Jonás 3 - Toba del Oeste

Gaa'me Nínive laje' male 'viyelaĝadetot joñe'me Dios

¹ Joñe'me Jaliaĝanec male 'viyelaĝalegue da'me yanem da'me 'laqatac ñe'me Jonás, qama'le enaac:

² «Oc nayi, auec'ata di'me noic let'adaic jo'ne Nínive, qaedi male a'uaĝatetac da'me dojo' jo'ne joote am ja'aĝatem.»

³ Chane'eja joñe'me Jonás yoqo'cha joñe'me Jaliaĝanec qama'le ec, da'me yec'ata di'me noic jo'ne Nínive, nach'edi jo'ne noic let'adaic joca'li, chane'eja nalo'taguet tres naa'me noloqo'ote qom yema qodiquetaye.

⁴ Qama'le taue joca'li ñe'me Jonás yema jo'me nolo' da'me leuoĝoc, qama'le nach'e ena'am da'me jo'ne nenaĝatetapegue, netenec da'me 'laqatac jo'ne enaac: «¡Qom yenoĝodegue gaa'me cuarenta noloqo'ote, qama'le qoyolaĝachigui jenjo' noic jo'ne Nínive!»

⁵ Chane'eja jogaa'me 'lachaqa't di'me noic, jo'ne ja 'yaĝayaqa choqogaa'me 'yaĝayaqa, male p'iida'a joñe'me Dios, qama'le paja'a da'me nayachidigui da'me cha'li ja deque'y, gaa'me neuoyaĝadi choqogaa'me choĝodache, nataq'aen da'me yaediñe gaa'me leuo lael jo'ne ena'am ta'le jiyac layoĝot da'me 'loyaĝa'j, qa'a en laloĝoqui' da'me 'uo da'me layaliaĝa'j.

⁶ Mane'e ca'li yovido'ot da'me 'naqataĝanaĝac joñe'me lejaliaĝanec di'me noic jo'ne Nínive, qama'le nach'e ena'am ñejeguem, ca'e jaga'me lejaliaĝaiqui, qama'le naqat ga'me jo'ne mach'e louo qaedi yaediñe joga'me nouo jo'ne ena'am ta'le jiyac layoĝot da'me 'loyaĝac; ca'li yem da'me ne'et, qama'le naue jena'me aleua.

⁷ Chane'eja joñe'me jaliaĝanec, choqogaa'me lecochaĝa'u, yayatenaĝanaĝaneque ena'uaque jogaa'me Nínive laje' da'me dojo' lamajoĝonaĝac: «Ami Nínive laje'pi: 'noota qom auayachiñe joda'me lamajoĝonaĝac ñe'me adejaliaĝanequi. Qa'a male ja qoyaje'tem ta'le ch'e onolec ga'me jo'ne yacona ga'me niqui'yaĝat, qama'le nach'e ena'ama jogaa'me yejidi jo'ne nelopi, ja qoyaje'tema da'me ta'le qoyiqui'yaĝa'n, qama'le nach'e ena'am da'me ja qoniyomaĝan ena'uac gaa'me nelopi nataq'aen jogaa'me jiyaĝadipi.

⁸ Dite da'me ademiya da'me ami auaeñidiñe gaa'me nouo jo'ne ena'am ta'le jiyac layoĝot da'me 'loyaĝac, qa'a nach'egaua jo'ne laloĝoqui da'me 'uo da'me nayaliaĝa, qama'le nach'e ena'am da'me a'nañaĝachi da'me aviyaĝañiya joñe'me Dios. Nataq'aen da'me ami onolqa'tape da'me aĝañidiñe naa'me jo'ne mach'e at'amaqatenataĝanaĝacodi' jo'ne ja 'noe'n, choqonaa'me mach'e adoecodi' jo'ne ami 'yañaqatetapeque da'me adepatenaĝanaĝaqui jo'ne 'uo chayovida'a nayi.

⁹ Qaedi male uotaĝa ja en 'te yepaguelegue da'me ya'uo ga'me qo'mi 'yeteque joñe'me Dios, qama'le uotaĝa paja'a da'me en qaya da'me te'me lalemataic. Chane'eja qom naq'aeta qama'le ja qo'mi 'te yepaguelo'te da'me qadeleuaĝa.»

¹⁰ Chane'eja, ca'li yauana joñe'me Dios da'me jo'ne ya'uo joga'me jiyaĝadipi jo'ne Nínive laje'pi, choqoda'me male nach'e ena'am yaĝadiñe naa'me mach'e 'lamaqatenataĝanaĝaco jo'ne ja 'noe'n, qama'le ja en 'te yepaquichigui da'me jo'ne joote te'me 'yaĝatema.