Jonás 4 - Toba del Oeste

Da'me lalemataic ñe'me Jonás

¹ Jonás 'uo da'me ja 'yamaqaten da'me 'yetec joñe'me Dios, chane'eja 'uo da'me lalemataic jo'ne let'adaic.

² Qama'le male netamenot joñe'me Jaliaĝanec, enaac: «Am Jaliaĝanec, jenjo' jo'ne nach'ena, 'me jayem joote ja'aĝatetac ca'li, da'me naqaena 'me 'uo jo' qom'te, ca'li male jayem auana da'me joue'ta di'me mach'e 'ñaleua. Chane'eja paja'a da'me te'me jec, jajoyi di'me noic jo'ne Tarsis, qa'a jayaten da'me naqa'am Dios jo'ne onaĝaicaloec nataq'aen choĝodenataĝanaĝaic, choqoda'me ja paja'a da'me aualemata, qa'a 'uo da'me adoqopich'i let'adaic. Chane'eja da'me a'uaĝatetac da'me aua'uo qomle ga'me ne'uaĝanague'j jenjo' noic, qama'te ja auen 'te yepaquichigui da'me jo'ne a'uaĝatetac 'me jetaque aua'uo.

³ Chane'eja, am Jaliaĝanec, am ñachoĝodenot qaedi auen yem da'me ñejiyaĝauayaĝac; p'ajaye 'noota ta'le paja'a jayem qaya.»

⁴ Qalaĝaja male 'yateguet joñe'me Jaliaĝanec: «¿Qo'li auen 'noota da'me jo'ne am 'yetec da'me dojo' adalemataic?»

⁵ Chane'eja joñe'me Jonás male ca'e di'me noic, qama'le dajoyi ga'me ua'ague jena'me nete', qama'le ua'a da'me male ya'uo ga'me lepaqaliaqa' jo'ne nach'ega ne'tot jena'me lepaqal, qa'a te'me yeuate'ta da'me yauana ga'me qo'yetec di'me noic.

⁶ Dios jo'ne Jaliaĝanec en najeguem jaga'me epaqole jo'ne naje'ma q'aen joga'me neta'ña joñe'me Jonás, qama'le ne'tot jena'me lepaqal ñe'me Jonás, qaedi nomeguet da'me yataqachiñe yiyamaqachiñe. Qama'le joñe'me Jonás jalcote da'me matac queda'me 'uo jaga'me epaqole jo'ne ne'tot ga'me lepaqal.

⁷ Qalaĝaja jo'me nete' laqaya, ñe'me Dios male en yalic ga'me qoche'l jaga'me pata' jaga'me epaqole jo'ne netapecot joñe'me, qama'le chayovida'a da'me male daqaqa.

⁸ Mane'e ca'li nenoĝojeguem jañe'me ajeua, qama'le joñe'me Dios en yajediñe jo'me layat jo'ne 'uo jena'me lauaqayaĝac jo'ne ja yaueta, 'me chiyoĝogue jena'me nete', qama'le nach'e ena'am jena'me ajeua lauaq da'me tachi'ña ñe'me Jonás, choqoda'me yataqachiñe tachigui jena'me laqaic joñe'me. Chane'eja joñe'me male nomeguet da'me 'uo da'me lecopechaĝac choqoda'me male jetaque yeleu joñe'me. Chane'eja male enaac: «P'ajaye 'noota ta'le paja'a jayem qaya.»

⁹ Qalaĝaja da'me male Dios 'yateguet: «¿Qo'li auen 'noota da'me 'uo da'me adalemataic, queda'me yajouaĝat da'me auana jajo'me epaqole da'me male daqaqa?» Qama'le 'yateguet joñe'me Jonás: «¡Jen 'noota jaĝa'te da'me dojo'! ¡Jayem yataqachiñe 'uo da'me yalemataic!»

¹⁰ Chane'eja joñe'me Jaliaĝanec male enapega: «Jejo'me onolec pi'yaq da'me male najeguem jajo'me epaqole jo'ne onole, qama'le jejo'me pi'yaq laqaya nach'ejo da'me male daqaqa. Qalaĝaja ja naqa'am ta'le auaañi jajo'me epaq, nataq'aen da'me ja naqa'am ta'le auen nichiquetajeguem qaedi chayovida'a da'me 'yaĝae. Qalaĝaja ¿toqoch'e nach'e ena'am 'uo da'me adichoĝodenataĝanaĝac?

¹¹ Qama'le nach'e ena'am da'me jayem, jalcote da'me yoyaĝanataĝanaĝac nayi queda'me jichoĝoden jodi'me noic let'adaic jo'ne lenaĝat da'me Nínive, queda'me uo'oe gaa'me ñoqolqapi jo'ne nalo'taguet ciento veinte mil jo'ne maliaĝa ja 'yaĝayaqa, choqoda'me qaya'te ta'le laviyaĝajet, qama'le nach'e ena'ama jogaa'me yejidipi jo'ne qayoĝode'.»