oqo'te yataqachiñe 'nonaĝachiguilo jogaa'me let'al, nataq'aen gaa'me nalemaĝaje'te yoqocha'alo jogaa'me ladi'p. Qama'le qom mach'e jayem adet'ai, ¿toqoch'e ja jayem 'te a'nonaĝachiigui? Nataq'aen qom mach'e jayem adadipai, ¿toqoch'e ja jayem 'te auachiquiya'a? Qa'a yataqachiñe jayem a'uotañi nale. Qama'te ch'e jayem auenachiyec: “¿Jach'e jogamaĝa ga'me ua'a da'me am jo'otanaq?”

⁷ Chane'eja ami ja'aĝatema nayi da'me jayem a'uotañi nale aue'viñetac jodi'me ñetamenaqa', qama'le anachiyi jaga'me pan jo'ne qaya'te niyamaqataguec qaedi jayem qoyanem. Qama'te maliaĝa jayem auenachetac: “¿Jach'e jogamaĝa ga'me ua'a da'me am ñautenaĝa?” Qama'le ami ja'aĝatema nayi da'me jayem anaucheñiya nale ja aviyamaĝachiyac jena'me yec'atonaĝala',

⁸ qom auacoñiya joga'me jiyac jo'ne ja no'en, qom yataqachiñe qaya'te lajo'viyaĝac qa'a qanam uotaĝa uayodaĝaic, chayovida'a yeleuac ga'me jiyac. ¿Qo'li ja aueñetapega ta'le ja no'en jena'me jenjo'? Qama'le ¿toqoch'e ja auañema jo' qomle gaa'me adejaliaĝanaqadi'? ¿Qo'li ja dalemata'y qomle, qama'le ja ami 'te 'yamaqate'n?»

⁹ Ami tamenaĝaiqui lo'ol: ¡male anachoĝodeñiyot joñe'me Dios qaedi qo'mi yichoĝode'n! Qalaĝaja qom naq'aeta gaa'me adajaqajequidi', qama'le ena'te aueñetapega ta'le jetaque ami naquiaĝanalo. Aja'y. Ñe'me Jaliaĝanec jo'ne napacalegue ena'uac eetac:

¹⁰ «Quiliajaĝa male qoyapadiñgui ga'me jom ga'me tamenaĝaiqui, qaedi male ja jayem 'te qoneda'alo gaa'me najaqajecpi. Qa'a jenjo' yataqachiñe en ami jalematayalo, qama'le ja yitaĝa ta'le jaconegueta gaa'me adajaqajequidi'.

¹¹ Qa'a yemeda naa'me aleua lael uo'oe gaa'me jayem 'nonaĝachedigui, nataq'aen yataqachiñe 'uo da'me ñi'yoĝodenataguec. Yauote nale ga'me lajaqaje'j jo'ne onaĝaic, qama'le yataqachiñe jayem qo'nonaĝachigui nale.

¹² Qalaĝaja da'me ami qamqa'me jo'ne ami tamenaĝaiqui lo'ol ch'e jayem a'uotañi, qa'a aue'viñetac ñe'me yec'atonaĝala', qama'le jayem auañema nale gaa'me najaqajel jo'ne qaya'te lajo'viyaĝa'j.»

¹³ Ami tamenaĝaiqui lo'ol, anenaĝachiyegue nale jenjo': «Jena'me jenjo' qat'onatac yataqachiñe dajali,» qama'le ch'e a'uotañi joñe'me Dios. Qalaĝaja joñe'me Jaliaĝanec jo'ne napacalegue ena'uac male enaac: «Jayem anedoya'a nale naajo' nelopi jo'ne necachaqa'te, uotaĝa uayodaĝayaqa nataq'aen leuaĝayaqa, qaedi aueñi adajaqajequi. Qama'le jega: ¿qo'li aueñetapega ta'le jayem matac qom naq'aeta da'me auauoyi?

¹⁴ ¡Degueja da'me lachoĝodec qomle joga'me jayem 'naĝatot da'me jayem yanem ga'me onaĝaic lalo, qama'te yaqa'a da'me nedouo! ¡Qa'a yataqachiñe ja no'en jenjo' nedouo! ¡Qa'a naqayem mach'e Jaliaĝanec let'adaic, qama'le yema jena'me aleua yataqachiñe jayem qouate'ca!»