Jonás 2 - Toba del Oeste

Netamenaĝac ñe'me Jonás

¹ Qama'le ñe'me Jonás male netamenot joñe'me Jaliaĝanec jo'ne mach'e Nedios ca'li male uetaue lauel ga'me niyaq polio',

² qama'le enaac: «Male am ñachoĝodetapecot, am Jaliaĝanec, da'me 'uo da'me yachoĝodec, qama'le jayem auomachiya. Jeda'me joueta'ña di'me 'lachaqa' da'me neleuaĝa, jo'ne qaya'añgui, chane'eja da'me am jiyaĝana qama'le ua'a da'me jayem alecochiya.

³ Qa'a nach'e am jo'ne jayem auajaĝañgui di'me noĝop laeñi jo'ne qaya'añgui, qama'le ua'a da'me male jayem equejop jena'me noĝop jo'ne yayetaye, choqonaa'me lepa'a jo'ne jalco'l jo'ne nach'e ena'am da'me adamaĝa's, nataq'aen jayem tadelegue.

⁴ Chane'eja janomeguet da'me male auen jeca'e da'me nach'e eta't jayem oue'tajop; qalaĝaja jayem male jen yelnataĝac da'me ja yitaĝa ta'le jauana ga'me anetamenaĝaiqui jo'ne ja 'nalegue.

⁵ Chane'eja da'me male nalo'ta't yema jena'me noĝop da'me male jayem equejop, chayovida'a da'me jayem yajaĝañgui di'me jo'ne yataqachiñe qaya'añgui; qama'le jena'me qol male lecoĝoc jena'me yaqaic.

⁶ Mane'e ca'li jayem domaliñe, qama'le jovida'ña di'me aleua jo'ne p'añe jena'me noĝop jo'ne laeñi jena'me 'lalaĝa; qama'le ¡yitaĝa janomeguet da'me qaya'te loiquiaqa' da'me auen ñecoñetaguec! Qalaĝaja, am Jaliaĝanec jo'ne mach'e am Ñedios, nach'e am jayem anec'alaĝategue, da'me jayem auachiyoĝotaue da'me neleuaĝa.

⁷ Chane'eja da'me male janomeguet da'me jetaque jayem ca'e da'me lec'alaĝa da'me ñejiyaĝauayaĝac, qama'le yitaĝa am ñetouenec, am Jaliaĝanec; qa'a da'me ñetamenaĝac joote am yovidaje'ma, da'me am jo'ne ouetaue ga'me anetamenaĝaiqui jo'ne ja 'nalegue.

⁸ Gaa'me jo'ne yi'yoĝode'n jogaa'me ch'e nequi'il, nach'egaua jo'ne male queda'e da'me lajoĝonataĝanaĝa'j.

⁹ Qalaĝaja da'me jayem nach'e eta't da'me am 'ñonaĝachigui, nataq'aen da'me am ja'aĝatem da'me ja'uo ga'me yajaqajec; jen yepaquichigui da'me jo'ne joote am 'ñaĝatetapecot. ¡Am Jaliaĝanec, jo'ne am onolec da'me aua'uo da'me nec'alaĝac!»

¹⁰ Chane'eja joñe'me Jaliaĝanec male yamaĝalegue ga'me niyaq polio' da'me yedo'ota ga'me 'lañaĝa ñe'me Jonás qaedi ua'a da'me male nolec.